NEHEMIA 5

₁Ka letsatsi le lengwe ga utlwala selelo se segolo sa batho le basadi ba bone ka ga Bajuta ba ga bone. ₂Ba bangwe ba ne ba re: “Bomorwaa-rona le bomorwadia-rona re ba bantsi, a re bone mabele, re je re phele.”

₃Ba bangwe ba re: “Rona re ntshetsa masimo a rona le masimo a moweine a rona le matlo a rona peeletso gore re bone mabele mo tlaleng.”

₄Ba bangwe ba re: “Re adimile madi a lekgetho la kgosi ka masimo a rona le masimo a moweine a rona. ₅Mme kana re madi a le mangwe, rona le ba ga rona le bana ba rona ba tshwana le bana ba bone. Le fa go ntse jalo, re na le go neela bomorwaa-rona le bomorwadia-rona mo botlhankeng. Bangwe ba bomorwadia-rona ba setse ba neetswe mo go jona, re se na thata go thibela selo se. Kana masimo a rona le masimo a moweine a rona a tserwe ke bahumi.”

₆Ya re ke utlwa selelo sa bone le mafoko ao, ka nna bogale thata. ₇Ka ba ka ikakanya mo pelong, ka kgalemela batlotlegi le bagogi, ka ba raya ka re: “Madi a lo a adimileng ba ga lona lo a tsadisa go feta selekanyo!” Ka ba ka epa pitso e kgolo go ba sekisa. ₈Ka ba raya ka re: “Rona re rekolotse ba ga rona, e bong Bajuta ba ba neng ba rekisitswe mo ditšhabeng ka fa re nonofileng ka teng, mme lona le rekisa ba ga lona gore ba be ba rekisiwe mo go rona.” Ke fa ba didimala, ba tlhoka puo.

₉Ka ba ka re: “Tse lo di dirang ga di a siama. A ga lo a tshwanela go sepela ka go boifa Modimo wa rona gore baba ba rona ba baheitane ba se ka ba re kgoba? ₁₀Le nna le ba ga etsho le batlhanka ba me re ba adimile madi le mabele. A re leseng go batla gape tse ba di adimileng, re phimoleng molato oo. ₁₁A ko lo ba busetse gompieno masimo a bone le masimo a moweine a bone le ditlhare tsa olefa tsa bone le matlo a bone, lo ba phimolele molato wa madi le mabele le matute a moweine le lookwane tse ba di adimileng mo go lona.”

₁₂Ke fa ba re: “Re tla di busa, re sa batle sepe mo go bone. Re tla dira ka fa o buang ka teng.” Ka ba ka bitsa baperesiti go nna basupi, ka ba ikanisa gore ba tla dira ka fa lefokong leo. ₁₃Ka ba ka tlhotlhora kgwatlha ya me ka re: “A Modimo o tlhotlhore monna mongwe le mongwe jalo yo o sa dirafatseng lefoko leo gore a latlhegelwe ke ntlo ya gagwe le di-tsa-gagwe, a nne jalo a tlhotlhorilwe a le lolea fela.” Ke fa phuthego yotlhe e re: “Amen!” Ya ba ya baka Morena. Mme morafe wa dira ka fa lefokong leo.

₁₄Le gona go tloga letsatsing le ke laetsweng ka lone go nna molaodi wa bone mo lefatsheng la Juta, go tloga ngwageng wa 20 go ya ngwageng wa 32 wa puso ya ga Arethašasetha kgosi, e bong dinyaga di le 12, nna le ba ga etsho ga re a ka ra ja dijo tsa bolaodi. ₁₅Mme balaodi ba pele ba ba neng ba le gona pele ga me ba ne ba imafaditse joko ya morafe, ba ba lefisa madi a dišekele di le 40 ka letsatsi a go ithekela dijo le weine. Le gona batlhanka ba bone ba ne ba gatelela morafe. Mme nna ga ke a ka ka dira jalo ka ntlha ya go boifa Modimo. ₁₆Le gona ke ne ke tshwere tiro ya go baakanya lobota loo, mme ra se ka ra reka tshimo; le batlhanka ba me botlhe ba ne ba phuthegetse teng kwa tirong eo. ₁₇E bile Bajuta, e bong bagogi, banna ba le 150 le ba ba re etelang ba tswa kwa ditšhabeng tse di mo tikologong ya rona ba ne ba ja mo tafoleng ya me. ₁₈Mme tse di neng di baakanyediwa letsatsi le le lengwe, e bong pholo e le nngwe le dinku tse di tlhaotsweng di le thataro le dikgogo e ne e le tsa tshenyegelo ya me; gape ka letsatsi la some go ne go tlisiwa weine e ntsi ya mefutafuta. Mme le fa go ntse jalo ga ke a ka ka batla tuelo ya bolaodi; gonne tiro e ne e imela morafe oo. ₁₉“Modimo wa me, nkgakologelwe ka molemo, o se lebale tsotlhe tse ke di diretseng morafe oo.”