BAATLHODI 2

₁Moengele wa Morena o ne a bolola kwa Gilegala, a tla kwa Bogime a re: “Ke lo ntshitse kwa Egepeto, ka lo fitlhisa mo lefatsheng le ke neng ke ikanetse borraeno ka lone ka re: ‘Ga nkitla ke senya kgolagano ya me le lona ka bosakhutleng.’ ₂Ka re: ‘Lona lo se ka lwa dira kgolagano le baagi ba lefatshe le, mme lo dige dialetare tsa bone,’ mme lwa se ka lwa utlwa lentswe la me. Ke eng se lo se dirileng? ₃Ke ka moo le nna ke reng: Ga nkitla ke ba leleka fa pele ga lona gore ba lo bogise, mme medimo ya bone e nne thaelo mo go lona.” ₄E rile moengele wa Morena a sena go bolelela Baiseraele botlhe mafoko ao batho ba tlhatlosa mantswe, ba lela; ₅ba taya felo foo leina la Bogime, ba direla Morena ditlhabelo teng.

₆E rile Jošua a sena go naya morafe tsela, mongwe le mongwe a boela kwa nageng ya boswa jwa gagwe go rua lefatshe. ₇Morafe wa direla Morena ka malatsi otlhe a ga Jošua le ka malatsi otlhe a bagolo ba ba neng ba phela sebaka se seleele sehularong sa ga Jošua ba ba bonyeng ditiro tse dikgolo tsotlhe tsa Morena tse o di diretseng Baiseraele. ₈Jaanong e rile Jošua morwa Nune motlhanka wa Morena a sena go swa, a le dinyaga di le 110, ₉ba mo fitlha mo nageng ya boswa jwa gagwe kwa Thimenatherese kwa dithabeng tsa ga Eferaime mo ntlheng ya bokone ya thaba ya Gaaše. ₁₀Ya re botlhe ba metlha ele ba sena go gorosiwa kwa go borraabo, ga tsoga ba bašwa sehularong sa bone ba ba sa itseng Morena le e seng ditiro tse o di diretseng Baiseraele.

₁₁Ke fa Baiseraele ba dira tse di bosula mo matlhong a Morena, ba direla boBaale, ₁₂ba tlogela Morena, Modimo wa borraabo, yo o ba ntshitseng kwa lefatsheng la Egepeto, ba latela medimo e sele, e bong medimo ya merafe e e mo tikologong ya bone, ba e obamela, ba gakatsa Morena ka go dira jalo. ₁₃Mme e ne ya re fa ba tlogela Morena, ba direla Baale le boAšethorethe, ₁₄Morena a tukele Baiseraele bogale, a ba neele mo diatleng tsa bathukhuthi, ba ba thukhuthe dilo, a ba rekise mo diatleng tsa baba ba bone tikologong, mo ba neng ba sa tlhole ba kgona go emelana le baba ba bone. ₁₅Gongwe le gongwe kwa ba neng ba tswela teng seatla sa Morena se ne se lwa nabo go ba direla tse di botlhoko, jaaka Morena a ne a boletse le jaaka Morena a ne a ba ikanetse.

Mme e ne ya re fa ba le mo tlalelong e kgolo. ₁₆Morena a ba tsosetse baatlhodi, ba ba golole mo diatleng tsa bathukhuthi ba bone. ₁₇Fela le baatlhodi ba bone Baiseraele ba se ka ba ba utlwa; gonne ba ne ba dira boaka ka go latela medimo e sele, ba e obamela. Ba fapoga ka pele mo tseleng e borraabo ba neng ba sepetse mo go yona ka go utlwa ditaolo tsa Morena. Bone ba se ka ba dira jalo.

₁₈Mme e ne ya re fa Morena a ba tsosetsa baatlhodi, Morena a nne le baatlhodi, a ba golole mo diatleng tsa baba ba bone ka malatsi aotlhe a moatlhodi. Ka gonne Morena o ne a ba tlhomogela pelo, fa ba ledisiwa ke ba ba ba pitlaganyang, ba ba gatelela. ₁₉Fela e ne ya re fa moatlhodi a swa, ba boele kwa morago, ba senye bogolo go borraabo ka go latela medimo e sele, ba e direle, ba e obamele. Ba se ke ba tlogele sepe sa ditiro tsa bone le sa tsamao ya bone ya botlhogoethata. ₂₀Ka moo Morena a tukela Baiseraele bogale a re: “E re ka setšhaba se, se tlodile kgolagano ya me e ke e laetseng borraabo, sa se ka sa utlwa lentswe la me, ₂₁le nna ga nkitla ke tlhola ke leleka ope fa pele ga bone wa ditšhaba tse Jošua o neng a di tlogela, jale fa a swa ₂₂gore ke tle ke leke Baiseraele ka tsona, ke bone gore a ba tla tlhokomela ditsela tsa Morena go sepela mo go tsona jaaka borraabo ba di tlhokometse gongwe nnyaya.” ₂₃Morena a sadisa ditšhaba tseo jalo, a se ka a di leleka ka pele le e seng go di neela mo diatleng tsa ga Jošua.