JESAYA 32

₁Bonang, kgosi e tla busa ka molao; dikgosana di tla laola ka tshiamo. ₂Mme mongwe le mongwe o tla nna jaaka botshabelo mo ledimong, le jaaka leobo mo puleng, le jaaka dinoka tsa metsi mo nageng e e omeletseng, le jaaka moriti wa lefika le legolo mo nageng ya lenyora. ₃Matlho a baboni ga a kitla a tlhola a fatlhega. Ditsebe tsa bautlwi di tla utlwelela. ₄Dipelo tsa ba ba makgakga di tla tlhaloganya kitso. Diteme tsa ba ba koakoetsang di tla bua sentle ka thanolo. ₅Lesilo ga le nke le tlhola le bidiwa letlhale. Molotsana ga a nke a bidiwa motlotlegi. ₆Gonne lesilo le bua bosilo. Pelo ya lone e loga maano a boithamako gore le dire tsa boikepo, le ganetse Morena ka tse di sokameng, le time yo o tshwerweng ke tlala, le tlhokise yo o bolawang ke lenyora metsi. ₇Dibolai tsa molotsana di bosula. O loga maano a a sokameng gore a senyetse babogisegi ka dipolelo tsa maaka, le fa mohumanegi a bua nnete fela. ₈Mme yo o pelontle o akanya tsa bopelontle, le gona o tla nna a emela tsa bopelontle.

₉Lona basadi ba lo iketlileng, tsogang lo utlwe lentswe la me! Lona barweetsana ba lo tlhokomologang, sekegelang mafoko a me tsebe!

₁₀E tla re ngwaga o sena go feta le malatsi mangwe, lo tetesele, lona ba lo sa tshwenyegeleng sepe. Gonne go fula maungo a moweine go fedile; go phutha maungo a ditlhare ga go teng. ₁₁Roromang, lona basadi ba lo iketlileng! Teteselang, lona barweetsana ba lo tlhokomologang! Apolang gotlhe, lo apare diaparo tsa bohutsana. ₁₂Itshwareng diledu lo lelele masimo a mantle le moweine o o ungwang sentle, ₁₃le tshimo ya morafe wa me e e tlhogang mesu le ditshetlho; ee, lo lelele matlo otlhe a boitumelo le motse o o duduetsang. ₁₄Gonne matlo a borena a tlogetswe, modumo wa motse o fetogile tidimalo.

Thabana le serala sa ditlhodi e tla nna naga fela ka go sa feleng, fa diesele di itumelang teng, fa matsomane a fulang teng, ₁₅go fitlhelela rona re goromelediwe Mowa o o tswang kwa godimo. Foo sekaka se tla fetoga tshimo ya ditlhare tse di ungwang, mme tshimo ya ditlhare tse di ungwang e tla kaiwa sekgwa. ₁₆Mme molao o tla bo o agile mo sekakeng, tshiamo e tla nna mo tshimong ya ditlhare tse di ungwang. ₁₇Foo tiro ya tshiamo e tla nna kagiso; leungo la molao e tla nna boikhutso le boiketlo ka go sa feleng. ₁₈Morafe wa me o tla nna mo felong ga kagiso, mo matlong a a sireleditsweng, mo maikhutsong a boiketlo. ₁₉Mme sefako se tla na, fa sekgwa se digwa; motse o tla kokobelela fa fatshe. ₂₀Lo letlhogonolo, ka masimo otlhe a lona a le fa metsing, ka lo funolola maoto a kgomo le esele gore di itsamaele gongwe le gongwe.