Baiseraele ba fenya Bamidiane le go ipusolosetsa mo go bone
1Morena a ba a raya Moše a re: 2“Busolosetsa Baiseraele mo go Bamidiane; morago ga moo o tla gorosiwa kwa morafeng wa ga eno.”
3Moše a bua le morafe a re: “A banna bangwe ba lona ba tlhomele gore ba bololele Bamidiane go dirafatsa pusoloso ya Morena mo go bone. 4Ntshang banna ba le kete mo lotsong longwe le longwe lwa Iseraele, lo ba romele kwa ntweng.”
5Jaanong ga ntshiwa ba le kete mo lotsong longwe le longwe mo diketeng tsa Iseraele, ba nna 12 000 ba ba tlhomeletseng ntwa. 6Moše a ba romela kwa ntweng, e le ba kete ba lotso longwe le longwe mmogo le Phinehase, morwa moperesiti Eleasare; a tshotse dilwana tsa Felo-ga-Boitshepo le diphala tsa go tlhaba mokgosi wa ntwa. 7Jaanong ba bololela Bamidiane jaaka Morena a laetse Moše, ba bolaya ba batonanyana botlhe. 8Mo go ba ba bolailweng go ne go le dikgosi tsa Bamidiane, e bong Ewi le Rekeme le Sure le Hure le Reba, dikgosi tse tlhano tsa Bamidiane. Le Bileame morwa Beore ba mmolaya ka tšhaka.
9Baiseraele ba isa basadi ba Bamidiane le bana ba bone mo botshwarong, ba thopa matlhape otlhe a bone le diruiwa tsotlhe tsa bone le khumo yotlhe ya bone. 10Mme metse yotlhe ya bone, kwa ba nnang teng le mathibelelo otlhe a ditente tsa bone ba di fisa ka molelo. 11Ba be ba tsaya thukhutho yotlhe le thopo ya batho le ya diruiwa, 12ba isa batshwarwi le thopo le thukhutho kwa go Moše le moperesiti Eleasare le kwa phuthegong yotlhe ya Baiseraele kwa bothibelelong mo mabaleng a Moabe a a gaufi le Joretane go lebagana le Jerigo.
Mephato ya Baiseraele e a boa
13Mme Moše le moperesiti Eleasare le bagolo botlhe ba phuthego ba tswa go ya go ba kgatlhantsha kwa ntle ga bothibelelo. 14Ke fa Moše a galefela ditlhogo tsa mephato, e bong balaodi ba kete le balaodi ba makgolo ba ba tswang go boa kwa ntweng. 15Moše a ba botsa a re: “Lo ne lo lesetsang basadi go phela? 16Kana ke bone ba ba neng ba raela Baiseraele, ba gakolotswe ke Bileame go tlhanogela Morena ka boikanyologo ka ntlha ya ga Baale-Pheore, mo petso e bileng ya wela phuthego ya Morena. 17Jaanong he, bolayang ba batonanyana botlhe mo baneng; le gona lo bolae basadi botlhe ba ba itseng monna ka go mo alela dikobo. 18Mme bana botlhe ba basetsana, ba monna a iseng a robale le bone, lo ba lese ba phele, e nne ba lona. 19Lona ka losi thibelelang kwa ntle ga bothibelelo malatsi a supa; lotlhe ba lo bolaileng motho, lotlhe ba lo amileng ba ba bolailweng, tlhapang maleo ka letsatsi la boraro le ka letsatsi la bosupa, lona le ba lo ba tshwereng. 20Le gona lo itshekise diaparo tsotlhe le dilo tsotlhe tsa matlalo le tsotlhe tse di dirilweng ka boboa jwa dipodi le dilwana tsotlhe tsa logong.”
21Mme moperesiti Eleasare a raya banna ba mephato ba ba neng ba ile kwa ntweng a re: “Tshwanelo ya molao o Morena a o laetseng Moše ke e: 22Gouta le selefera le kgotlho le tshipi le thini le llota, 23e bong dilo tsotlhe tse di sa senngweng ke molelo, lo di ralatseng molelo; foo di tla itsheka; fela a di itshekisiwe ka metsi a a tlhatswang itshekologo. Mme tsotlhe tse di ka senngwang ke molelo lo di ralatseng metsi. 24Lo be lo tlhatswe diaparo tsa lona ka letsatsi la bosupa, foo lo tla itsheka. Morago ga moo lo ka tsena mo bothibelelong.”
