SIRAKA 21

₁Morwaaka, a O leofile? O se ka wa leofa gape, mme O kopele melato ya gago e e fetileng boitšhwarelo.

₂O tshabe sebe fela jaaka O tshaba noga, fa O se atamela, se tlaa go loma; meno a sone a tšhwana le a tau, a amoga batho botshelo.

₃Go roba molao gongwe le gongwe go tšhwana le tšhaka e e magale mabedi, dintho tse go di go ntshang ga di alafesege.

₄Letshogo le pheretlhego di senya matlo a bahumi, matlo a moikgogomosi le one a senyega fela jalo.

₅Thapelo e e tšwang mo molomong wa mohumanegi e tlhamalalela kwa tsebeng ya Modimo, o katlholo ya one e sa diegeng go tla.

₆Mongwe le mongwe yo o sa batleng go kgalemelwa o tsamaya mo metlhaleng ya moleofi; motho yo o boifang Morena o na le boikwatlhao mo pelong ya gagwe.

₇Motho yo o balabalang o itsege kgakalakgakala, fela fa a dira phoso motho yo o nang le tlhaloganyo o lemoga selo seo.

₈Go aga ntlo ka madi a batho ba bangwe go tšhwana le go kgobokanyetsa lebitla la gago maje.

₉Pitso ya baikepi e tšhwana le mokowa wa maudi, ba tla feleletsa ka molelo o o tutumang.

₁₀Tsela ya moleofi e phaphathilwe borethe, fela e felela mo khuting ya bobipo.

₁₁Mongwe le mongwe yo o bolokang molao o laola maikutlo a gagwe. Botlhale bo diragatsa poifo ya Morena sentle.

₁₂Motho yo o se nang tlhaloganyo ga a kake a bo a rutwa, fela go tlhaloganyo nngwe e e ka nnang ya oketsa maikutlo a a botlhoko a motho.

₁₃Kitso ya motho yo o botlhale e tlaa nna e oketsega jaaka morwalela, mme kgakololo ya gagwe e tšhwana le motšwedi o o tshelang.

₁₄Pelo ya seeleele e tšhwana le nkgo e e thubegileng, ga e kake ya tshegetsa kitso epe.

₁₅Motho yo o rutegileng fa a utlwa puo nngwe e e botlhale o a e boka, a bo a e tlhatlhaganyetsa ka e nngwe; fela seramatla sone fa se e utlwa se a e tshega, a bo a e kolopela kwa morago.

₁₆Puo ya seeleele e tšhwana le mokgweleo mo loetong, fela go monate go reetsa motho yo o nang le tlhaloganyo.

₁₇Batho mo phuthegong ba letela puo ya motho yo o botlhajana ka tlhwaafalo; se a se buang se tlaa akanngwa ka kelotlhoko.

₁₈Botlhale jwa sematla bo tšhwana le letlotla la ntlo, kitso ya seramatla ke puo e e sa tlhaloganyesegeng.

₁₉Motho yo o se nang tlhaloganyo o bona thuto e tšhwana le mokao o o kaileng maoto a gagwe; e tšhwana le dikgole tse di bofileng letsogo la gagwe le le siameng.

₂₀Seeleele se tshegela kwa godimo, fela motho yo o botlhale o tshegela kwa tlase, a nyenya fela;

₂₁Motho yo o botlhajana o bona thuto e tshwana le mokgabo wa gouta; e tshwana le leseka mo letsogong la gagwe le le siameng.

₂₂Lonao lwa seeleele lo gatlhamela fela mo tlung, fela motho yo o itseng dilo o e atamela ka maitseo.

₂₃Motho yo o setlaela o okomela mo teng ga ntlo ka setšwalo, fela motho yo o maitseo o ema ka kwa ntle.

₂₄Go reetsaka mo dipating ke sesupo sa kgodiso e e mašwe, motho yo o tlhoko o ka tlhabiwa ke ditlhong go dira jalo.

₂₅Melomo e e ratang go seba e bua tse ba bangwe ba di buileng, mme mafoko a batho ba ba botlhale a lekanngwa ka kelotlhoko.

₂₆Pelo ya dimatla e senolwa ka mafoko a tsone; mme mafoko a batlhalefi a senola dipelo tsa bone.

₂₇Fa moikepi a hutsa mmaba wa gagwe o a bo a ikhutsa.

₂₈Motho yo o ratang ditshebo o tlatsa moya wa gagwe lešwe, a bo a itlhoisa bakaulengwe ba gagwe.