SIRAKA 35

₁Motho o dira dineelo tse dintsi fa a tshegetsa Molao; o ntsha ditshupelo tsa kagiso fa a latela ditaolo.

₂Fa a leboga o ntsha tshupelo ya bupe jo bo boleta; fa a ntsha dikatso o ntsha tshupelo ya pako.

₃Fa O tlogela boikepi Morena o tlaa go itumelela, mme fa O tlogela tshiamololo, O duelela dibe tsa gago.

₄O se ka wa tla fa pele ga Morena O iphotlhere fela; gonne dilo tse tsotlhe di laetšwe ke taolo.

₅Neelo ya mosiami e kgabisa aletara, mme moutlwalo wa yone o tlhatlogela kwa go Mogodimodimo.

₆Tshupelo ya mosiami e a amogelwa, kgopotso ya yone ga e kitla e lebalwa.

₇O tlotle Morena ka go nna pelo. O se ka wa tsisa mabutšwa-pele O a fokoditse.

₈O kgabise dimpho tsa gago ka sefatlhogo se se thamileng, mme O neele bolesome jwa dilo tsa gago O itumetse.

₉O fe Mogodimodimo jaaka le ene a go file, O le pelo, fela jaaka dilo tse O nang natso di ka kgona, ₁₀gonne Morena o duela sentle, ene o tlaa go duela gasupa go feta.

₁₁O se ka wa o ntshetsa neelo ka dilo tsa kokiso ya bolotsana, ga o kitla o e amogela. O se ka wa ikanya tshupelo e e sa siamang;

₁₂gonne Morena ke moatlhodi yo o seng letlhotlho.

₁₃Ga a tlhotlholole mohumanegi, o reetsa kopo ya motho yo o utlwisitsweng botlhoko.

₁₄Ga a tlhokomologe kopo ya lesiela, kgotsa ya motlholagadi fa a mo itokela.

₁₅A dikeledi tsa motlholagadi ga di elele mo marameng a gagwe fa a lela kgatlhanong le motho yo o dirileng gore di tshologe?

₁₆Motho yo o direlang Modimo ka pelo ya gagwe yotlhe o tlaa amogelwa, dikopo tsa gagwe di tlaa fitlha kwa marung.

₁₇Thapelo ya moikokobetsi e phunyeletsa maru, mme ga a kitla a bo a gomotsega go fitlhelela e bo e fitlha kwa Moreneng; ₁₈le gone ga a kitla a ema go fitlhelela Mogodimodimo a mo ela tlhoko, a tlhokisa mosiami molato a bo a atlhola.

₁₉Mme Morena ga a kitla a nna bonya, kgotsa a ba diegela,

₂₀go fitlhelela a robaka matheka a ba ba se nang boutlwelo-botlhoko, a bo a ipusolosetsa mo ditšhabeng, ₂₁go fitlhelela a fedisa digopa tsa baikgantshi, a bo a komolaka dithobane tsa bogosi tsa baikepi, ₂₂go fitlhelela a duela mongwe le mongwe jaaka ditiro tsa gagwe di tšhwanela, a bo a duela ditiro tsa batho go ya ka mo maikaelelo a lone a tšhwanelwang ka teng,

₂₃go fitlhelela a bo a atlhola kgetsi ya batho ba gagwe, a ba itumedisa ka boutlwelo-botlhoko jwa gagwe.

₂₄Boutlwelo-botlhoko bo amogelwa ka pelo e tshweu ka nako ya mathata, jaaka maru a pula ka nako ya komelelo.