SIRAKA 23

₁Oh Morena, Rara le Molaodi wa botshelo jwa me, O se ka wa bo wa ntlogelela bolotsana jwa tsone, O se ka wa bo wa dumelela gore di ntige.

₂Kana ruri ke mang yo o ka laolang megopolo ya me a bo a ruta pelo ya me botlhale, a se ka a bo a ntlhomogela pelo fa ke dira phoso, mme a se ka a tlhokomologa dibe dipe tsa me, ₃e se re kgotsa diphoso tsa me tsa nna tsa ntsifala, mme dibe tsa me tsa oketsega, ka bo ka digwa ke bantlhabantshi, mmaba wa me a bo a ja monate kaga me?

₄Oh Morena, Rara le Modimo wa botshelo jwa me, O se ka wa mpha matlho a boikgantsho, ₅O ko O tlose dikeletso tse di bosula mo go nna.

₆O se ka wa dumelela gore ditiro tse di sa siamang le dikeletso tse di fapogileng di mphenye, kgotsa wa ntetlelela go nna le dikeletso tse di ntlhabisang ditlhong.

₇Bana ba me, reetsang thuto e ke batlang go e lo naya, mongwe le mongwe yo o e tshegetsang ga a kitla a tshoganyediwa ke bomadimabe.

₈Moleofi o raelwa ke dipuo tsa gagwe, motho yo o gobololang le yo o ikgogomosang, boobabedi ba digwa ke dipuo tsa bone.

₉O se ka wa itlwaetsa go bua O ikana kgotsa wa nna le mokgwa wa go bitsaka leina la Yo o Boitshepo; ₁₀gonne fela jaaka motlhanka yo o tlholang a lailwe ka go ketekwa o ka se ka a tlhoka mateteelo, motho yo o tlholang a ikanne a bo a bitsaka leina le legolo le ene ga a kake a tlhokisiwa sebe.

₁₁Motho yo o tlholang a nnetse go ikana o tletse boleo, mme sebetso ga se kake sa bo sa tšwa mo tlung ya gagwe. Fa a leofa, sebe sa gagwe se a mo kgomarela, mme fa a ikana ka tlhokomologo, o leofa go menaganye gabedi, fa a ka ikana ka maaka, ga a kake a bo a tšhwarwa jaaka motho yo o se nang molato, mme ntlo ya gagwe e tlaa tlala dipetso.

₁₂Go na le mokgwa wa go bua o o batlang o itšhwanela le go šwa fela, a o se ka wa bonwa mo bošweng jwa ga Jakobe! Gonne basiami ba emela kgakala diphoso tse tsotlhe, ga ba gobuwe mo sebeng.

₁₃O se ka wa tlwaetsa molomo wa gago puo e e makgaphila le e e bosula, gonne puo e e ntseng jalo e leofisa motho.

₁₄O gakologelwe rrago le mmago fa O ntse fa gare ga magosana, e se re kgotsa wa itebala fa O na nabo, mme wa itsaya jaaka lesilo, O bo O tloga O eletsa e kete O ka bo O ne wa se ka wa tsalwa, wa bo wa hutsa letsatsi le O neng wa tsalwa ka lone.

₁₅Motho yo o itlwaeditseng go tlhola a buile mantšwe a a fapogileng o palelwa ke go ikgomarolola mo go one le fa a kabo a tshela nako e telele jang.

₁₆Go na le mefuta e le mebedi ya batho e e ntsifatsang dibe, wa boraro o folosa kgalefo.

₁₇Go na le keletso e e a reng e tutuma jaaka sebeso e be e ka se ka ya be ya tingwa go fitlhelela e itumedisiwa. Go na le motho yo a tleng a eletse wa losika lwa gagwe, mme yo a tleng a se ke a bo a tlogele go fitlhelela molelo o mo fetsa; motho yo o ratang thobalo o natefelelwa ke dijo tsotlhe, mme ga di nke di mo lapisa go fitlhelela a bo a swa.

₁₈Motho yo o tlhanogelang maikano a gagwe a nyalo o bua ka pelo a re; “Ke mang yo o ka mponang? ke bipilwe ke lefifi, dipota di mphitlhile, ga go na ope yo o mponang, ke tlaa bo ke boifa eng? Mogodimodimo ga a kitla a lemoga sebe sa me!” O tshaba go bonwa ke batho fela.

₁₉Ga a lemoge gore matlho a Morena a bogale go feta letsatsi go le dikete tse some, a lebeletse ditsela tsotlhe tsa maitseo a batho a bona dikgokgotšhwane tse di fitlhegileng gotlhelele.

₂₀O itse dilo tsotlhe di ise di bopiwe, mme o ntse a di itse le jaanong jaana di ntse di fedile.

₂₁Motho yo o tlaa otlhaelwa mo mananeng a motse, a phamolwe a sa lebelela.

₂₂Go ntse fela jalo ka mosadi yo o tlogelang monna wa gagwe a bo a ya go mo direla mojabošwa le monna yo mongwe: ₂₃sa ntlha, o tlodile molao wa Mogodimodimo; sa bobedi o leofetse monna wa gagwe; sa boraro o dirile boaka mme a dira bana le monna yo mongwe.

₂₄O tlaa tsisiwa fa pele ga phuthego mme a botsolodiwa kaga bana ba gagwe.

₂₅Bana ba gagwe ga ba na go tlhomama gope, mme dikala tsa gagwe ga di kitla di ungwa maungo ape.

₂₆O tlaa sala a gakologelwa ka go hutsiwa, ditlhong tsa gagwe ga di kitla di be di lebalwa.

₂₇Mme botlhe ba ba tlaa salang ba tshela morago ga gagwe ba tlaa lemoga gore ga go na sepe se se botoka go na le go boifa Morena, le gore ga go na sepe se se monate go feta go kgomarela melao ya Morena.