DIANE 9

₁Botlhale bo agile ntlo ya jona, jwa emisa maotwana a yona a supa, ₂jwa tlhaba dikgomo tsa jona, jwa tlhakanya weine ya jona, jwa baakanya lomati lwa bojelo lwa jona, ₃jwa roma basetsana ba jona, ba laletsa ba le fa mebotong e e okameng motse ba re: ₄“Yo o sa tlhalefang, a a tle kwano!” Yo o se nang tlhaloganyo bo mo raya bo re: ₅“Tlayang lo je dijo tsa me, lo nwe weine e ke e tlhakantseng! ₆Tlogelang bosilo gore lo phele; lo sepele mo tseleng ya tlhaloganyo.”

₇Yo o kgalemelang mosotli o iponna ditlhong fela; yo o bolelelang moikepi nnete o itshela sebala sa gagwe. ₈Se kgalemele mosotli, e se re gongwe a go tlhoa; kgalemela yo o botlhale, o tla go rata. ₉Naya yo o botlhale, o tla tlhalefela pele; ruta mosiami, o tla rutegela pele.

₁₀Tshimologo ya botlhale ke go boifa Morena; go itse Moitshepi ke yona tlhaloganyo. ₁₁Gonne malatsi a gago a tla ntsifala ka nna; o tla okelediwa dinyaga tsa bophelo ke nna. ₁₂Fa o le botlhale, o tla thusega ka jona; fa o sotlile o tla rwala molato o le wesi.

₁₃Mosadi yo o bidiwang Bosilo o a tlhodia, o a raela; ga a itse ditlhong. ₁₄O ntse fa mojakong wa ntlo ya gagwe mo sedulong kwa mebotong ya motse ₁₅gore a laletse ba ba fetang mo tseleng, ba ba tlhamaletseng mo ditselaneng tsa bone, a re: ₁₆“Yo o sa tlhalefang a a tle kwano!” Yo o se nang tlhaloganyo a mo raya a re: ₁₇“Metsi a a utswitsweng a monate; senkgwe sa sephiri se a natefa.” ₁₈Mme yo o sa tlhalefang ga a itse fa baswi ba le gona; fa ba ba laleditsweng ke ene Bosilo ba le kwa matennye a felo ga baswi.