JEREMIA 1

₁Mafoko a ga Jeremia, morwa Hilekia, mongwe wa baperesiti ba ba neng ba agile kwa Anathothe mo lefatsheng la Benyamene, ₂yo lefoko la Morena le tsileng kwa go ene mo malatsing a ga Josia, morwa Amone, kgosi ya Juta, ka ngwaga wa some tharo wa puso ya gagwe. ₃Le gona le tsile kwa go ene mo malatsing a ga Joyakime, morwa Josia, kgosi ya Juta, go ya bofelong jwa ngwaga wa some nngwe wa ga Setekia, morwa Josia, kgosi ya Juta, go fitlha fa ba Jerusalema ba isiwa mo botshwarong mo kgweding ya botlhano.

₄Lefoko la Morena le tsile kwa go nna la re: ₅“E rile ke ise ke go bope mo sebopelong, ka go itse; ya re o ise o tsalwe ke mmaago, ka go itshepisa, ka go dira moporofeti wa ditšhaba.”

₆Mme ka re: “Ao, Morena Modimo! Kana ga ke itse go bua. Gonne ke sa le mošwa.”

₇Mme Morena a nthaya a re: “Se re, ke sa le mošwa! Gonne o na le go ya kwa go botlhe ba ke go romang kwa go bone, le go bua tsotlhe tse ke di go laelang. ₈O se ka wa ba boifa, gonne ke na nao gore ke go pholose,” go bua Morena.

₉Ke fa Morena a ntsha seatla, a nkama molomo; Morena a ba a nthaya a re: “Bona, ke baya mafoko a me mo molomong wa gago! ₁₀Bona, kajeno ke go neela thata mo ditšhabeng le mo magosing gore o kumole le go rutla, o senye le go nyeletsa, o age le go tlhoma.”

₁₁Lefoko la Morena la ba la tla kwa go nna la re: “O bona eng, Jeremia?”

Ka re: “Ke bona kalana ya setlhare sa mokgofa.”

₁₂Morena a ba a nthaya a re: “O bonye sentle. Gonne ke tla tlhofaelela mafoko a me gore ke a dirafatse.”

₁₃Mme lefoko la Morena la tla la bobedi kwa go nna la re: “O bona eng?”

Ka re: “Ke bona pitsa e e belang kwa bokone, mme molomo wa yona o sekametse kwano.”

₁₄Ke fa Morena a nthaya a re: “Tatlhego e tla tshologela baagi botlhe ba lefatshe, e tswa kwa bokone. ₁₅Gonne bona, ke tla bitsa ditso tsotlhe tsa magosi a a kwa bokone,” go bua Morena, “mme ba tla tla, mongwe le mongwe a baya sedulo sa gagwe sa bogosi fa mejakong ya dikgoro tsa Jerusalema, le go bapa le dipota tsa gagwe mo tikologong, le go bapa le metse yotlhe ya Juta. ₁₆Mme ke tla ntsha dikatlholo tsa me ka ga bone ka ntlha ya bosula jotlhe jwa bone, ka ba ntlogetse, ba fisetsa medimo e sele maswalo, ba obamela ditiro tsa diatla tsa bone. ₁₇Mme wena, itlame letheka, o ipaakanye, o ba bolelele tsotlhe tse ke di go laelang. O se ka wa ba boifa, gore ke se ka ka go boifisa fa pele ga bone. ₁₈Mme bona, kajeno nna ka nosi ke go dirile motse o o femetsweng, le tshipi-lore le dipota tsa kgotlho gore o palele lefatshe lotlhe le dikgosi tsa Juta, le dikgosana tsa gagwe, le baperesiti ba gagwe le batho ba ba mo nageng. ₁₉Le fa ba tla lwa nao, ga ba kitla ba go fenya; gonne ke na nao gore ke go thuse,” go bua Morena.