LEFITIKO 18

₁Morena a ba a raya Moše a re: ₂“Bua le Baiseraele o ba ree o re: ‘Ke nna Morena, Modimo wa lona. ₃Lo se ka lwa dira jaaka go dirwa kwa lefatsheng la Egepeto le lo neng lo agile mo go lone; lo se ka lwa dira jaaka go dirwa kwa lefatsheng la Kanana le ke tla lo isang kwa go lone; lo se ka lwa sepela ka fa mekgweng ya bone; ₄mme lo dire ka fa ditshiamelong tsa me, lo tlhokomele melao ya me go sepela ka yona. Ke nna Morena, Modimo wa lona. ₅Tlhokomelang he melao ya me le ditshiamelo tsa me; motho yo o dirang ka fa tsona o tla phela ka tsona; ke nna Morena.

₆“ ‘A go se nne ope yo o nyalang yo o gaufi nae ka madi go kopana nae ka mmele. Ke nna Morena. ₇O se ka wa nyalwa ke rraago le e seng go nyala mmaago; ke mmaago, ga o na go kopana nae ka mmele. ₈O se ka wa nyala mosadi wa ga rraago; ke go roga rraago. ₉O se ka wa nyala kgaitsadio yo e leng morwadia rraago gongwe morwadia mmaago, le fa a tsaletswe mo gae gongwe go sele; ga o na go kopana nae ka mmele. ₁₀O se ka wa nyala morwadia morwao gongwe morwadia morwadio; kana ke go ithogaka. ₁₁O se ka wa nyala morwadia mosadi wa ga rraago yo o tsetsweng ke rraago yo e leng kgaitsadio; ga o na go kopana nae ka mmele. ₁₂O se ka wa nyala rakgadiago; gonne ene le rraago ke bana ba motho. ₁₃O se ka wa nyala mogoloa-mmaago, le fa e le mmangwanaago; gonne ba tsetswe le mmaago. ₁₄O se ka wa roga mogoloa-rraago gongwe rangwanaago ka go nyala mosadi wa gagwe; ke mmaago. ₁₅O se ka wa nyala ngwetsi wa gago; ke mosadi wa ga morwao; o se ka wa kopana nae ka mmele. ₁₆O se ka wa nyala mosadi wa ga morwa-rraago; ke go mo roga. ₁₇O se ka wa nyala mosadi le morwadie; o se ka wa mo tsaya le morwadia morwawe gongwe morwadia morwadie go kopana nabo ka mmele; ke ba losika lwa gagwe. Go re jalo ke tiro e e maswe thata. ₁₈Le gona o se ka wa nyala bana ba motho lefufa go kopana le wa bobedi ka mmele, wa ntlha a sa ntse a phela.

₁₉“ ‘Le gona o se ka wa atamela mosadi go kopana nae ka mmele, fa a le mo boitshekologong jwa mosese. ₂₀O se ka wa batela mosadi wa mongwe-ka-wena, wa itshekologa ka ene. ₂₁O se ka wa ntsha ope wa bana ba gago go mo neela Mologe ka go mo ralatsa molelo, e se re gongwe wa itshepolola leina la Modimo wa gago. Ke nna Morena. ₂₂O se ka wa robala le monna jaaka go robalwa le mosadi. Ke se se ilegang. ₂₃O se ka wa ikopanya le seruiwa sepe go itshekologa ka sona; le mosadi a se ka a ema fa pele ga seruiwa go kopana naso. Ke tlhakanyo e e boitshegang.

₂₄“ ‘Lo se ka lwa iitshekolola ka sepe sa dilo tseo; gonne baheitane ba ke tla ba lelekang fa pele ga lona ba iitshekolotse ka tsotlhe tseo. ₂₅Lefatshe le bile le itshekologile, mme ke tla le beletsa tshiamololo ya lone gore lefatshe le tlhatse beng ba lone. ₂₆Mme lona lo tlhokomele melao ya me le ditshiamelo tsa me; lo se ka lwa dira sepe sa maila ao, lona ba lo tsaletsweng mo gae le fa e le moeng yo o lo agetseng. ₂₇Gonne batho ba lefatshe ba ba neng ba le teng pele ga lona ba dirile maila otlhe ao, mo lefatshe le bileng la itshekologa. ₂₈Lefatshe le ka tloga la lo tlhatsa, fa lo le itshekolola, jaaka le tlhatsitse baheitane ba ba neng ba le teng pele ga lona. ₂₉Gonne batho botlhe ba ba dirang sengwe sa maila ao ba tla nyelediwa mo morafeng wa ga bone.

₃₀“ ‘Tlhokomelang he tse di beilweng ke nna gore lo se dire sepe sa mekgwa ya maila a batho ba a dirileng pele ga lona, le e seng go iitshekolola ka ona. Ke nna Morena, Modimo wa lona.’ ”