DIPESALEME 64

₂Modimo, utlwa lentswe la me,

fa ke lela;

boloka bophelo jwa me,

fa ke tshosiwa ke mmaba.

₃Mphitlhe ke fitlhegele maikaelelo

a basulatsi le pheretlhego

ya badiratshiamololo;

₄ba ba looditseng diteme tsa bona

jaaka ditšhaka

ba supile ka metsu ya bona,

e bong mafoko a a galakang,

₅go hula mosiami ba mo laletse,

ba mo hula ka tshoganyetso,

ba sa boife.

₆Ba ikaeletse go dirafatsa maano

a a bosula,

ba bolela go thaisa ka mitlwane

e e subilweng ba re:

“Go tla bona mang?”

₇Ba akanya boikepo ba re:

“Re sweditse,

re logile maano a mantle.”

Mogopolo wa motho o botengteng,

le pelo ke lengôpe.

₈Mme Modimo o tla ba hula

ka motsu;

dipetso tsa bona di tla tla

ka tshoganyetso.

₉Ba tla digwa ke diteme tsa bona;

botlhe ba ba ba lebileng

ba thukhutha ditlhogo.

₁₀Mme batho botlhe ba tla boifa,

ba bolela tiro ya Modimo,

ba tlhokomela se o se dirang.

₁₁Mosiami o tla itumela

mo Moreneng,

a batla botshabelo fa go ena;

mme botlhe ba ba dipelo

di tlhamaletseng

ba tla itumisa ka Morena.