JOBE 38

₂“Ke mang

yo o fifatsang maikaelelo a me

ka dipolelo tse di se nang kitso?

₃A ko o itlame letheka

jaaka monna!

Ke tla go botsa, o nthute!

₄E rile ke thaya lefatshe,

wa bo o le kae?

Bolela, fa o na le kitso!

₅Ke mang

yo o beileng ditekanyo tsa lone?

– Kana o a itse! –

Gongwe ke mang

yo o neng a gagamatsa mogala

o o le anyang mo go lone?

₆Metheo ya lone

e tsentswe mo go eng?

Ke mang yo o beileng

lentswe la sekhutlo la lone

₇mogang dinaledi tsa masa

di duduetsang mmogo,

fa baengele botlhe

ba tlhaba mokgosi wa boitumelo?

₈Ke mang yo o tswaletseng

lewatle ka ditswalo,

fa le phašametsega le tswa

mo felong ga lone,

₉fa ke dira maru diaparo tsa lone

le lefifi le lentsho lesela la lone?

₁₀Motlhang ke le beelang

molelwane wa lone,

fa ke le direla losi le ditswalo,

₁₁ka re: ‘O ka tla go fitlha fano,

mme e seng go feta;

boikgogomoso jwa dintelo

tsa gago bo na le go kokobela fa!’

₁₂A o setse o kile wa laola moso

ka lengwe la malatsi a gago?

A o kile wa itsise mahube

felo ga ona

₁₃gore a tshware dikhutlo

tsa lefatshe,

mme baikepi ba tlhotlhorwe

mo go lone?

₁₄Gore le fetoge jaaka mmopa

fa tlase ga sekano,

mme dilo tsotlhe di bonale

sentle,

di senoge jaaka seaparo?

₁₅Gore baikepi

ba timiwe lesedi la bone,

mme letswele le le

tsholetsegileng le robiwe?

₁₆A o kile wa ya kwa metsweding

ya lewatle,

wa itsamaela kwa tlasetlase

ga madiba a lone?

₁₇A o kile wa bulelwa

dikgoro tsa loso?

A o kile wa bona dikgoro

tsa lefifi le le kwenneng?

₁₈A o lemogile bophara

jwa lefatshe?

Bolela, fa o itse tsotlhe tseo!

₁₉Tsela e kae e e yang

kwa lesedi le nnang teng?

Le felo ga lefifi go kwa kae?

₂₀Mo o ka di isang kwa teng

ga melelwane ya tsona,

mo o itseng ditsela

tse di yang kwa matlong a tsona.

₂₁Legale o a itse!

Kana o tsetswe ka metlha ele;

palo ya malatsi a gago e kgolo!

₂₂A o kile wa fitlha

kwa polokelong ya semathana?

A o kile wa bona

polokelo ya sefako

₂₃tse di boloketseng

sebaka sa tlalelo

le letsatsi la ntwa le la tlhabano?

₂₄Tsela e kae e e yang kwa lesedi

le abelwang teng,

kwa phefo ya botlhabatsatsi

e tsogang teng go ralala lefatshe?

₂₅Ke mang yo o epileng melapo

ya dipula tse dikgolo,

a dira tsela ya logadima

lwa maru,

₂₆e le go nesa pula mo lefatsheng

le le se nang motho,

le mo sekakeng

kwa go sa nneng batho teng;

₂₇e le go nosetsa naga

e e omileng le e e senya,

e le go tlhogisa bojang

jo bošwa mo nageng?

₂₈A pula e na le rraayo?

Gongwe marothodi a monyo

a tsalwa ke mang?

₂₉Dikgapetla

mmaa-tsona ke mang,

le kgogotshwane ya legodimo

ke mang yo o e belegeng,

₃₀fa metsi a thatafala,

a nna jaaka matlapa,

fa sefatlhego sa bodiba

se nyele dikgapetla?

₃₁A wena o ka bofaganya

Selemela,

gongwe a o ka bofolola

dithapo tsa Dikolobe?

₃₂A o ka bolotsa dinaledi ka go

latelana ga tsona mo ngwageng?

A o ka tsamaisa dinaledi tsa Bere

e kgolo le tsa Bere e nnyane?

₃₃A o itse melao ya legodimo?

A o le laodisa mo lefatsheng?

₃₄A o ka tsholeletsa lentswe

kwa marung

gore morwalela wa metsi

o go khurumetse?

₃₅A o ka roma dikgadima

gore di bolole di go ree di re:

‘Re fano’?

₃₆Ke mang yo o beileng botlhale

mo marung?

Ke mang yo o neileng dilo tsa

loapi tlhaloganyo?

₃₇Ke mang yo o balang maru

ka botlhale?

Ke mang yo o tshololang

makuka a legodimo,

₃₈fa lerole le fetoga seretse,

fa makote a ngaparelana?

₃₉A o tsomela tau e namagadi

phologolo

gongwe a o kgorisa ditawana,

₄₀fa di ratela marobalo,

fa di di lalela mo sekhung?

₄₁Ke mang yo o baakanyetsang

legakabe dijo,

fa mamphorwana a lone

a lelela Modimong,

fa a kgarakgatshega

ka go tlhoka dijo?