SIRAKA 29

₁Fa O adima mokaulengwe wa gago O a bo O dira tiro ya boutlwelo-bo-tlhoko, mme fa O mo thusa O a bo O tshegetsa melao.

₂O adime mokaulengwe wa gago ka nako e a tlhokang ka yone, mme wena O busetse mokaulengwe wa gago kadimo ka nako.

₃O diragatse tsholofetso ya gago mme O ikanyege, mme nako nngwe le nngwe O tlaa bona se O se tlhokang.

₄Batho ba le bantsi ba tsaya kadimo e le sesolo, ba bo ba kokonela bathusi le bone.

₅Motho o a tle a atle diatla tsa yo mongwe go fitlhelela a bo a mo adima sengwe, a bua nae ka lentswe le le tletseng tlotlo ka ntlha ya khumo ya gagwe; fela fa nako ya go duela kadimo e fitlha, o a diega, a bo a duela ka mafoko a a buiwang go sa kgathalwe, a re nako ga e a mo siamela.

₆Le fa a ka duedisiwa, moadimi wa gagwe o tlaa bona bontlhabongwe fela, a bo a bona le bontlhabongwe joo tota e le sesolo. Fela fa gongwe o a tle a elwe ka madi, mme ka mokgwa o o sa tshwanelang a bo a nne le mmaba; motho yoo a mo duele a mo hutsa, e bile a mo gobolola; mme e re boemong jwa go mo tlotla a bo a mo nyatsa.

₇Ba le bantsi ba gana go adima, kwa ntle ga moya o o bosula, ba dirwa ke go tshaba go tsiediwa fela.

₈Fela le fa go ntse jalo, O itshokele badidi, O se ka wa ba letisa bopelo jwa gago.

₉Ka ntlha ya molao O thuse mohumanegi, e se ka ya re a tlhoka wa mo koba a iphotlhere fela.

₁₀Go botoka gore e re O latlhegelwa ke selefera e bo e latlhegela mo go morwarrago kgotsa mo tsaleng ya gago; O se ka wa e tlogela ya itshenyegela fela, ya rusetsa ka fa tlase ga leje.

₁₁Ipeele khumo ka fa Mogodimodimo a laelang ka teng, mme O tlaa fitlhela e go busetsa go feta gouta.

₁₂O ikokobetse mme O tlaa totisa maduo mo polokelong ya gago, mme a tla go namola mo bomadimabeng bongwe le bongwe jwa gago.

₁₃Di tlaa go lwela le mmaba wa gago go feta thebe e e thata kgotsa lerumo le le bokete.

₁₄Motho yo o molemo o emela mokaulengwe wa gagwe; motho yo o mo swabisang ke yo o setseng a latlhegetšwe ke ditlhong fela.

₁₅O se ka wa lebala bomolemo jo moemedi wa gago a bo go diretseng. O go emetse ka botshelo jwa gagwe.

₁₆Moleofi o senyaka dilo tsa moemedi wa gagwe. Motho yo o se nang tebogo o lebala yo o mmolokileng.

₁₇Go emela batho go digile banna ba le bantsi ba ba neng ba eme sentle, ga ba kgotlhokgotsha jaaka makhubu a lewatle.

₁₈Ga ntsha banna ba maemo mo magaeng a bone, gore ba kgarakgatshege mo ditšhabeng di sele.

₁₉Moleofi yo o itshunyatshunyang mo ditsholofetsong; yo o setsesetseng papadi morago o tla iphitlhela a le mo ditshekisong.

₂₀O thuse mokaulengwe wa gago ka fa O ka kgonang ka teng, fela O tlhokomele e se re kgotsa le wena wa welwa ke bomadimabe jo bo tšhwanang le jwa gagwe.

₂₁Dilo tsa ntlha tse di tlhokegang mo botshelong ke metsi, le dijo, le diaparo, le ntlo gore motho a ikatege.

₂₂Go botoka motho a tshela botshelo jwa mohumanegi ka fa tlase ga marulelo a dikgong go na le go ja dijo tse di monate o o feteletseng mo tlung ya motho yo mongwe.

₂₃A O na le go le gonnye kgotsa go le gontsi, go itumelele, mme ga O na go tlhola O biditswe moitaletsi.

₂₄Ke botshelo jo bo ngomolang pelo go tlhola motho a tlhomagantse matlo gongwe le gongwe kwa O nnang teng O tshaba le go bua tota.

₂₅O moeng; O itse gore go kokobediwa go utlwala jang, re sa tlhole re bua ka modumo wa mafoko a a botlhoko, a a reng: ₂₆“Tla kwano, moeng ke wena, baakanya tafole, fa e le gore O tshotse sengwe, se nneele ke se je.”

₂₇Kgotsa: “Tsamaya, moeng ke wena, sutela mongwe yo o tlotlegang; morwarre o tsile go nna mo, ke tlhoka ntlo e.”

₂₈Go imela motho yo o itšhwereng setho go nna a utlwa a thelesediwa go sa ratwe, a bo a tšhwarwa jaaka moadimi yo o sa dueleng.