DIANE 1

₁Diane tsa ga Salomo morwa Dafita, kgosi ya Iseraele. ₂Ke tsa go itse botlhale le ngwao, tsa go tlhaloganya mafoko a temogo ₃gore motho a amogele tlhagiso e e tlhalefisang le tshiamo le molao le tsa nnete ₄gore ba ba iseng ba tlhalefe ba newe thuto, makau a newe kitso le kelelelo – ₅Yo o botlhale o tla di utlwa, a ba a okelediwa kitso; yo o fatlhogileng o tla bona dikgakologelo tse di molemo – ₆gore a tlhaloganye diane le ditshwantsho le mafoko a ba ba botlhale le dinyepo tsa bone.

₇Go boifa Morena ke tshimologo ya kitso. Masilo a nyatsa botlhale le maitsholo.

₈Morwaaka, utlwa taelo ya ga rraago; se tlhokomologe thuto ya ga mmaago! ₉Gonne tsona ke serwalo se sentle mo tlhogong ya gago le sebaga sa mokgabo mo molaleng wa gago.

₁₀Morwaaka, fa baleofi ba go raela, o gane. ₁₁Fa ba re: “Tlaya le rona, re lalele motho go tsholola madi, re ratele go bolaya yo o se nang molato ka bomo; ₁₂re metse ba ba phelang jaaka felo ga baswi le ba ba itekanetseng jaaka ba ba fologelang kwa lebitleng. ₁₃Re tla bona dithoto tsa mefutafuta tsa tlhwatlhwa e kgolo; re tla tlatsa matlo a rona ka thopo. ₁₄Utlwana le rona! Re tla tlhakanela kgetsana ya madi mmogo.”

₁₅Morwaaka, se tsamae nabo mo tseleng! Iletsa dinao tsa gago ditselana tsa bone! ₁₆Gonne maoto a bone a sianna kwa bosuleng, a itlhaganelela go tsholola madi. ₁₇Ee, letloa le le thaisang dinonyane tsa mefutafuta fa pele ga matlho a tsona le alelwa lefela. ₁₈Mme bone bao ba lalela madi a bone ka bosi, ba batla go itshenyetsa maphelo ka bosi. ₁₉Ke tsona ditsela tsa botlhe ba ba batlang kgwebo ya tshiamololo: yona e tla amoga beng ba yona bophelo.

₂₀Botlhale bo kuela godimo mo mebileng; bo utlwatsa lentswe la jona mo dipatlelong. ₂₁Bo tlhaba mokgosi bo le mo godimo ga dipota; bo bolela mafoko a jona mo mejakong ya dikgoro tsa motse:

₂₂Bo re: “Lona ba lo sa tlhalefang lo tla rata go se tlhalefe go fitlha leng? Basotli ba tla khutla leng go kgatlhwa ke ditshotlo? Masilo a tla lesa leng go tlhoa kitso? ₂₃Retologelang kwa kgalemelong ya me! Bonang, ke tla lo ntshetsa mowa wa me, ke lo itsise mafoko a me. ₂₄E re ka ke biditse, mme lwa gana; ke otlolotse letsogo, mme ga se ka ga tlhokomela ope; ₂₅ka lo tlhokomologile kgakololo ya me yotlhe, mme lwa se ka lwa rata kgalemelo ya me: ₂₆Ka moo le nna ke tla tshega tatlhego ya lona, ke sotla, fa lo tlelwa ke therego; ₂₇fa therego e lo tlela jaaka tumo ya maru, fa tatlhego ya lona e tla jaaka ledimo, fa tlalelo le pitlaganyo di lo wela. ₂₈Foo ba tla mpitsa, mme ga nke ke araba; ba tla mpatla, mme ga ba nke ba mpona. ₂₉E re ka ba tlhoile kitso, ba se ka ba itlhaolela go boifa Morena; ₃₀ka ba se ka ba rata kgakololo ya me, mme ba nyatsa kgalemelo ya me yotlhe: ₃₁Ke ka moo ba tshwanetseng go bolawa ke se ba se jeleng, le go kgora bosula jwa maano a ba a logileng. ₃₂Gonne boikepo jwa ba ba sa tlhalefang bo a ba bolaya; go se kgathale sepe ga dieleele go di isa mo tatlhegong. ₃₃Mme yo o nkutlwang o tla nna mo tshireletsong; o tla bo a iketlile a sa boife bosula.”