1“Bakang Modimo wa me ka moropa,
opelelang Morena ka phaphatšhana,
a pesalema le pina di o tlhakanele,
godisang leina la one, lo bitseng!
2Gonne Morena ke Modimo o o phatlakanyang dintwa;
o thibeletse mo gare ga batho ba one go nnamola mo diatleng tsa baba ba me.
3Asiria o ne a fologa mo dithabeng tsa bokone,
a tla ka masome a dikete tsa mophato wa gagwe.
Bontsintsi jwa bone bo ne jwa kganela melatswana,
dipitse tsa bone tsa khurumetsa makgabana.
4O ne a solofetsa go fisa lefatshe la ga etsho,
go bolaaka makawana a me ka lerumo,
go bataganya maseana a me fa fatshe,
go thopa bananyana ba me,
go sia ka makgarejana a me;
5fela Morena yo o thatayotlhe o ba kotetse ka seatla sa mosadi.
6Gonne mogale wa bone ga aa ka a digwa ke diatla tsa makawana,
ga se barwa ba ga Titane ba ba neng ba mo piriganya,
ga se bakaloba bangwe ba ba neng ba tlhasela,
ke Judithe, morwadia Merari, yo o mo amogileng dibetsa ka bontle jwa sefatlhogo sa gagwe.
7O ne a apola seaparo sa gagwe sa botlholagadi
go bopaganya ba ba neng ba gateletšwe mo Iseraele;
a itlotsa sefatlhogo ka setlolo se se nkgang monate,
8a ikhapa moriri ka tukwi,
a apara seaparo se se maburabura sa letsela la leloba go mo hepisa.
9Rampheetšhane wa gagwe o ne a tsubula leitlho la gagwe,
bontle jwa gagwe jwa dira moya wa gagwe legolegwa ...
mme segai sa putlaganya molala wa gagwe!
10Maperesia a ne a roromisiwa ke bopelokgale jwa gagwe,
Mamede a tshosiwa ke bogatlhamedi jwa gagwe.
11Ba, ba ne ba gamarega fa boesengmang ba me ba goa,
ba, ba ne ba roromaka fa digogou tsa me di galaotega,
mme ya re ba gogotla ba inaya naga.
12Bananyana ba banyananyana ba, ba ne ba ba phunyaka,
jaaka bana ba batshabi ba ba tlhabaka.
Ba ne ba nyelela mo ntweng ya Morena wa me.
13Ke tlaa opelela Modimo wa me sefela se seša.
Morena, O mogolo, O a bakega,
O nonofile ka mokgwa o o gakgamatsang, ga O fenyege.
14A dibopiwa tsotlhe tsa gago di go direle!
Gonne O ne wa bua mme dilo tsa tlholega,
wa romela moya wa gago mme tsa bopiwa,
mme ga go na ope yo o ka ganetsanang le lentšwe la gago!
15Le fa dithaba di ka pitikologa tsa kopakopana le makhubu,
le fa mafika a ka nyera jaaka mafura fa pele ga sefatlhogo sa gago,
go ba ba go boifang O tlaa bo O ntse O le pelotlhomogi.
16Setlhabelo se se nkgang monate ruri ke selo se sennye,
mme se sennye go feta ke mafura a O a fisediwang mo setlhabelong se se fisiwang gotlhelele;
fela mongwe le mongwe yo o boifang Morena o mogolo ka bosafeleng.
17Go hutsegile ditšhaba tse di tsogologelang batho ba me!
Morena Mothatayotlhe o tlaa ba otlhaya ka letsatsi la katlholo.
O tlaa romela molelo le diboko mo nameng ya bone,
mme ba tlaa bokolela ka bosafeleng ka ntlha ya botlhoko!”
18E rile batho ba fitlha kwa Jerusalema ba itigela fatshe ka mpa ba obamela Modimo, mme e rile fela ba sena go phepafadiwa, ba ntsha ditlhabelo tse di fisiwang gotlhelele tsa bone le ditlhabelo tsa boitlhophelo tsa bone le dimpho tsa bone. 19Judithe o ne a abela Modimo dilo tsotlhe tsa ga Holofernese tse a neng a di filwe ke batho le sekhukhu se ka boene a neng a se tsere fa godimo ga bolao, a di aba e le neelo e e šometšweng Morena. 20Batho ba ne ba ipela dikgwedi di le tharo mo Jerusalema fa pele ga Tempele, fa Judithe a neng a nna nabo teng.
Judithe O Gola A bo A Tsofala. Loso Lwa Gagwe
21E rile mo go sena go fela mongwe le mongwe a boela gae. Judithe a boela kwa Bethulia mme a nna mo setsheng sa gagwe; mme mo botshelong jwa gagwe o ne a itsege thata a tlotlegile mo lefatsheng lotlhe. 22Ba le bantsi ba ne ba re ba a mo nyala, fela mo malatsing otlhe a gagwe, go tšwa nakong e monna wa gagwe Manasse a neng a tlhokafala ka yone a bo a isiwa kwa bathong ba ga gabo, o ne a se ka a ineela monna ope yo mongwe. 23Go tuma ga gagwe ga nna ga oketsega fa a ntse a tsofalela mo tlung ya monna wa gagwe; a gola a bo a nna le dingwaga tse di 105. A golola mohula wa gagwe, a bo a tlhokafala a ntse a le gone mo Bethulia mme a fitlhwa mo legageng le monna wa gagwe, Manasse, a neng a fitlhilwe mo go lone. 24Ntlo ya Israela ya mo lelela malatsi a a supileng. Pele ga a tlhokafala o ne a abetse ba losika lwa ga gabo le lwa gaabo Manasse, monna wa gagwe, dilo tsa gagwe. 25Fa Judithe a sa ntse a tshela, le moragorago ga loso lwa gagwe, go ne ga se ka ga bo ga nna le ope yo o neng a ba a tshwenya bana ba Iseraele.
