DIPESALEME 85

₂Morena, o utlwetse

lefatshe la gago botlhoko,

wa fetola tatlhego ya Jakobe.

₃O itshwaretse molato

wa morafe wa gago,

wa bipa maleo otlhe a bona. Sela.

₄O tlositse kgakalo yotlhe ya gago,

wa boa mo bogaleng jwa gago

jo bo tukang.

₅Re tlhabolole,

Modimo wa pholoso ya rona,

o khutlise kgakalo ya gago

mo go rona.

₆A o tla re galefela

ka bosakhutleng,

a bogale jwa gago

o tla bo tsweletsa pele

go ya tshikatshikeng?

₇A ga o kitla o re phedisa gape

gore batho ba gago

ba go itumelele?

₈Re bontshe bopelotlhomogi

jwa gago, Morena,

o re nee pholoso ya gago.

₉Ke rata go utlwa se Morena,

Modimo, o tla se buang;

gonne batho ba ona,

e bong baratiwa ba ona,

ruri, o tla bua nabo tsa kagiso.

Fela a ba se boele gape

kwa bosilong.

₁₀Kana pholoso ya ona

e gaufi le ba ba o boifang

gore kgalalelo e age

mo lefatsheng la rona.

₁₁Bopelontle le boammaaruri

di a kgatlhana;

tshiamo le kagiso di a atlana.

₁₂Boammaaruri

bo tlhoga mo lefatsheng;

tshiamo e lebile kwa tlase

e le kwa legodimong.

₁₃Le gona Morena o tla naya

se se molemo,

lefatshe la rona

le tla ntsha leungo la lone.

₁₄Tshiamo e mo eteletse pele,

e tlhokometse tsela

ya dikgato tsa gagwe.