HOSEA 2

₁Rayang bomorwa-rraalona lo re: “Bathobame”, le bokgaitsadia-lona: “Bautlwetswe-botlhoko”.

₂“Sekisang mmaalona, lo mo sekise, gonne ga se mosadi wa me, le nna ga ke monna wa gagwe. A a tlose boaka jwa gagwe mo sefatlhegong sa gagwe le kgokafalo ya gagwe mo mabeleng a gagwe. ₃Go seng jalo ke tla mo apola gotlhe, ke mmaya jaaka a ne a ntse ka letsatsi la botsalo jwa gagwe. Ke tla mo dira jaaka sekaka, ke mmaya jaaka naga e e omeletseng, ke mmolaya ka lenyora. ₄Bana ba gagwe ga nka ke ka ba utlwela botlhoko, gonne ke bana ba dikgora. ₅Gonne mmaabo o akafetse; yo o ba tsetseng o dirile tsa ditlhong. Gonne o rile: ‘Ke rata go sala dinyatsi tsa me morago, tse di mphang bogobe le metsi le maboa a dinku le letseta le lookwane le tse di nowang.’

₆“Ka ntlha ya moo, bonang, ke tla thiba tsela ya gagwe ka matlhaku, ke mo kganela ka lorako gore a se ka a bona ditselana tsa gagwe. ₇O tla sala dinyatsi tsa gagwe morago, mme ga a nke a di fitlhela; a di batla, mme ga a nke a di bona. Ke fa a tla re: ‘Ke tla ya ke boela kwa monneng wa me wa ntlha; gonne ka sebaka sele go ne go le molemo mo go nna bogolo go kajeno.’

₈“Mme ga a ka a lemoga gore ke nna ke mo neileng mabele le matute a moweine le lookwane; ke mo ntsifaleditse selefera le gouta tsa ba diretseng Baale ka tsona. ₉Ka ntlha ya moo ke tla boa ke tsaya mabele a me mo nakong ya ona, le matute a me a moweine ka nako ya ona; ke phamola maboa a dinku tsa me le letseta la me tse a ikapesang ka tsona. ₁₀Jaanong ke tla bipolola ditlhong tsa gagwe fa pele ga dinyatsi tsa gagwe, go se ope yo o ka mo gololang mo letsogong la me. ₁₁Ke tla khutlisa boitumelo jotlhe jwa gagwe le meletlo ya gagwe le ngwedi o o rogilweng wa gagwe le boSabata ba gagwe le dipaka tsotlhe tsa meletlo ya gagwe. ₁₂Ke tla senya setlhare sa moweine le sa feie tsa gagwe tse a rileng: ‘Ke tuelo e ke e filweng ke dinyatsi tsa me.’ Ke tla di fetola sekgwa se se jewang ke diphologolo tsa naga. ₁₃Ke tla mmeletsa malatsi a boBaale ba o ba tshubetseng maswalo, a ikgabisa ka manyena a gagwe le ka dibaga tsa gagwe tsa molala, a sala dinyatsi tsa gagwe morago, mme nna a ntebala,” go bua Morena.

₁₄“Ka moo bonang, ke tla mo eka, ke mo isa kwa sekakeng, ke bua tse di kgatlhang pelo ya gagwe. ₁₅Morago ga moo ke tla mo naya masimo a moweine a gagwe le mokgatsha wa Agore go nna kgoro ya tsholofelo. Teng foo o tla opela jaaka mo malatsing a bošwa jwa gagwe, le jaaka ka letsatsi le a duleng kwa lefatsheng la Egepeto ka lone. ₁₆Ka letsatsi leo o tla mpitsa: ‘Monna wa me;’ mme o sa tlhole o mpitsa: ‘Baale wa me,’ ” go bua Morena. ₁₇“Ke tla tlosa maina a boBaale mo molomong wa gagwe gore ba se tlhole ba bidiwa ka maina a bona.

₁₈“Ka letsatsi leo ke tla ba direla kutlwano le diphologolo tsa naga le dinonyane tsa loapi le dilo tse di gagabang fa fatshe; ke tla roba bora le tšhaka le tsa ntwa gore di tswe mo lefatsheng, ke ba ikhutsisa mo phemelong.