JUDITHE 2

₁Mo ngwageng ya bo-18, mo letsatsing la bo-22 la kgwedi ya ntlha mošwadile o ne wa utlwala mo tlung ya segosi gore Nabukadenesa kgosi ya Maasiria o ikaeletse go ipusolosetsa mo lefatsheng lotlhe jaaka a ne a kile a ipoka. ₂O ne a bitsa batlatsi ba gagwe ka kakaretso le ba lekgotla ba bagolo ba gagwe a tšhwara khuduthamaga nabo, mme ka molomo wa gagwe a bolela thipitlo ya mafatshe otlhe. ₃Ke fa go laelwa gore mongwe le mongwe yo o neng a se ka a araba boikuelo jwa kgosi a bolawe.

₄E rile lekgotla le phatlalala, Nebukatenesare kgosi ya Maasiria a laela gore Holofernese a bidiwe, yo e neng e le molaodi yo mogolo wa mephato ya gagwe ya batlhabani mme a le ka fa tlase ga gagwe a le esi fela. A mo raya a re, ₅“Kgosi e Kgolo, morena wa lefatshe lotlhe o bua jaana a re: ‘Tsena mo tseleng; O tseye banna ba ba tletseng bopelokgale tota, masole a a tsamayang ka dinao a a ka nang ka 120 000 le segopa se se thata sa dipitse ka batlhabani-bapalami ba ba 12 000. ₆O bo O ya go tlhasela mafatshe a bophirimatsatsi, gonne batho ba, ba ne ba tlhokomologa pitso ya me. ₇Ba reye ba baakanye mmu le metsi, gonne jaaka ke galefile jaana ke tsile go ba tlhasela; dinao tsa masole a me di tsile go khurumetsa sefatlhogo sotlhe sa lefatshe le, mme ke tsile go le ripitla. ₈Ba ba utlwisitšweng botlhoko ba bone ba tlaa tlatsa dikgophu, mme molatswana mongwe le mongwe le noka nngwe le nngwe, di tla tlala ka bašwi ba bone, di bo di penologe. ₉Mme ke tlaa ba tsaya e le magolegwa go ba isa kwa mafelelong a lefatshe. ₁₀Jaanong tsamaya! O simolole ka go mphenyetsa kgaolo e yotlhe pele. Fa ba go ineela, O ba ntšhwarelele go fitlhelela nako ya go ba otlhaya e fitlha. ₁₁Fela fa ba kgaratlha, O se ka wa bo wa utlwela ope botlhoko. O dire gore ba bolawe ba bo ba ripitlwe mo kgaolong e O e neetsweng eo yotlhe. ₁₂Gonne jaaka ke tshela, ke ikana ka thata ya puso ya me, se ke se buileng ke tlaa bo ke se diragatse ka seatla sa me. ₁₃Mme wena, O tlhokomele gore O se ka wa bo wa tlola dipe ditaolo tsa morena wa gago; O dire fela jaaka ke go laetse, kwa ntle ga tiego epe.’ ”

₁₄Ke fa Holofernese a tlogela mong wagwe, mme a ya go phutha balaodi, baokamedi le balekgotla botlhe ba mophato wa batlhabani ba Maasiria, ₁₅mme a rulaganya ditlhopha tsa batlhabani tse di tlhaotšweng fela jaaka morena wa gagwe a ne a mmoleletse, banna ba ba neng ba ka nna 120 000, le ba ba neng ba tshotse mara le metsu ba le 12 000 ba ba palamang dipitse. ₁₆Ba, a ba rulaganya fela jaaka mophato wa batlhabani o tle o rulaganyediwe tlhabano. ₁₇Ke fa a phutha namane e tona ya palo ya dikamela, ditonki le meboulo gore di tle di tseye dithoto; le dinku, dikgomo le dipudi tse dintsintsi gore e nne mofago. ₁₈Monna mongwe le mongwe o ne a newa dijo tse dintsi le mokoa o o lekanyeng wa gouta le selefera, tsotlhe tse di tšwa mo kgwatlheng ya kgosi.

₁₉Ke fa a bolola a ya go tlhasela ka mophato otlhe wa gagwe wa batlhabani a eteletse Kgosi Nabukadenesa pele, a ya go khurumetsa mhama otlhe wa lefatshe, go ya ntlheng ya bophirimatsatsi, ka dikara tsa gagwe, batlhabani-bapalami ba gagwe le ditlhopha tse di tlhaotšweng tsa batlhabani ba ba tsamayang ka dinao. ₂₀Lesomo le legolo la batho le le tlhakatlhakanyeng le ne la ba sala morago, le tšhwana le lesogodi la tsie, le tshwana le ditlhaka tsa motlhaba wa lefatshe; bontsintsi jo bo neng bo ka se ka jwa balwa.

₂₁Ke fa ba tsamaya malatsi a le mararo go tšwa mo Ninefe go ya kwa leboeng la Beketilethe. Go tšwa mo Beketilethe ba ne ba ya go thibelela gaufi le dithaba tse di ntlheng ya bokone jwa Silisia-Bogodimo. ₂₂Go tšwa foo Holofernese o ne a tsaya mophato wa gagwe otlhe a tsaya batlhabani ba ba tsamayang ka dinao, batlhabani-bapalami le dikara a ya ntlheng ya dithota. ₂₃A phunyeletsa Pute le Lude ka tshenyako, a bo a ripitla batho botlhe ba Rassise le Maišemaele ba ba neng ba nna ba rakaletse mo sekakeng, kwa borweng jwa Keleone,

₂₄a tsamaya a bapile le Eufaratese, a kgabaganya Mesopotamia, a senyaka metse yotlhe e e mo godimo ga dithaba go bapa le molatšwana wa Aberone, a bo a fitlha kwa lewatleng. ₂₅E rile a tšwa foo, a tlhasela dikgaolo tsa Silisia, a bolaya botlhe ba ba neng ba re ba a itsetsepela ba kgaratlha nae, a ya ntlheng ya melelwane e e borwa jwa Jafethe, e e lebaganyeng le Arabia. ₂₆O ne a dikaganyetsa Mamidianite ka ntlha tsotlhe, a tshuba ditante tsa bone, a bo a rutlolola maraka a dinku tsa bone a a senyaka.

₂₇A bo a fologela kwa leboeng la Damaseko ka nako ya thobo ya korong, mme a fisa masimo a bone otlhe, a bolaaka matsomane le metlhape, a ripitlaka metse ya bone, a senyaka mafatshe a bone mme a bolaya makawana a bone otlhe ka lerumo. ₂₈Batho botlhe ba ba neng ba nna go bapa le lotshitshi lwa lewatle ba ne ba tshoga thata ba bo ba sala ba roroma. Merafe yotlhe ya Sidone le Tire, ya Sure, Okina, Jammia, Asotus, Asekalone, e ne e tshogile tota.