DIPESALEME 8

₂Morena, Mmusi wa rona,

leina la gago le galalela jang

mo lefatsheng lotlhe,

wena yo borena jwa gago

bo opelelwang kwa legodimong!

₃O itiretse tumiso e kgolo,

e tswa mo melomong ya bana

le ya masea,

ka ntlha ya baganetsi ba gago,

gore o didimatse baba

le baipusolosetsi.

₄Fa ke lebile magodimo a gago,

tiro ya menwana ya gago

le ngwedi le dinaledi

tse o di tlhomileng –

₅kana motho ke eng,

fa o mo gopotse,

ngwana wa motho ke eng,

fa o mmabalela?

₆O mo tlhaedisitse baengele

go le gonnye fela,

wa mo rwesa kgalalelo le bontle.

₇O mo dirile molaodi

wa ditiro tsa diatla tsa gago;

o beile dilo tsotlhe

fa tlase ga dinao tsa gagwe,

₈tsotlhe, dinku le dikgomo,

le tsona diphologolo tsa naga,

₉dinonyane tsa loapi

le ditlhapi tsa lewatle,

le fa e le eng se se ralalang lewatle

ka ditsela tsa lone.

₁₀Morena, Mmusi wa rona,

kana leina la gago le galalela jang

mo lefatsheng lotlhe!