DIPESALEME 83

₂Modimo, se tlhokomologe,

se didimale,

se nne fela, Modimo!

₃Gonne, bona,

baba ba gago ba a feretlha;

ba ba go tlhoileng

ba tsholetsa ditlhogo.

₄Ba logela batho ba gago

maano a bolotsana,

ba gakololana

ka ga ba o ba sireletsang.

₅Ba re: “Tlayang, a re ba nyeletseng

gore ba se tlhole ba nna morafe

le gore leina la Iseraele

le se tlhole le gopolwa.”

₆Ba gakololanye

ka bongwefela jwa pelo,

ba go ikgolaganyetsa:

₇E bong ba ditente tsa Etomo

le Baisemaele

le Bamoabe le Bahagare

₈le ba Gebale le Baamone

le Baamaleke le Bafelesita

mmogo le baagi ba Tiro;

₉Baasiria le bona ba ikopantse nabo,

ba thusa boora Lote. Sela.

₁₀Ba direle jaaka o kile wa direla

Bamidiane le Sisera

le Jabine fa nokeng ya Kisone.

₁₁Ba nyeleditswe kwa Entore,

ba tswa letshotelo la tshimo.

₁₂Dira batlotlegi ba bona

gore ba nne jaaka Orebe le Seebe

le dikgosana tsa bona

jaaka Seba le Salemuna

₁₃tse di reng:

“A re ithopeleng

maago a Modimo.”

₁₄Modimo wa me,

ba dire jaaka matlakala

le jaaka moko

o o gogolwang ke phefo.

₁₅Molelo o fisa sekgwa

le kgabo ya molelo

e tshuba dithaba:

₁₆Ba leleke jalo ka ledimo la gago,

o ba boifise jalo

ka kgwanyape ya gago.

₁₇Tlatsa difatlhego tsa bona ditlhong

gore ba batle leina la gago,

Morena.

₁₈A ba tlhajwe ke ditlhong,

ba boife ka go sa feleng.

A ba setlhafale ka ditlhong,

ba latlhege

₁₉gore ba lemoge,

fa wena yo o bidiwang Morena

ò le Mogodimodimo

ò le wesi o ò okameng lefatshe

lotlhe.