DIANE 6

₁Ngwanaka, fa o ipofile wa re, ke tla lefa molato wa mongwe-ka-nna; fa o ipofile ka go neelana diatla le moeng, ₂fa o itlamile ka mafoko a molomo wa gago; fa o tshwerwe ka dipolelo tsa molomo wa gago, ₃dira jaana, ngwanaka gore o ikgolole, gonne o wetse mo diatleng tsa mongwe-ka-wena: Yaa o ikokobetse, o kokotlele mongwe-ka-wena thata! ₄Tima matlho a gago boroko, se dumelele dintshi tsa gago go otsela. ₅O falole jaaka phudufudu mo seatleng sa motsomi le jaaka nonyane mo seatleng sa mothaisi wa yona.

₆Motlapa, yaa kwa tshoswaneng, o bone mekgwa ya yona, o tlhalefe! ₇Le fa e se na kgosana le e seng mokwaledi gongwe molaodi, ₈e etleetsa dijo tsa yona selemo, e kgobokanya dijo tsa yona fa go kotulwa. ₉Wena setshwakga, o tla robala go fitlha leng? O tla tsoga leng mo borokong? ₁₀O a re: “Ke ya go robala go le gonnye, ke otsela go le gonnye, ke phutha diatla go le gonnye go ikhutsa.” ₁₁Mme khumanego ya gago e tla tla jaaka senokwane le lehuma la gago jaaka motlhabani.

₁₂Yo o tsamayang ka bolotsana jwa molomo ke motho yo o se nang mosola; ga se monna wa sepe. ₁₃O gwetlha ka matlho, a bontshe ka maoto, a supe ka menwana, ₁₄a loge maano a bolotsana mo pelong ya gagwe a a bosula ka metlha yotlhe, a lotlhanye batho. ₁₅Ene yoo tatlhego e tla mo wela ka tshoganyetso, o tla pšhwetlwa ka ponyo ya leitlho, go se na se se ka mo thusang.

₁₆Dilo di le thataro Morena o di tlhoile, tse supa ke maila mo go ene:

₂₀Ngwanaka, boloka taolo ya ga rraago; se latlhe thuto ya ga mmaago. ₂₁Di golegelele mo pelong ya gago ka metlha, o di apare mo molaleng wa gago. ₂₂A di go pate, fa o tsamaya; di go sireletse, fa o robala; di bue nao, fa o thanya. ₂₃Gonne taolo ke lobone, thuto ke lesedi; dikgalemelo tsa thuto ke tsela ya bophelo ₂₄gore di go thibose mo mosading yo o bosula le mo boretheng jwa loleme lwa mosadi wa yo mongwe. ₂₅Se eletse bontle jwa gagwe ka pelo ya gago; le gona a a se ka a go gapa ka dintshi tsa matlho a gagwe. ₂₆Gonne mosadi wa seaka o humanegisa motho, mme mosadi wa monna yo mongwe o tsoma bophelo jo bo rategang.

₂₇A motho o ka lokela molelo mo kgwatlheng ya gagwe, diaparo tsa gagwe di sa šwe? ₂₈Gongwe a motho o ka gata magala, mme a se ka a šwa dinao? ₂₉Yo o tsenang kwa mosading wa mongwe-ka-ene o ntse jalo; mongwe le mongwe yo o mo amang ga a ka ke a falola mo petsong. ₃₀Legodu ga le nyatsege, fa le utswa gore le kgorise keletso ya lone, fa le bolawa ke tlala. ₃₁Fa le tshwarwa, le ka lefa gasupa; le ka ntsha dithoto tsotlhe tsa ntlo ya lone. ₃₂Mme yo o senyang nyalo le mosadi o sele o a tsenwa; go dira ene fela yo o ratang go itshenyetsa bophelo. ₃₃O tla kgwatha ka ditlhong; nyatsego ya gagwe ke e e sa phimolweng. ₃₄Gonne fa bogale jwa monna e le jwa lefufa, ga a kitla a rekegela ka letsatsi la pusoloso; ₃₅ga a nke a go itshwarela, le fa o ntsha tefa; ga a nke a diga pelo, le fa o ntsha dineo tse dintsi.