BAATLHODI 5

₂“E re ka bagogi ba ne

ba etelela Baiseraele pele,

le morafe o utlwa

ka bopelotshweu,

bokang Morena!

₃Utlwang lona dikgosi!

Sekegang ditsebe

lona dikgosana!

Nna ke tla opelela Morena,

ke leletsa Morena

Modimo wa Iseraele.

₄Morena,

e rile fa o tswa kwa Seire,

ya re o gata o tlhaga

nageng ya Etomo

lefatshe la roroma,

magodimo a rotha,

maru a rotha metsi.

₅Dithaba tsa reketla

fa pele ga Morena,

thaba eo ya Sinai

fa pele ga Morena,

Modimo wa Iseraele.

₆Mo malatsing a ga Samegare

morwa Anathe,

mo malatsing a ga Jaele

ditsela di ne di le senya;

baeti ba tsamaya

mo ditselaneng

tse di kwa thoko

tse di metsopodia.

₇Go ne go tlhokafala babusi

mo Iseraeleng,

ba tlhokafala

ga tsamaya ka tsoga,

nna Debora,

ka tsoga ke le Mma-Iseraele.

₈E rile ba ineela

medimo e mešwa,

ga nna tlhabano

mo dikgorong;

thebe le lerumo tsa bo

di sa bonale mo diketeng

tse di 40 tsa Iseraele.

₉Pelo ya me e goga le balaodi

ba Iseraele

ba ba ineetseng

ka bopelotshweu

mo gare ga morafe.

Bakang Morena!

₁₀Ba lo palameng diesele

tse ditshwaana,

ba lo dutseng mo diphateng

tse di logilweng,

ba lo sepelang mo tseleng:

Akanyang!

₁₁Ka ntlha ya mantswe

a ba ba binang

mo gare ga digopo,

ba boka teng ditiro

tse di siameng tsa Morena,

ditiro tsa pholoso tsa puso

ya gagwe mo Iseraeleng.

Ke fa morafe wa Morena

o fologela kwa dikgorong.

₁₂Tsoga! Tsoga, Debora!

Tsoga, tsoga, o tlhabe sefela!

Nanoga, Barake,

o ise batshwarwi ba gago

mo botshwarong,

wena morwa Abinoame.

₁₃Ke fa masalela a batlotlegi

ba morafe a fologa;

Morena a fologa go nthusa

a le mo gare ga bagale.

₁₄Ba tswa kwa Eferaime

ba ba agileng mo nageng

ya Amaleke;

Babenyamene ba go latela mo

gare ga batlhabani ba gago;

balaodi ba fologa kwa Magire;

ba ba bololang ba latetse

thobane

ya molaodi wa batlhabani,

ba tswa kwa Sebulone.

₁₅Balaodi ba Isašare

ba tla le Debora;

Barake a tla jaaka Isašare.

Ba romelwa mogorogorong,

ba mo setse morago.

Kwa dinageng tsa ga Rubene

ga bo go le maikgogomoso

a magolo a dipelo fela.

₁₆Ke ka ntlha ya eng,

fa o ne o itulela kwa merakeng

go utlwelela melodi

kwa matsomaneng?

Kwa dinageng tsa ga Rubene

ga bo go le dikakanyo

tse dikgolo tsa dipelo fela.

₁₇Gileate o ne a itulela

kwa moseja ga Joretane.

Ke eng fa Dane a le

mo mekorong?

Asere a itunna fa losing

lwa lewatle,

a nna kwa matsibogong

a lone.

₁₈Basebulone ke batho

ba ba neelang maphelo

a bone mo losong;

le Banafetale ba ntse jalo

mo dithoteng tsa naga.

₁₉Ga tla dikgosi, tsa tlhabana;

foo ga tlhabana dikgosi

tsa Kanana kwa Thaenage

fa metsing a Megito –

di sa bone thopo ya selefera.

₂₀Dinaledi tsa tlhabana

di tswa kwa legodimong;

tsa tlhabana le Sisera di tswa

mo ditseleng tsa tsona.

₂₁Nokana ya Kisone

ya ba tsaya.

Ke nokana ya ditlhabano,

nokana ya Kisone!

Jaa moepelane, mowa wa me!

₂₂Foo ditlhako tsa dipitse

tsa tiba ka go patakanya,

go patakanya ga dipitse

tse di lebelo tsa gagwe.

₂₃Hutsang motse wa Merose,

go bua Moengele wa Morena;

hutsang lo hutse baagi ba ona,

ka ba se ka

ba tla go thusa Morena,

go thusa Morena

mo gare ga bagale.

₂₄A go tshegofadiwe Jaele

bogolo go basadi botlhe,

ene mosadi wa ga Hebere

wa Mokeni!

A a tshegofadiwe mo lapeng

bogolo go basadi botlhe!

₂₅Sisera a kopa metsi;

Jaele a mo naya mašwi,

a tlisa madila ka mogopo

wa batlotlegi.

₂₆A isa letsogo kwa lomapong,

le le jang kwa notong

ya badiri;

a rutha Sisera,

a pšhwetlakanya

tlhogo ya gagwe,

a e silakanya;

a mo phololetsa letlhwana.

₂₇A idibala, a wela fa fatshe,

a namalala fa gare

ga dinao tsa gagwe;

a idibala, a wela fa fatshe

fa gare ga dinao tsa gagwe.

Fa a neng a idibala teng,

a namalala a bolailwe.

₂₈Mmaagwe Sisera

a okomela ka fenstere,

a kua fa phatlheng ya phefo

a re:

‘Ke eng fa koloi ya gagwe

e diega go tla?

Ke eng fa medumo

ya dipitse tsa gagwe

e sa akofe?’

₂₉Ba ba botlhale ba bahumagadi

ba gagwe ba mo fetola;

le ene ka esi a fetola

mafoko a gagwe a re:

₃₀‘Kooteng ba bonye thopo,

ba e abelana gore

monna mongwe le mongwe

a bone mosetsana,

gongwe basetsana

ba le babedi;

thopo ya diaparo tse di

marabata tsa ga Sisera;

thopo ya diaparo

tse di marabata,

lesela le le marabata,

masela a a marabata

a le mabedi

ke thopo ya molala wa me.’

₃₁A baba botlhe ba gago,

Morena, ba latlhege jalo!

Mme ba ba go ratang

ba tshwana le letsatsi,

fa le tlhaba

ka kgalalelo ya lone.”