SIRAKA 42

₁Dilo tse di sa tshwanelang go go tlhabisa ditlhong ke tse, mme O se ka wa leofa ka ntlha ya go tshaba se ba bangwe ba se akanyang: ₂O se ka wa tlhabisiwa ditlhong ke Molao wa Mogodimodimo le kgolagano ya gagwe. O se ka wa tlhabisiwa ditlhong ke katlholo e, mo tshekong, e gololang le baikepi tota fa go se na bosupi.

₃O seka wa tlhabisiwa ditlhong ke go rerisana le modirisanyi nao le baeng. le go kgaoganya ditsala bošwa.

₄O se ka wa tlhabisiwa ditlhong ke go kala le go lekanya sentle. O se ka wa tlhabisiwa ditlhong ke go boelwa ke go le gonnye kgotsa go le gogolo mo papading.

₅O se ka wa tlhabisiwa ditlhong ke go dira papadi e e siameng mo ditherisanyong le barekisi. O se ka wa tlhabisiwa ditlhong ke go ruta bana ba gago maitseo a mantle, O se ka wa tlhabisiwa ditlhong ke go kgwathisa molala yo o bosula go fitlhelela O bo O mo phunya letlalo.

₆Fa mosadi wa gago a tsenya-tsenya letsogo gongwe le gongwe, go botoka gore O dirise sekano; mme fa O bona matsogo a nna mantsi, O lotlelele dilo tsa gago.

₇Dilo tsotlhe tse O di abang, O di abe O di badile e bile O di lekantse; fa O dirisa kgotsa O tsaya dingwe O di kwale tsotlhe.

₈O se ka wa tlhabisiwa ditlhong ke go tshwaya motho yo o se nang tlhaloganyo kgotsa seeleele phoso, kgotsa segogou sengwe sa motsofe se se omanyakang baša. Ke gone O tla bontshang fa O rutegile sentle, mme mongwe le mongwe o tla go tsaya sentle.

₉Ngwana wa mosetsana o tlhobaetsa rraagwe boroko ene a sa itse, go tshwenyega mo moyeng mo a go mo direlang, go dira gore a se ka a bo a thulamela: fa a sa ntse a le monnye, a tshaba gore gongwe o tlaa tloga a se ke a nyalwa; fa a setse a nyetšwe, gore o tlaa tloga a tlhoiwa; ₁₀fa e sa ntse e le kgarebane, a tshaba gore gongwe o tlaa tloga a senngwa, a bo a nna moimana a sa ntse a le mo ga gabo; fa a sena go nyalwa, gore gongwe o tlaa tloga a timela; fa a na le monna. gore gongwe o tlaa tloga a sa tshole bana.

₁₁A morwadio o tlhogo e thata? O tlhokomele a se ka a tloga a go tshegisa baba ba gago, batho mo motseng ba bua ka wena, wa sebiwa, mme a go tlhabisa ditlhong fa pele ga batho.

₁₂O se ka wa ne o sale o lebile motho ka ntlha ya bontle jwa gagwe. O se ka wa nna phara-basading, ₁₃gonne motoutwane o tšwa mo diaparong, mme bosula jwa mosadi bo tšwa mo mosading.

₁₄Kgalefo ya monna e bonala e le botoka go na le bomolemo jwa mosadi; basadi ba ka go tlhabisa ditlhong, ba bo ba go kgadisa batho.

₁₅Jaanong ke tlaa go gakolola ditiro tsa Morena mme ke bolele se ke se bonyeng. Ditiro tsa Morena di ne tsa tlholega ka thata ya mafoko a gagwe, mme dibopiwa tsotlhe di dira ka mo a ratang ka gone.

₁₆Tiro ya Morena e tletse kgalalelo ya gagwe jaaka letsatsi le okame dilo tsotlhe ka go galalela ga lone.

₁₇Morena ga aa ka a naya ba ba boitshepo ba gagwe thata ya go bolela ditiro tsa gagwe tse di gakgamatsang tsotlhe, tse Morena yo o Thatayotlhe a di bopileng gore lefatshe le tlhomame mo kgalalelong ya gagwe.

₁₈O sekasekile botengteng le dipelo tsa batho mme a bona maano a tsone; gonne Mogodimodimo o itse sengwe le sengwe se se ka itsiweng, a lemoga ditshupo tsa dinako.

₁₉O bolela se se setseng se kile sa diragala le se se sa ntseng se tlaa diragala, a bo a senole metlhala ya dilo tse di fitlhegileng.

₂₀Ga a falolwe ke mogopolo ope, ga go na le fa e le lentšwe le le lengwefela le a sa le itseng.

₂₁O rulagantse ditiro tse di maatlametlo tsa botlhale jwa gagwe sentle, mme o ntse a le gone go tšwa bosasimologeng go ya bosafeleng. Ga a kake a okediwa ke sepe kgotsa a fokodiwa ka sepe, le gone ga a tlhoke kgakololo ya ga ope.

₂₂Kana ditiro tsa gagwe tsotlhe di eletsega jang, kana di bonala di phatsima jang.

₂₃Tsotlhe di tshela di bo di nnela ruri, mme tsotlhe di mo ikobela mo dipakeng tsotlhe.

₂₄Dilo tsotlhe di tsamaya sebedi-sebedi, sengwe se faapanye le se sengwe, mme ga go na sepe se a sa se feleletsang.

₂₅Bontle jwa sengwe bo tlhatlagana le bontle jwa se sengwe; ke mang yo o ka kgorang go bona kgalalelo ya gagwe?