1Nako e ne e setse e fetile mme batlhanka ba gagwe ba ne ba itlhaganela ba tsamaya. Bagoase a tšwala tante a le ka kwa ntle, a sena go ntsha ba ba neng ba ntse ba diadiega fa pele ga morena wa bone. Ba ya go robala ba lapile ka ntlha ya nno ya bone, 2mme Judithe a sala a le esi mo tanteng le Holofernese yo o neng a lapetse mo godimo ga bolao, a fentšwe ke veini. 3Jaanong Judithe a bolelela mohula wa gagwe gore a emele ka fa ntle ga ntlo ya boroko a mo lete go fitlhelela a tla jaaka a ne a tle a mo lete moso mongwe le mongwe. O ne a boletse gore o tlaa tšwela kwa ntle go ya go rapela, mme selo se o ne a se boleletse le Bogoase.
4Ka nako e jaanong mongwe le mongwe o ne a setse a dule fa go Holofernese, mme go ne go se na ope, wa maemo kgotsa yo e seng wa maemo, yo o neng a sa ntse a setse mo tlung ya boroko.
Ke fa Judithe e re a eme fa thoko ga bolao, a bua a le esi a re,
“Morena Modimo, wena yo thata e leng ya gago,
a O ko O segofatse se diatla tsa me di tlogang di se dira,
di se direla go oketsa tlotlo ya Jerusalema,
5ke nako jaanong go sela bošwa jwa gago
le go nthusa mo maikaelelong a go nyeletsa baba ba ba tsileng go re tlhasela.”
6Ya re a sena go bua jaana, a ya kwa mopakong wa bolao gaufi le tlhogo ya ga Holofernese mme a folosa lerumo teng. 7A atamela bolao mme a mo tšhwara ka moriri a re, “A O ko O nthatafatse gompieno, Morena Modimo wa Iseraele!” 8Ka thata ya gagwe yotlhe a mo rema monyetsane gabedi, a mo kgaola tlhogo. 9Ke fa a pitikolola mmele wa gagwe a o diga mo bolaong, a bo a kgakgamolola sekhukhu mo mepakong ya bolao.
A bo a tloga a tšwela kwa ntle a neela mohula wa gagwe tlhogo ya ga Holofernese, 10ene a e tsenya mo kgetsaneng ya dijo.
Boobabedi jaanong ba tšwa mo bothibelelong mmogo, jaaka ba ne ba tlhola ba tšwa fa ba ne ba ya go rapela. E rile fela ba sena go tšwa mo bothibelelong, ba iphaphatha le kgoro ya thaba, ba tlhatloga thaba go ya Bethulia mme ba ya ba lebile dikgoro tsa gagwe.
Judithe o tsisa Tlhogo ya ga Holofernese kwa Bethulia
11Ya re Judithe a sa ntse a le kgakala, a goa batlhabani-balebeledi ba dikgoro a re, “Bulang kgoro! Bulang! Gonne Morena Modimo wa rona o sa ntse o na le rona, o bontsha thata ya one mo Iseraele le nonofo ya one kgatlhanong le baba ba rona, jaaka o bontshitse gompieno!”
12Ya re banna ba motse ba utlwa lentšwe la gagwe ba itlhaganela ba fologela kwa kgorong ya motse mme ba bitsa bagolwane. 13Mongwe le mongwe, yo mogolo le yo monnye, a fologa a tabogile, gonne go goroga ga gagwe go ne go sa lebelelwa.
Ba bula kgoro ka bonako, ba amogela basadi ba ka mabogo a mabedi, ba besa molelo gore ba tle ba bone ka one mme ba ba phuthaganela. 14Judithe a bo a buela godimo a re, “Bakang Modimo! O bakeng! Bakang Modimo o o se kang wa tlosa boutlwelo-botlhoko jwa one mo tlung ya Iseraele, o o mpileng wa phatlalatsa baba ba rona ka seatla sa me bosigong jono!” 15A somola tlhogo mo kgetsaneng, a e tsholeletsa kwa godimo gore ba e bone, mme a re, “Se ke tlhogo ya ga Holofernese, molaodi yo mogolo wa mophato wa Maasiria; sekhukhu se a neng a kgophaletse ka fa tlase ga sone a tlhapetswe ke se! Morena o mo digetse fatshe ka seatla sa mosadi! 16A Morena yo o ntshireleditseng mo mokgapheng o ke neng ke le mo go one a tlotliwe! O ne a okiwa ke sefatlhogo sa me go feta selekanyo, a bo a ipolaile! Ga a ise a dire sebe sepe le nna go ntlhabisa ditlhong kgotsa go ntsholola.”
17Batho botlhe ya re ba gamaregile jaana, ba wela fa fatshe ka mangole ba obamela Modimo, ba goa jaaka e kete ke motho a le mongwe fela ba re, “A O ko O bakwe, Oh Modimo wa rona, O bakelwe go tseanya baba ba batho ba gago gompieno.”
18Ke fa Usia a raya Judithe a re,
“Morwadiaka, a O bakwe ke Modimo Mogodimodimo,
go feta basadi botlhe mo lefatsheng;
mme a Morena Modimo o bakwe,
one o e leng Motlhodi wa legodimo le lefatshe,
one o ka tsamaiso ya one O kgaotseng tlhogo ya moeteledipele wa baba ba rona.
19Boikanyo jo O bo supileng
ga bo kitla bo tšwa mo kgakologelong ya batho,
bo tlaa nna bo ba gakolola thata ya Modimo.
20A Modimo o dire gore O nne O tlotlwe ka gale,
O bo O duelwe ka dipako,
gonne ga O a ka wa rekegela botshelo jwa gago
fa setshaba sa rona se tlontlololwa, mme O ne wa kotela tshenyego ya rona,
O tsamaya O sa boife sepe fa pele ga Modimo.”
Batho botlhe ba araba ba re, “Amen! Amen.”
