LEFITIKO 26

₁“ ‘Lo se ka lwa itirela medimo ya boithamako, le e seng go itlhomela medimo ya diseto le fa e le majwe a motloutlo le e seng go dira majwe a a gwailweng ditshwantsho mo lefatsheng la ga lona go di obamela. Gonne ke nna Morena, Modimo wa lona. ₂Tlhokomelang bo Sabata ba me, lo boife Felo-ga-Boitshepo ga me. Ke nna Morena.

₃“ ‘Fa lo sepela ka fa melaong ya me le go tlhokomela ditaelo tsa me, lo di dirisa, ₄gona ke tla lo nesetsa dipula ka dinako tsa tsona, mme lefatshe le tla ntsha thobo ya lone le ditlhare tsa naga di tla ungwa maungo a tsona. ₅Lo tla photha go ya phulong ya moweine, mme phulo ya moweine e tla tsaya sebaka go ya go kopana le go lema; lo tla ja dijo tsa lona lo kgora, lo nna mo lefatsheng la ga lona lo iketlile.

₆“ ‘Ke tla lo naya kagiso mo lefatsheng, mme lo tla robala go se na yo o lo tshosang. Dibata tse di gagolang ke tla di fedisa mo lefatsheng, mme tšhaka ga e kitla e ralala lefatshe la lona. ₇Lo tla leleka baba ba lona, mme ba tla swa ka tšhaka fa pele ga lona. ₈Ba le batlhano ba ga lona ba tla leleka ba le lekgolo; mme ba le lekgolo ba ga lona ba tla leleka ba dikete di le some, mme baba ba lona ba tla swa ka tšhaka fa pele ga lona. ₉Ke tla lo ngoka, ke lo atisa, lo ntsifala, ke dirafatsa kgolagano ya me mo go lona. ₁₀Lo tla ja tsa ngogola tse dikgologolo; lo ba lo di ntsha gore di sutele tse dintšhwa. ₁₁Ke tla baya Taberenakele ya me mo gare ga lona, pelo ya me ga e kitla e lo nyatsa, ₁₂mme ke tla sepela mo gare ga lona. Ke tla nna Modimo wa lona, lona lo nne morafe wa me. ₁₃Ke nna Morena, Modimo wa lona, yo ke lo ntshitseng kwa lefatsheng la Egepeto gore lo se tlhole lo nna makgoba a bone, ka roba dikei tsa joko ya lona, ka lo tsamaisa lo inamologile.

₁₄“ ‘Fela fa lo sa nkutlwe, lo sa dirise ditaelo tsotlhe tseo, ₁₅lo latlha melao ya me, mme pelo tsa lona di nyatsa ditshiamelo tsa me, mo lo tla bong lo se ke lo dirise ditaelo tsa me tsotlhe, lo senya kgolagano ya me, ₁₆gona le nna ke tla lo direla tse di ntseng jalo: Ke tla lo dirafaletsa tse di boitshegang, e bong bolwetse jwa sehuba le jwa mogote, tse di lo fifatsang matlho, tse di lo feleletsang. Peo ya lona lo tla e jwalela lefela, e tla jewa ke baba ba lona. ₁₇Ke tla lo bifela, mme lo tla fenngwa ke baba ba lona; ba ba lo tlhoileng ba tla lo laola; lo tla tshaba, go se na ope yo o lo kobang.

₁₈“ ‘Mme fa lo sa ntse lo gana go nkutlwa, ke tla tswelela pele, ke lo betsa gasupa ka ntlha ya maleo a lona. ₁₉Ke tla roba thata ya lona e lo ikgodisang ka yona, ke dira legodimo la lona gore le nne jaaka tshipi le lefatshe la lona go nna jaaka kgotlho. ₂₀Thata ya lona e tla direla lefela; lefatshe la lona ga le ne le ntsha thobo ya lone; le ditlhare tsa naga ga di ne di ungwa maungo a tsona.

₂₁“ ‘Mme fa lo ntse lo fapaana le nna, lo gana go nkutlwa, ke tla lo okeletsa petso gasupa go lekana le dibe tsa lona. ₂₂Ke tla lo romela dibata tsa naga gore di lo jele bana, di nyeletse diruiwa tsa lona, di lo fokotse, mme ditsela tsa lona di nne senya.

