III. JUDITHE
Sebopego sa ga Judithe
1Ka nako e Judithe o ne a bolelelwa se se neng se diragetse. E ne e le morwadia Merari morwa Okese, morwa Josefa, morwa Osiele, morwa Elekia, morwa Ananiase, morwa Gidione, morwa Rafaime, morwa Ahitube, morwa Elia, morwa Hilikia, morwa Eliabe, morwa Nathanaele, morwa Salamiele, morwa Sarasadai, morwa Iseraele. 2Monna wa gagwe, Manasse yo e neng e le wa morafe wa gagwe le wa losika lwa gagwe, o ne a ile a tlhokafala ka nako ya thobo ya mabele. 3Gonne e rile a ntse a okametse banna ba ba neng ba bofa dingata mo tshimong, a utlwalelwa ke mogote o mogolo, a ya go rapama mo bolaong jwa gagwe mme a tlhokafala mo Bethulia motse wa gaabo. A fitlhwa le bagolwagolwane ba gagwe mo tshimong e e fa gare ga Dothane le Balamone.
4Judithe o ne a nna mo gae e le motlholagadi dingwaga di le tharo le dikgwedi tse nne. 5A ikagetse tante mo godimo ga marulelo a ntlo ya gagwe. A ikgatlhile ka letsela le le magwata e bile a apere diapara tsa botlholagadi. 6O ne a itima dijo malatsi otlhe a botlholagadi jwa gagwe, fa e se fela letsatsi pele ga Sabata, le mo go ene Sabata, letsatsi pele ga kgwedi e rogwa, le ka lone letsatsi la go rogwa ga kgwedi, gape ka meletlo le ka malatsi a boitumelo jwa ntlo ya Iseraele. 7Jaanong o ne a le montle thata, a kgatlha go bonwa.
Monna wa gagwe Manasse o ne a mo tlogeletse gouta le selefera, batlhanka le bahula, dikgomo le masimo; mme o ne a tlhokomela loruo lo lotlhe lwa gagwe. 8Go se na ope yo o mmuang maswe ka a ne a boifa Modimo ka borapedi jo bogolo.
Judithe le Bagolwane
9E rile Judithe a utlwa mafoko a a bosula a neng a builwe ke batho kgatlhanong le molaodi, ka ba ne ba kgobilwe marapo ke go tlhokafala ga metsi, a bo a utlwa tsotlhe tse Usia a neng a di ba boleletse, le jaaka a ne a ba solofeditse, a ikana, gore o tla lesa motse gore o tsewe ke Maasiria morago ga malatsi a matlhano, 10a re go bidiwe mohula wa gagwe yo o neng a disa loruo lotlhe lwa gagwe, a mo roma go ya go bitsa Kaberise le Karemise, bagolwane ba babedi ba motse.
11E rile fa ba fitlha a re: “A lo ko lo ntheetseng, baeteledipele ba batho ba Bethulia. Se lo se boleletseng batho gompieno ga se a siama, lo bile lo dirile maikano fa gare ga lona le Modimo, lo solofetsa gore lo tlaa lesa motse o tsewa ke baba ba rona fa fela Morena a ka se ka a tla go lo thusa mo malatsing a palo ya gore. 12Lo bomang lona, gore lo bo lo leka Modimo jaana gompieno, lo bo lo ipaya kwa godimo mo maemong a Modimo, lona tota, mo gare ga bana ba batho? 13Lona ba lo sa solofelwang go dira jalo, lo leka Morena Mothatiyotlhe! Ga lo itse sepe, le gone ga lo kitla lo bo lo tlhola lo itse sepe! 14Fa lo palelwa ke go lekanya botengteng jwa pelo ya motho, lo bile lo tlholwa ke go bona se motho a se akanyang; lo ka solofela jang gore lo ka tlhotlhomisa Modimo, o o dirileng dilo tsotlhe, lwa bona mogopolo wa one, lwa bo lwa tlhaloganya dikakanyo tsa one? Nnyaa, bakaulengwe, se galefiseng Morena Modimo wa rona. 15Gonne fa o sa batle go re thusa mo malatsing a matlhano a, o na le thata ya go re sireletsa mo nakong nngwe le nngwe e o e ratang, fela jaaka o na le thata ya go re nyeletsa fa pele ga baba ba rona. 16Fela ga lo a tšhwanela go tlhomela dithulaganyo tsa Morena Modimo wa rona melelwane. Gonne Modimo ga o patelediwe jaaka motho, le gone ga o tlakisiwe jaaka mothonyana fela. 17Jalo he, a e re re o letile gore o re boloke, re nne re o rapele ka bopelotele gore o re thuse. O tlaa utlwa lentšwe la rona fa o rata. 18Le gone tota mo dingwaganyaneng tse di fetileng tse, le mo malatsing ano, ga go ise go ko go nne le morafe ope wa rona, kgotsa lolwapa lope, kgotsa motsana mongwe, le fa e le motse mongwe o o kileng wa obamela medimo e e dirilweng ka diatla tsa motho, jaaka go kile ga dirwa; 19mme kana ke lone lobaka lo lo neng lwa dira gore ba lesiwe fela ba bolawe ka lerumo, ba ripitliwe, mme ba nyelediwe ke matlhotlhapelo a ba neng ba a tsisediwa ke baba ba rona. 20Fa e le rona ga re dumele Modimo o sele fa e se one fela; jalo he, re ka nna ra solofela gore ga o kitla o re nyatsa kgotsa o tlhokomologa setšhaba sa rona.
