SIRAKA 24

₁Botlhale bo ipoka ka maboko a jone, mo gare ga batho ba jone bo a ikgalaletsa.

₂Bo bua mo phuthegong ya Mogodimodimo, bo ikgalaletsa fa pele ga Mothatiyotlhe.

₃Ke dule mo molomong wa Mogodimodimo, mme ka khurumetsa lefatshe jaaka mouwane.

₄Ka tlhoma tante ya me kwa godimodimo, mme setilo sa me sa bogosi ka se baya mo mosipuring wa leru.

₅Ke nna ke le nosi ke neng ka dikologa loapi, mme ka tsamaya kwa teng ga madiba a magolo.

₆Ke ne ka laola makhubu a lewatle le lefatshe lotlhe, mme ka busa batho botlhe le ditšhaba tsotlhe.

₇Ke ne ka batla boikhutso mo gare ga dilo tse tsotlhe, mme ka senka go bona gore nka thibelela mo kgaolong ya ga mang.

₈Ke fa Mmopi wa dilo tsotlhe a nthuta, mme One o o mpopileng wa tlhopha golo fa ke neng ka tlhoma tante ya me gone. A bo a nthaya a re, “Tlhoma tante ya gago mo ga Jakobe, o dire Iseraele bošwa jwa gago.”

₉O ne wa ntlhola go tšwa bosasimologeng, mo tshimologong, mme ke tla nna ke nna gone go ya bosakhutleng.

₁₀Ke ne ka direla fa pele ga One mo motlaaganeng o o boitshepo. Mme ka mokgwa oo ka tlhomama mo Sione.

₁₁O ne wa nnaya boikhutso mo motseng o o rategang, ka laola mo Jerusalema.

₁₂Ka itlhoma bathong ba ba tlotlegang, mo loruong lwa Morena, mo bošweng jwa gagwe.

₁₃Ke ne ka golela godimo jaaka setlhare sa mosetare wa Lebanone, jaaka setlhare sa mosiperese mo Thabeng ya Hemone.

₁₄Ka golela godimo jaaka setlhare sa palema mo Enyedi, jaaka ditlhatshana tsa dithunya tsa Jeriko; Ke ne ka golela godimo jaaka motlhware o montle mo leboeng, le jaaka setlhare sa dipoa se se matlhare a sephara.

₁₅Ka nkga monate jaaka setlhare sa mosinamone le sa akasia, ka hema monkgo o o monate jaaka mira e e tlotlegileng thata, jaaka galabamuno, onika le setakete, jaaka mosi wa insense mo motlaaganeng.

₁₆Ke ne ka ala dikala tsa me jaaka setlhare sa terbinthe, le gone dikala tsa me di dintle, di a kgatlha.

₁₇Ke tšhwana le setlhare sa moretlwa se se melang matlhogela a mantle. Dithunya tsa me di ungwa loungo lwa kgalalelo le khumo.

₁₈Ke nna mma-lorato lo lo itshekileng, mma-poifo, mma-kitso, mma-tsholofelo e e boitshepo; go tšwa tshimologong ke ntse ke newa ba e leng bana ba me, ke newa botlhe ba ba tlhophilweng ke Modimo.

₁₉Nkatamelang lona ba lo nkeletsang, mme lo je lo bo lo kgore maungo a me; ₂₀gonne go nkgakologelwa go monate go feta tswine ya dinotshi, go nja bošwa go monate go feta lomepa lwa dinotshi.

₂₁Botlhe ba ba jang nna, ba tla nna ba batla go ja gape, mme ba ba nnwang ba tla nna ba eletsa go nwa go feta moo.

₂₂Mongwe le mongwe yo o ntheetsang ga a kitla a bo a tlhabiwa ke ditlhong, mme mongwe le mongwe yo o dirang jaaka ke mmolelela ga a kitla a bo a leofa.

₂₃Tse tsotlhe ke lone lokwalo lwa kgolagano ya Mogodimodimo, Molao o Moše o neng a o re laela, e le bošwa jwa diphuthego tsa ga Jakobe.

₂₄(Lo se ka lwa emisa go nna lo thatafadiwa ke Morena; mo kgomareleng gore a tle a nne a lo thatafatse. Morena o o thatayotlhe ke ene fela e leng Modimo mme ga go na Mmoloki ope fa e se ene fela.)

₂₅Selo se ke sone se se dirang gore botlhale bo tlale mo bathong bo bo bo penologe jaaka noka ya Pishone, jaaka noka ya Tigrise ka nako ya mabutšwapele.

₂₆Ke sone se se dirang gore tlhaloganyo e tlale mo go bone e be e penologe jaaka Eufratese, jaaka Jorodane ka nako ya thobo; ₂₇se eledisa thuto jaaka noka ya Naele, jaaka noka ya Gihone ka nako e go fulwang moretlwa ka yone.

₂₈Motho wa ntlha ga aa ka a bo a kgona go bo tlhaloganya sentle, le fa e le motho wa gompijeno tota ga a ise a bo a bo tshware sentle ka tlhaloganyo; ₂₉gonne dikakanyo tsa jone di atlhame go feta lewatle, le dithulaganyo tsa jone di boteng go feta mateng-teng a a boteng.

₃₀Mme nna, jaaka foro e e tšwang mo nokeng, jaaka mosele o o elelang mo tshingwaneng, ₃₁ke ne ka re, “Ke ya go nosetsa tshimo ya me ya maungo ke batla go nosetsa dirapa tsa me tsa dithunya.” Bona jaanong, foro e atlhame e bile e dule noka, mme noka ya me e fetogile lewatle.

₃₂Jaanong ke tlaa phatsimisa thuto, ke romele lesedi ja yone kgakala gongwe le gongwe.

₃₃Ke tlaa tsholola thuto jaaka pole-lo-pele, gore e nne bošwa jwa dikokomana tsotlhe tse di sa ntseng di tlaa nna di tla.

₃₄Lo lemogeng gore ga ke a itirela ke le nosi fela, ke diretse le botlhe ba ba senkang botlhale.