₂₃“ ‘Mme fa le ka tseo lo sa impobolele, lo tswelela go sepela mo go sa utlwaneng le nna, ₂₄gona le nna ke tla fapaana le lona, ke lo betsa gasupa ka ntlha ya maleo a lona. ₂₅Ke tla lo romela tšhaka e e busolosetsang kgolagano. Mme le fa lo tshabela kwa metseng ya lona, ke tla lo romela leroborobo, mme lo tla neelwa mo diatleng tsa baba. ₂₆E tla re ka ke lo senyetsa seiphediso sa dijo, basadi ba le some ba bese senkgwe sa lona mo sebesong se le sengwe, ba be ba se busa se ntse se le kalo; lo tla ja, mme lo sa kgore.

₂₇“ ‘Mme fa le ka tseo lo sa nkutlwe, lo ntse lo fapaana le nna, ₂₈gona le nna ke tla emelana le lona ka bogale, ke lo betsa gasupa ka ntlha ya dibe tsa lona. ₂₉Mme lo tla ja nama ya bomorwaa-lona; le nama ya bomorwadia-lona lo tla e ja. ₃₀Ke tla nyeletsa dithota tsa tlhabelo tsa lona, ke kumola majwe a a motloutlo a letsatsi a lona, ke latlhela ditoto tsa lona mo godimo ga ditoto tsa medimo e e maila ya lona, mme pelo ya me e tla lo tenegela. ₃₁Metse ya lona ke tla e fetola marope, ke dira mafelo a a boitshepo a lona sekaka, ga ke ne ke dupa monko o o monate wa tse lo di mphisetsang. ₃₂Ke tla fetola lefatshe la lona sekaka ka nosi, mme baba ba lona ba ba tla agang mo go lone ba tla le reregela. ₃₃Mme lona ke tla lo phatlalaletsa kwa baheitaneng, ke somola tšhaka, ke lo koba ka yona, mme lefatshe la lona le tla fetoga sekaka le metse ya lona e nna matlotla fela. ₃₄Foo lefatshe le tla boelwa ke boSabata ba lone ka malatsi otlhe a le leng sekaka ka ona, lona lo ntse lo le kwa lefatsheng la baba ba lona; foo lefatshe le tla ikhutsa, le boelwa ke boSabata ba lone. ₃₅Le tla ikhutsa ka malatsi otlhe a le leng sekaka ka ona, ka le ne le sa ikhutse ka boSabata ba lona lo ntse lo agile mo go lone.

₃₆“ ‘Fa e le masalela a lona, ke tla a gatlapisa mo mafatsheng a baba ba ona gore a lelekwe ke mokgwasa wa letlhare le le fokwang ke phefo; a tla tshaba jaaka go tshabiwa tšhaka, a ba a wa, a sa kojwa ke ope. ₃₇Ba tla welana godimo jaaka e kete ba tshaba tšhaka go se na yo o ba lelekang. Ga lo kitla lo kgona go emelana le baba ba lona. ₃₈Lo tla nyelelela kwa baheitaneng, mme lefatshe la baba ba lona le tla lo ja. ₃₉Ba ba setseng mo go lona ba tla ngotlega ka molato wa bone kwa mafatsheng a baba ba lona, le ka melato ya borraabo ba tla nyelela nabo.

₄₀“ ‘Foo ba tla ipobola molato wa bone le wa borraabo ka ntlha ya boikanyologo jwa bone jo ba nteofetseng ka jona; ba be ba ipobolele gore ba ne ba fapaanye le nna. ₄₁– Ka moo le nna ka ba ngalela, ka ba isa kwa lefatsheng la baba ba bone. – Mme e tla re fa dipelo tsa bone tse di sa rupang di ikokobetsa, mme ba dumelana le petso ya molato wa bone, ₄₂ke gopole kgolagano ya me le Jakobe; le gona ke gopole kgolagano ya me le Isaka le kgolagano ya me le Aborahame; le lefatshe ke tla le gopola. ₄₃Mme lefatshe ba tshwanetse go le tlogela pele gore le boelwe ke boSabata ba lone le ntse le le sekaka, bone ba se teng. Mme bone ba tshwanetse go dumelana le petso ya molato wa bone, ka ba ne ba latlha ditshiamelo tsa me le ka dipelo tsa bone di ne di tenwa ke melao ya me. ₄₄Mme le fa ba le kwa lefatsheng la baba ba bone le foo ga ke ba latlhe, le gona ga ba ntene, mo nka ba fetsang le go senya kgolagano ya me nabo; gonne nna ke Morena, Modimo wa bone. ₄₅Mme ke tla ba gopolela kgolagano e ke e dirileng le ba bogologolo jale fa ke ba ntsha kwa lefatsheng la Egepeto mo matlhong a merafe gore ke nne Modimo wa bone nna Morena.’ ”

₄₆Ke yona melao le ditshiamelo le dithuto tse Morena o di beileng fa gare ga gagwe le Baiseraele kwa thabeng ya Sinai ka Moše.