JEREMIA 24

₁Morena o ne a mpontsha pono, ka bona ditlatlana di le pedi tse di nang le difeie; di beilwe fa pele ga Tempele ya Morena. – E ne e le fa Nebukatenesare, kgosi ya Babele, a sena go tlosa Jegonya, morwa Joyakime, kgosi ya Juta, le dikgosana tsa Juta, le ditswerere, le bathudi mo Jerusalema le go ba isa mo botshwarong kwa Babele. ₂Tlatlana ya ntlha e ne e na le difeie tse di monate thata jaaka difeie tsa mabutswapele. Mme tlatlana e nngwe e ne e na le difeie tse dimpe thata tse di sa ka keng tsa jewa, ka di le dimpe thata. ₃Ke fa Morena a nthaya a re: “O bona eng, Jeremia?”

Ka re: “Difeie. Difeie tse di monate di molemo thata; tse dimpe di dimpe thata, mo motho o palelwang ke go di ja, ka di le dimpe thata.”

₄Ke fa Lefoko la Morena le tla kwa go nna le re: ₅“Morena, Modimo wa Iseraele, o bua jaana a re: ‘Ke tla leba batshwarwi ba Juta ba ke ba tlositseng mono, ka ba romela kwa lefatsheng la Bakalatea ka bopelonomi jaaka difeie tse di monate tse. ₆Ke tla lebisa matlho a me mo go bone gore ke ba direle molemo, ke ba busetse mo lefatsheng leno. Ke tla ba agisa, mme ke sa ba rutle; ke tla ba tlhoma, mme ke sa ba kumole. ₇Gape, ke tla ba naya dipelo tse di nkitseng, fa ke le Morena. Ba tla nna morafe wa me, nna ke tla nna Modimo wa bone. Gonne ba tla boela kwa go nna ka pelo yotlhe.

₈“ ‘Mme Setekia, kgosi ya Juta, le dikgosana tsa gagwe le masalela a Jerusalema le ba ba sadisitsweng mo lefatsheng leno le ba ba agileng kwa lefatsheng la Egepeto, ke tla dira gore ba tshwane le difeie tse di bodileng tse di sa jeweng ke motho, ka di le bosula thata.’ ” Ke tse Morena o di buileng. ₉“ ‘Ee, ke tla ba dira theregiso le kotsi mo magosing otlhe a lefatshe; ke tla ba dira kgobo le seane le tshotlo le thogako mo mafelong otlhe kwa ke ba lelekelang teng. ₁₀Ke tla ba romela tšhaka le tlala le leroborobo go ya go fitlhelela ba felelediwe mo lefatsheng le ke le ba neileng le borraabo.’ ”