DIPESALEME 7

₂Morena, Modimo wa me,

ke tshabela kwa go wena;

nkgolola mo bapatiking botlhe

ba me, o mpholose,

₃e se re gongwe ba nkgagola

jaaka tau,

ba mphamola

go se ope yo o gololang.

₄Morena, Modimo wa me,

fa ke dirile jalo,

fa go na le tshiamololo

mo diatleng tsa me,

₅fa ene yo o nang a na le kagiso

le nna

ke mo diretse bosula;

fa ke senyeditse ene yo o neng

a le moganetsi wa me ka bomo;

₆fa go ntse jalo, a mmaba a nteleke,

a ntshware,

a gatakele bophelo jwa me

mo mmung,

tlotlo ya me a e latse mo leroleng.

Sela.

₇Morena,

tloga o eme mo bogaleng jwa gago,

bololela baganetsi ba me

ba ba nkgakaletseng,

o tsoge ka ntlha ya me,

wena yo o laotseng katlholo.

₈A phuthego ya merafe

e go dikanyeletse,

o boele kwa godimo, o ba okame.

₉Morena, o atlhola merafe.

Morena, ntshiamisetse

ka fa tshiamong ya me

le ka fa ke se nang molato ka teng.

₁₀Dira gore boikepo jwa baikepi

bo khutle!

Tlhomamisa mosiami,

wena yo o lekang dipelo le diphilo,

wena Modimo o o siameng.

₁₁Thebe ya me e mo Modimong

o o thusang

ba ba dipelo di boammaaruri.

₁₂Modimo ke moatlhodi

yo o siameng,

e bile ke Modimo o o galefang

ka letsatsi le letsatsi.

₁₃Fa motho a sa sokologe,

o lootsa tšhaka ya ona,

o gagamatsa bora jwa ona,

o supa ka jona;

₁₄o mmaakanyeditse dibolai tsa loso,

o dira metsu ya ona

go nna e e tukang.

₁₅Bonang, motho yoo

o nna moimana ka boikepo,

o ithwele tshiamololo,

o tsala maaka.

₁₆O epile lemena, a le gaba;

mme o wetse mo gopong

e o e dirileng.

₁₇Tshenyo ya gagwe

e boela tlhogong ya gagwe,

le go thubaka ga gagwe

go wela mo phogong ya gagwe.

₁₈Ke tla baka Morena

ka ntlha ya tshiamo ya gagwe,

ke opelela leina la Morena

Mogodimodimo.