Jeremia o bolelela Bajuta ba ba kwa Egepeto petso e e tla ba welang
1Lefoko le le tsileng kwa go Jeremia ka ga Bajuta botlhe ba ba agileng mo lefatsheng la Egepeto, ba ba agileng kwa Migetole le kwa Thagephanese le kwa Nofe le mo lefatsheng la Phatherose la re: 2“Morena wa masomosomo, Modimo wa Iseraele, o bua jaana a re: ‘Tatlhego e ke e digetseng mo Jerusalema le mo metseng yotlhe ya Juta, lo e bonye ka losi. Ke ale marope a a se nang moagi kajeno! 3Ke ka ntlha ya bosula jo ba bo dirileng go nkgakatsa ka go ya go fisetsa medimo e sele maswalo le ka go e direla, e e neng e sa itsiwe ke bone le lona le borraeno. 4Le gale ke ne ke ntse ke lo romela baporofeti, batlhanka ba me, ka ba roma ka tlhoafalo ka re: A ko lo se ka lwa dira makgapha a a ntseng jalo a ke a tlhoileng! 5Mme ga ba a ka ba utlwa le e seng go sekega ditsebe; ga ba a ka ba boa mo boikepong jwa bone le e seng go bakela go fisetsa medimo e sele maswalo. 6Ka moo kgalefo ya me ya goromediwa, bogale jwa me jwa tuka mo metseng ya Juta le mo mebileng ya Jerusalema; ya fetoga marope le sekaka jaaka di bonwa kajeno.’
7“Jaanong Morena, Modimo wa masomosomo, Modimo wa Iseraele, o bua jaana a re: ‘Ke ka ntlhaang, fa lo itshenyetsa maphelo, lo ipolaela banna le basadi le bana le masea mo Juta, lo sa itshadisetse masalela ape? 8Ke eng, fa lo nkgakatsa ka ditiro tsa diatla tsa lona le ka go fisetsa medimo e sele maswalo mo lefatsheng la Egepeto, kwa lo tlileng go jaka teng, gore lo ipolae ka losi, gore lo nne thogako le kgobo mo ditšhabeng tsotlhe tsa lefatshe? 9A lo lebetse masula a borraeno le masula a dikgosi tsa Juta le masula a basadi ba tsona le masula a lona le masula a basadi ba lona a ba a dirileng mo lefatsheng la Juta le mo mebileng ya Jerusalema? 10Go fitlha kajeno ga ba ise ba inyatse, ga ba boife, ga ba sepele ka fa molaong wa me le e seng ka fa ditaolong tsa me, tse ke di beileng fa pele ga lona le fa pele ga borraeno.’
11“Ke gona ka moo Morena wa masomosomo, Modimo wa Iseraele, a buang jaana a re: ‘Itseng gore ke ikaeletse go lo direla se se botlhoko le go nyeletsa Juta yotlhe. 12Ke tla tlosa masalela a Juta a a ikaeletseng go ya kwa lefatsheng la Egepeto le go jaka teng. A tla nyelela otlhe mo lefatsheng la Egepeto, a wa ka tšhaka, a nyelela ka tlala, ba bagolo le ba bannye. Ba tla swa ka tšhaka le ka tlala, ba nna thogo le theregiso le khutso le kgobo. 13Ba ba agileng mo lefatsheng la Egepeto ke tla ba betsa jaaka ke beditse Jerusalema ka tšhaka le ka tlala le ka leroborobo. 14Mo masaleleng a Juta a a tlileng go jaka mo lefatsheng la Egepeto go tla bo go se na ope yo o falolang, yo o gologang gore a boele kwa lefatsheng la Juta, le ba le tlhologeletsweng go nna gape mo go lone. Gonne ga ba kitla ba boela teng, fa e se batshabinyana ba se kae fela.’ ”
15Ke fa banna botlhe ba ba neng ba itse sentle gore basadi ba bone ba fisetsa medimo e sele maswalo, le basadi botlhe ba ba emeng gona, e le bontsi jo bogolo, le batho botlhe ba ba nnang mo lefatsheng la Egepeto le la Phatherose, ba araba Jeremia ba re: 16“Fa e le lefoko le o le buileng le rona mo leineng la Morena, ga go na ope mo go rona yo o le utlwisisang. 17Mme re tla dira tsotlhe tse re di ikanetseng di tswa mo melomong ya rona: Re tla fisetsa mohumagadi-wa-legodimo maswalo, re mo tshelela ditshupelo tsa dino, jaaka go dirile rona le borraetsho le dikgosi tsa rona le dikgosana tsa rona mo metseng ya Juta le mo mebileng ya Jerusalema; ra kgora bogobe, ra phela sentle, re sa bone bosula bope. 18Mme fa e sa le re khutla go fisetsa mohumagadi-wa-legodimo maswalo le go mo tshelela ditshupelo tsa dino, go tloga foo re tlhokile dilo tsotlhe, ra nyelela ka tšhaka le ka tlala.”