Thopo e a kgaoganngwa
25Morena a ba a raya Moše a re: 26“Tsaya palo e e tletseng ya batho ba ba tshwerweng le ya diruiwa tse di thopilweng, wena le moperesiti Eleasare le ditlhogo tsa dikgotla tsa phuthego. 27O be o kgaoganye thopo: Bontlhanngwe o bo nee batlhabani ba ba tswang kwa ntweng, bontlhanngwe o bo nee phuthego yotlhe. 28O be o ntshise batlhabani ba ba tswang kwa ntweng lekgetho la Morena la bongwe mo makgolong a matlhano la batho le la dikgomo le la diesele le la difutshane. 29O le tsee mo bontlhanngweng jwa bone, o le neele moperesiti Eleasare, e le lekgetho la Morena. 30Mme mo bontlhanngweng jwa Baiseraele o tsee bongwe, bo ntshiwe mo masomeng a matlhano mangwe le mangwe a batho le a dikgomo le a diesele le a difutshane le a diruiwa tsotlhe, o bo neele Balefi ba ba tlhokomelang tirelo ya Tempelana ya Morena.” 31Moše le moperesiti Eleasare ba dira jaaka Morena a laetse.
32Jaanong thopo e banna ba mephato ba e thopileng e ne e le difutshane di le 675 000 33le dikgomo di le 72 000 34le diesele di le 61 000 35le batho ba basetsana ba ba iseng ba robale le monna ba le 32 000. 36Jaanong palo ya bontlhanngwe ya kabelo ya ba ba tswang kwa ntweng e ne e le difutshane di le 337 500 37– lekgetho la Morena la teng e le difutshane di le 675 – 38le dikgomo di le 36 000 – lekgetho la Morena la teng e le di le 72 – 39le diesele di le 30 500 – lekgetho la teng la Morena e le di le 61 – 40le batho ba le 16 000 – lekgetho la teng la Morena e le batho ba le 32. 41Mme Moše a neela moperesiti Eleasare lekgetho leo la seabe sa Morena jaaka Morena a mo laetse.
42Fa e le bontlhanngwe jwa Baiseraele jo Moše a bo kgaogantseng le jwa banna ba ba tswang ntweng, 43bontlhanngwe jwa phuthego e ne e le difutshane di le 337 500 44le dikgomo di le 36 000 45le diesele di le 30 500 46le batho ba le 16 000. 47Mo bontlhanngweng jwa Baiseraele Moše a tsaya tse di ntshiwang, e bong bongwe mo masomeng a matlhano a batho le a diruiwa, a bo neela Balefi ba ba tlhokomelang tirelo ya Tempelana ya Morena jaaka Morena a mo laetse.
48Ke fa baeteledipele ba dikete tsa mephato, e bong balaodi ba dikete le balaodi ba makgolo ba atamela kwa go Moše, 49ba raya Moše ba re: “Batlhanka ba gago ba batlile palo e e tletseng ya batlhabani ba ba mo taolong ya rona, mme ga go a tlhokafala ope wa bone. 50Ka moo re tlisitse neo ya tshupelo ya Morena, se mongwe le mongwe a se bonyeng sa dilwana tsa gouta, e bong ditilwane le maseka le dipalamonwana tsa go kana le manyena a ditsebe le dibaga tsa molala gore re tle re direlwe thuanyo fa pele ga Morena.” 51Mme Moše le Eleasare ba amogela gouta mo go bone, e le dilwana tse di dirilweng ka botswerere tsa mefutafuta. 52Jaanong gouta yotlhe eo ya seabe se ba se abelang Morena e ne e le ya dišekele di le 16 750 e tswa mo balaoding ba dikete le mo go ba makgolo. 53Banna ba mephato bone ba ne ba ithopetse, mongwe le mongwe tsa gagwe. 54Moše le moperesiti Eleasare ba amogela gouta eo mo balaoding ba dikete le ba makgolo, ba e isa kwa Tenteng ya Boipontsho, e le e e thusang Baiseraele gore ba gopolwe ke Morena.
