DIPESALEME 2

₁Kana merafe e huduelang,

ditšhaba di akanyetsang

dilo tsa boithamako?

₂Dikgosi tsa lefatshe

di a ikemisa le babusi

ba nnela go logisanya maano

a go lwa le Morena

le Motlodiwa wa gagwe ba re:

₃“A re kgaoleng dikgole tsa bone,

megala ya bone re e tlose

mo go rona, re e latlhe!”

₄Ene yo o agileng mo legodimong

o a tshega,

Morena o a ba sotla.

₅Foo o tla bua nabo

ka bogale jwa gagwe,

o tla ba tshosa

ka kgakalo ya gagwe:

₆“Mme nna, kana ke tlhomile kgosi

ya me mo Sione,

mo thabeng ya me e e boitshepo!”

₇Ke rata go bolela

ka ga maikaelelo a Morena.

O ntheile a re: “O morwaake,

ke go tsetse kajeno.

₈Lopa mo go nna,

mme ke tla go naya merafe

go nna boswa jwa gago,

le dikhutlo tsa lefatshe

go nna leruo la gago.

₉O tla ba robaganya

ka thobane ya tshipi;

o tla ba thubaganya

jaaka sejana sa letsopa.”

₁₀Ka moo he, tlhalefang,

lona dikgosi;

tlhagisiwang,

lona baatlhodi ba lefatshe.

₁₁Direlang Morena ka poifo,

lo duduetse ka thoromo.

₁₂Atlang Morwa

gore a se ka a gakala,

mme lwa latlhega mo tseleng.

Gonne bogale jwa gagwe

bo ka akofa jwa tuka.

Go sego bona botlhe

ba ba mo ikanyang.