JOŠUA 4

₁E rile setšhaba sotlhe se sena go tshela Joretane, Morena a raya Jošua a re: ₂“Itlhaoleleng banna ba le some pedi mo morafeng, lotso longwe le longwe lo ntshe a le mongwe. ₃Lo ba laele lo re: ‘Ntshang mafika a le some pedi mo gare ga Joretane fa dinao tsa baperesiti di neng di eme teng di tsepame, lo tshele lo a tshotse, lo a bee kwa marobalong kwa lo tla lalang teng bosigo jono.’ ”

₄Jaanong Jošua a bitsa banna ba ba some pedi bao ba a neng a ba naya tiro ba tswa mo Baiseraeleng, lotso longwe le longwe lo ntshitse a le mongwe. ₅Jošua a ba laela a re: “Tshelang lo etelele Letlole la Morena, Modimo wa lona, pele, lo tsene kwa gare ga Joretane, mme a mongwe le mongwe wa lona a tsee lefika, a le sikare legetleng ka fa palong ya ditso tsa Iseraele ₆gore selo se e nne sesupo mo go lona: E tle e re bana ba lona ba lo botsa mo metlheng e e tlang ba re: ‘Mafika ao a kaya eng mo go lona?’ ₇foo lo ba ree lo re: ‘E rile Letlole la Kgolagano ya Morena le tshela Joretane, metsi a Joretane a kgaoga fa pele ga lone, mme mafika ao ke segopotso sa teng mo Baiseraeleng ka bosakhutleng.’ ”

₈Baiseraele ba dira jalo jaaka Jošua a laotse, ba tsaya mafika a le some pedi, ba a ntsha mo gare ga Joretane jaaka Morena a laetse Jošua ka fa palong ya ditso tsa Baiseraele, ba tshela ba a tshotse, ba a isa kwa marobalong, ba a baya teng. ₉Le gona Jošua a tlhoma mafika a le some pedi fa gare ga Joretane, fa dinao tsa baperesiti ba ba neng ba sikere Letlole la Kgolagano di neng di eme gona. A sa le teng le kajeno. ₁₀Mme baperesiti ba ba neng ba sikere Letlole ba ne ba ntse ba eme fa gare ga Joretane ga tsamaya ga fediwa tsotlhe tse Morena o di laetseng Jošua go di bolelela morafe, e bong tsotlhe tse Moše o di laetseng Jošua. Morafe wa itlhaganela, wa tshela.

₁₁Jaanong ya re morafe otlhe o sena go tshela, Letlole la Morena le lone la tshela le tshotswe ke baperesiti mo matlhong a morafe. ₁₂Mme Barubene le Bagate le ba bontlhanngwe jwa lotso lwa Manase ba tshela, ba etelela Baiseraele pele ba tshotse marumo jaaka Moše a ba laetse. ₁₃Ba fetela pele fa pele ga Morena go ya tlhabanong kwa nageng ya Jerigo, e ka nna banna ba mephato ba ba tshotseng marumo ba le 40 000. ₁₄Ka letsatsi leo Morena a godisa Jošua mo matlhong a Baiseraele botlhe, mme ba mmoifa ka malatsi otlhe a bophelo jwa gagwe jaaka ba ne ba boifa Moše.

₁₅Morena o ne a reile Jošua a re: ₁₆“Laela baperesiti ba ba sikereng Letlole la Tshupo gore ba tlhatloge ba tswe mo Joretane.” ₁₇Ke fa Jošua a laela baperesiti a re: “Tlhatlogang lo tswe mo Joretane!” ₁₈Mme ya re baperesiti ba ba sikereng Letlole la Kgolagano ya Morena ba tlhatloga ba tswa mo Joretane, mme dipato tsa dinao tsa baperesiti di sena go gata lefatshe le le omileng, metsi a Joretane a ba a boela mo felong ga ona, a ela jaaka pele, a penologela mo dintshing tsotlhe.

₁₉Morafe o ne wa tlhatloga mo Joretane ka kgwedi ya ntlha e le some; jaanong ba thibelela kwa Gilegala fa molelwaneng wa botlhabatsatsi wa Jerigo. ₂₀Mme mafika a a some pedi ale a ba a ntshitseng mo Joretane Jošua a a tlhoma kwa Gilegala. ₂₁A raya Baiseraele a re: “E re fa bana ba lona ba botsa borraabo mo metlheng e e tlang ba re: ‘Mafika ao a kaya eng?’ ₂₂foo lo itsise bana ba lona lo re: ‘Baiseraele ba ne ba tshela Joretane yo a omisitswe. ₂₃Gonne Morena, Modimo wa lona, o ne a kgadisa metsi a Joretane fa pele ga lona ga tsamaya lwa tshela fela jaaka Morena, Modimo wa lona, a kile a direla Lewatle la Motlhaka le o neng a le kgadisa fa pele ga rona ga tsamaya ra tshela. ₂₄E ne e le gore merafe yotlhe ya lefatshe e tle e lemoge letsogo la Morena, fa e le le le thata, mme e boife Morena, Modimo wa lona, ka malatsi otlhe.’ ”