DIANE 8

₁A botlhale ga bo kue?

A tlhaloganyo ga e tlhatlose

lentswe la yona?

₂Bo eme mo mebotong

e e okameng tsela

le mo makgabaganong

a ditselana.

₃Bo kua fa thoko

ga dikgoro tsa motse;

fa pele ga dikgorwana

bo kuela godimo bo re:

₄“Heelang banna!

Ke bitsa lona;

lentswe la me le raya lona

bana ba batho.

₅Lona ba lo sa tlhalefang

ithuteng botlhale;

lona masilo,

ithuteng tlhaloganyo!

₆Utlwang, gonne ke tla bolela

dikgang tota,

ke tumolola molomo

go bua tse di siameng.

₇Ee, magalapa a me

a bua nnete,

mme dipuo tsa boikepo

ke maila mo go nna.

₈Mafoko otlhe a molomo

wa me a siame;

ga go na bolotsana

le fa e le tshokamo mo go ona.

₉A utlwala sentle fela otlhe

mo go yo o a tlhaloganyang;

yo o bonyeng kitso a re:

Ke a nnete.

₁₀Amogelang kgalemelo ya me,

mme e seng selefera;

le kitso bogolo go gouta

e e tlhaotsweng.

₁₁Gonne botlhale bo molemo

bogolo go dibaga tsa korale;

dilo tse dintle tsotlhe

ga di lekane najo.

₁₂Nna Botlhale ke tlwaelanye

le Tlhaloganyo;

kitso le kelelelo ke na natso.

₁₃Go boifa Morena

ke go ila bosula.

Ke tlhoile boikgogomoso

le boikgodiso

le tsamao e e bosula

le molomo o o bolotsana.

₁₄Kgakololo le botswerere

di mo go nna;

ke na le kutlwisiso le thata.

₁₅Dikgosi di busa ka nna;

beng ba thata ba baya melao

e e siameng ka nna.

₁₆Dikgosana di laola ka nna,

le batlotlegi le baatlhodi

botlhe ba lefatshe.

₁₇Ke rata ba ba nthatang;

ba ba mpatlang ka tlhoafalo

ba tla mpona.

₁₈Khumo le tlotlo di mo go nna

le leruo le le tlhomameng

le tshiamo.

₁₉Leungo la me le gaisa gouta,

ee, gouta e e itshekileng;

se ke se ruisang motho

se phala selefera

e e tlhaotsweng.

₂₀Ke sepela mo tseleng

ya tshiamo,

ke tsamaya ditselana

tsa molao fa gare

₂₁gore ke jese banthati

boswa jo bo tlhomameng,

ke ba tlaletse matlo

a mahumo.

₂₂Morena o ntirile

mo tshimologong

ya ditsela tsa gagwe,

ka nna wa ntlha wa ditiro

tsa gagwe bogologolo.

₂₃Ke sa le ke tlholwa kgale

mo tshimologong

pele ga metlha ya lefatshe.

₂₄E rile go se na mawatle,

go se na metswedi

e e tletseng metsi, ka tsalwa.

₂₅Ya re dithaba di ise di theiwe,

dithota di ise di nne teng,

ka tsalwa.

₂₆Ke fa Morena a ise a dire

lefatshe le dinaga

le fa e le tshimologo

ya mebu ya lefatshe.

₂₇Ya re a ala legodimo,

ka bo ke le gona;

ya re a tlhoma tikologo

ya loapi

mo godimo ga mawatle

₂₈ya re a bofelela maru

kwa godimo,

ya re a tswedisa metswedi

ya mawatle thata,

₂₉ya re a beela lewatle

molelwane wa lone

gore metsi a se ka a tlola taolo

ya gagwe

ya re a baya metheo

ya lefatshe,

₃₀ka bo ke na nae ke le ngwana

ka itumela ka letsatsi

le letsatsi,

ka nna ka tshameka fa pele

ga gagwe ka metlha yotlhe.

₃₁Ka tshanoka mo tikologong

ya lefatshe la gagwe,

ka itumelela baba ba batho.

₃₂Ka moo he, nkutlweng,

bomorwaaka;

go tlhogonolo ba ba sepelang

mo ditseleng tsa me.

₃₃Utlwang thuto, lo tlhalefe;

lo se ka lwa e tlhokomologa.

₃₄Go sego motho yo o nkutlwang,

a leta fa dikgorong tsa me

ka malatsi otlhe,

a disa mepakwana

ya mejako ya me.

₃₅Gonne yo o mponang

o bona bophelo,

a itumelelwa ke Morena.

₃₆Mme yo o mphosang

o a itshenyetsa ka esi;

botlhe ba ba ntlhoileng

ba rata loso.”