DIPESALEME 76

₂Modimo o itsiwe mo Juta;

leina la ona le legolo mo Iseraele.

₃Ee, motlaagana wa ona

o mo Saleme,

le boago jwa ona mo Sione.

₄O robakile metsu-seka-ditladi

ya bora teng,

le thebe le tšhaka le tsa ntwa. Sela.

₅O a phatsima, o a galalela,

o tswa kwa dithabeng tsa thopo.

₆Dinatla tse di pelokgale

di thopetswe,

di gateletswe ke boroko,

bagale botlhe ba repile diatla.

₇Modimo wa ga Jakobe,

koloi ya ntwa le pitse

di tserwe ke madiopo ka kgalemelo

ya gago.

₈Wena o yo o boitshegang;

ke mang yo o ka emang

fa pele ga gago,

fa bogale jwa gago bo tuka?

₉O ne wa utlwatsa katlholo

go tswa kwa legodimong;

lefatshe la tshoga, la didimala,

₁₀fa Modimo o ema go atlhola

gore o thuse botlhe ba ba pelonolo

ba lefatshe. Sela.

₁₁Gonne bogale jwa motho

bo a go tlotla,

o itlama ka bogale jo bo setseng.

₁₂Ikaneleng Morena,

Modimo wa lona,

lo o lefele maikano.

A botlhe ba ba o dikanyeditseng

ba tsisetse ona o o tshabegang

dineo,

₁₃o o kokobetsang boikgantsho

jwa dikgosana,

o o tshabegang mo dikgosing

tsa lefatshe.