21“Fa ba ka tota ba re gapa, jaaka lo akanya, Juta otlhe le ene o tlaa gapiwa, mafelo a rona a a boitshepo a ripitlwa, mme rona re bolaelwe tshenyego ya one. 22Polao ya bakaulengwe ba rona, kgatšô ya lefatshe la rona, go tlhokisiwa batho ga bošwa jwa rona, tsotlhe tse, di tlaa koegiwa mo godimo ga ditlhogo tsa rona mo gare ga ditšhaba tse re tlaa nnang makgoba a tsone, mme ba ba tlaa bong ba re ikgapetse ba tlaa re bona re le sekgopi le sekgobo; 23gonne go ineela ga rona ga go kitla go dira gore ba re rate; nnyaa, Morena Modimo wa rona o tlaa go dira selo se se tlhabisang ditlhong.
24“Jalo he, bagaetsho, a re beeleng bakaulengwe ba rona sekao, gonne botshelo jwa bone bo mo diatleng tsa rona, mme loruo lwa rona lo lo boitshepo-tshepo – ebong Tempele le aletare – lo ikaegile ka rona. 25Fa go ntse jalo, a bogolo re lebogeng Morena Modimo wa rona, o o re lekang jaanong jaana, jaaka o kile wa leka bagolwagolwane ba rona. 26Lo ke lo gakologelweng se o neng wa se direla Abrahame, le ka mo o neng wa leka Isaka ka teng, le gore Jakoba o ne a diragalelwa ke eng kwa Mesopotamia wa Siria, fa a ne a ntse a disa dinku tsa ga Labane, kgaitsadia mmaagwe. 27Gonne jaaka Modimo o ne o ba tlhatlhoba dipelo ka diteko tse, le rona ga o re busolose ka selo se, fela Morena o re tlhagisa jaaka a tle a tlhagise botlhe ba o ba ratang.”
28Ke fa Usia a mo raya a re “Sengwe le sengwe se O se buileng O se buile O se na bolotsana bope mo pelong le gone ga go na ope yo o ka ganetsang mafoko a gago. 29Ga se gore gompieno ke sa ntlha botlhale jwa gago bo itshupa; fa e sale mo bonyaneng jwa gago batho botlhe ba ntse ba lemoga ka mo O leng botlhale ka teng le ka mo pelo ya gago e leng tšhweu ka teng. 30Fela e rile batho ba bolailwe ke lenyora ba re pateletsa go dira se re se ba solofeditseng le go dira maikano a re ka se kang ra a tlhanogela. 31Ka O le mosadi wa borapedi re rapelele Morena gore a re romelele pula ya matsorotsoro gore e re tlaletse ditanka re tle re se ka ra tlhola re kgobega marapo.”
32Judithe ke fa a fetola a re “A ko lo ntheetseng, ke ikaeletse go dira sengwe se bana ba setšhaba sa rona ba tlaa nnang ba se gakologelwa mo dingwageng tsotlhe. 33Bosigong jono lo bo lo le kwa kgorong ya motse. Ke tla tšwa le mohula wa me. Mo go one malatsi a lo solofeditseng gore morago ga one lo tlaa bo lo tlogela motse go tsewa ke baba ba rona Morena o tla ntirisa go namola Iseraele. 34Lo se ka lwa bo lwa mpotsa gore ke ikaeletse go dira eng; ga nkitla ke lo bolelela go fitlhelela ke sena go se dira.”
35Usia le baeteledipele ba mo raya ba re “O tsamaye ka kagiso. A morena a go bontshe tsela ya go ipusolosetsa mo babeng ba rona.” 36Ya re ba tswa mo tanteng e e kwa godimo ba boela kwa mafelong a bone.
