SIRAKA 36

₁O re utlwele botlhoko, Molaodi, Morena wa dilo tsotlhe mme O re lebe. Dira gore setšhaba sengwe le sengwe se go boife.

₂Tsholeletsa ditšhaba di sele seatla sa gago. mme di bone thata ya gago.

₃A e re jaaka O ne wa ba bontsha ka ditiro tse O neng wa di re direla, gore O boitshepo, le rona O re bontshe ka ditiro tse O ba di direlang gore O thata.

₄A ba go itse, fela jaaka le rona re itse gore ga go na Modimo ope fa ese wena fela, Morena.

₅O romele ditshupo tse dintšha, O dire dikgakgamatso tse e tlaa bong e le gone re di bonang, O galaletse seatla sa gago le letsogo je le siameng ja gago.

₆Tsosa kgalefo ya gago, mme O gorometse bogale jwa gago; senya moganetsi, O nyeletse mmaba wa gago.

₇Tsisa letsatsi leo ka bonako, O gakologelwe maikano a gago; a batho ba bue ka ditiro tsa gago tsa bonatla.

₈A kgalefo ya gago e e tukang molelo e kometse ba ba sa ntseng ba tshela, mme ba ba tšhwereng batho ba gago mašwe ba senngwe.

₉Tšhwatla ditlhogo tsa babusi ba ba tletseng bobaba, ba ba ntseng ba re “Ga go na ope fa e se rona fela.”

₁₀A O ko O kgobokanye merafe yotlhe ya ga Jakobe, O ba busetse bošwa jwa bone jaaka go ne go ntse mo tshimologong.

₁₁Oh Morena, O utlwele botlhoko batho ba ba ntseng ba bitsa leina la gago, O utlwele Iseraele botlhoko, ene yo O ntseng O mo tšhwere jaaka ngwana wa gago wa ntlha.

₁₂O tlhomogele motse wa gago o o boitshepo pelo, e bong Jerusalema yo e leng felo ga gago ga boikhutso.

₁₃O tlatse Sione dipina tsa pako ya gago, le felo ga gago ga boitshepo O go tlatse kgalalelo ya gago.

₁₄O nne mosupi wa ba O ba bopileng mo tshimologong, mme O diragatse se se neng sa bolelelwa-pele ka leina la gago.

₁₅A O ko duele botlhe ba ba go lebeletseng, mme baprofeta ba gago ba supiwe fa ba tšhwanela ke go dumelwa.

₁₆Oh Morena, a O ko O utlwe thapelo ya batlhanka ba gago. go ya ka fa Arone a neng a tshegofatsa batho ba gago ka teng, ₁₇gore baagi botlhe ba lefatshe ba tle ba itse fa O le Morena Modimo o o sa khutleng.

₁₈Mala a tsaya mefuta yotlhe ya dijo, fela dijo dingwe di botoka go na le tse dingwe.

₁₉Batho ba ba botlhale ba lemoga mafoko a maaka, fela jaaka magalapa le one a utlwa gore moutlwalo wa nama ya diphologolo tse di tsomiwang o ntse jang.

₂₀Pelo e e bosula e utlwisa botlhoko, fela motho yo o itseng dilo o itse go ipusolosetsa mo go mung wa jone.

₂₁Mosadi o dumela monna mongwe le mongwe yo o mo nyalang, fela bana bangwe ba basetsana ba botoka go na le ba bangwe, ₂₂bontle jwa mosadi bo itumedisa motho yo o bo lebileng; ga go na sepe se motho a se ratang go feta se.

₂₃Fa loleme lwa gagwe lo bua ka bopelonomi le bonolo, monna wa gagwe o gaisa bana botlhe ba batho.

₂₄Monna yo o nyalang mosadi o bapala loruo lo lo fetang tse dingwe. O na le mothusi yo o mo tšhwanetseng, lentšwe le le emeng le tlhamaletse le a ka ikaegang ka lone.

₂₅Fa dilo di sa agelwa di a utšwiwa. Fa monna a se na mosadi o tlhola a lelera fela, a ngongolaka.

₂₆A mongwe o ka ikanya motho yo o tshotseng dibetsa, yo o sasankang le metse?

₂₇Fela jalo, ke mang yo o ka ikanyang motho yo o se nang legae, yo o lalang gongwe le gongwe mo a phirimelelwang teng?