19Basadi ba re: “Fa rona re fisetsa mohumagadi-wa-legodimo maswalo, re mo tshelela ditshupelo tsa dino; fa re mmopela dinkgwenyana tsa go mo tshwantsha, re mo tshelela ditshupelo tsa dino, a re dira jalo kwa ntle ga banna ba rona?”
20Ke fa Jeremia a raya morafe otlhe, e bong banna le basadi le batho botlhe ba ba mo arabileng ka mokgwa oo, a re: 21“Maswalo a lo a fisitseng mo metseng ya Juta le mo mebileng ya Jerusalema, lona le borraeno le dikgosi tsa lona le dikgosana tsa lona le batho ba ba kwa merakeng, a ga ke re, ke ona a Morena o a gopotseng, a a gakologelwa ka pelo? 22Jaanong e re ka Morena a sa tlhole a kgona go itshokela bosula jwa ditiro tsa lona, le maila a lo a dirileng, lefatshe la lona le fetogile sekaka le theregiso le thogako, le tlhoka yo o nnang mo go lone, jaaka le ntse kajeno. 23E re ka lo fisitse maswalo, lwa leofela Morena jalo, lo sa utlwe lentswe la Morena, lo sa sepele ka fa molaong wa gagwe le e seng ka fa ditaolong tsa gagwe le fa e le ka fa ditshupong tsa gagwe, ke ka moo tatlhego eo e lo wetseng e lo leng mo go yona kajeno.”
24Gape Jeremia a raya batho botlhe le basadi botlhe a re: “Utlwang Lefoko la Morena, lona Bajuta lotlhe ba lo nnang mo lefatsheng la Egepeto. 25Morena wa masomosomo, Modimo wa Iseraele, o bua jaana a re: ‘Lona le basadi ba lona, tse lo di buileng ka melomo, ke tsona tse lo di dirang ka diatla. Lo buile lwa re: Ruri, re tla dirafatsa maikano a rona a re a ikanneng ra re: Re tla fisetsa mohumagadi-wa-legodimo maswalo, re mo tshelela ditshupelo tsa dino.’ Ee, tlhomamisang maikano a lona! Ee, dirafatsang maikano a lona! 26Fela utlwang Lefoko la Morena, lona Bajuta lotlhe ba lo nnang mo lefatsheng la Egepeto! Morena a re: ‘Itseng gore ke ikanne ka leina le legolo la me ka re: Ga go kitla go tlhola go nna Mojuta ope mo lefatsheng lotlhe la Egepeto yo o tla bitsang leina la me ka molomo wa gagwe a re: Ka bophelo jwa Morena Modimo! 27Bonang, ke tla ba tsotelela gore ba dirafalelwe ke bosula, e seng molemo. Banna botlhe ba Juta ba ba mo lefatsheng la Egepeto ba tla nyelela ka tšhaka le ka tlala, go tsamaya ba felele. 28Ba ba falolang mo tšhakeng, ba boa mo lefatsheng la Egepeto, ba boela kwa lefatsheng la Juta, e tla nna ba se kae fela. Masalela otlhe a Bajuta ba ba tsileng mono lefatsheng la Egepeto go jaka gona a tla lemoga gore ke lefoko la ga mang le le dirafalang, a la me gongwe la bone.’ 29Morena a re: ‘Sesupo se se supang gore ke nna ke tla lo otlang mo felong fano gore lo tle lo itse, fa mafoko a me a tla lo dirafalela ruri go lo betsa,’ 30ke se Morena o se buang jaana a re: ‘Bonang, ke tla neela Farao Hofera, kgosi ya Egepeto, mo diatleng tsa baba ba gagwe, mo diatleng tsa ba ba ratang go mmolaya, jaaka ke neetse Setekia, kgosi ya Juta, mo diatleng tsa ga Nebukatenesare, kgosi ya Babele, mmaba wa gagwe, yo o neng a rata go mmolaya.’ ”
