GENESI 46

₁Ke fa Iseraele a huduga, a tsaya tsotlhe tse e leng tsa gagwe. Ya re a sena go fitlha kwa Bereseba, a tlhabela Modimo wa ga Isaka rraagwe ditlhabelo. ₂Mme Modimo wa bua le Iseraele ka pono ya bosigo wa re: “Jakobe, Jakobe!” A araba a re: “Ke fano!”

₃Modimo wa re: “Ke nna Modimo, e bong Modimo wa ga rraago. Se boife go hudugela kwa Egepeto; gonne ke tla go dira setšhaba se segolo teng. ₄Nna ka nosi ke tla ya nao kwa Egepeto; le gona ke nna ke tla go ntshang teng gape. Mme Josefa o tla budulatsa matlho a gago.”

₅Jakobe a tloga kwa Bereseba. Bomorwa Iseraele ba palamisa Jakobe rraabo le bana ba bone le basadi ba bone mo dikoloing tse Farao a di rometseng go mo hudusa ka tsona. ₆Ba tsaya diruiwa tsa bone le dithoto tsa bone tse ba di bapetseng mo lefatsheng la Kanana, ba fitlha kwa Egepeto, Jakobe le losika lotlhe lwa gagwe nae, ₇e bong bomorwawe le bomorwa bomorwawe le bomorwadie le bomorwadia bomorwawe; a ya le losika lotlhe lwa gagwe kwa Egepeto.

₈Maina a bomorwa Iseraele ba ba ileng kwa Egepeto ke a, ke a ga Jakobe le bomorwawe: Motsalwapele wa ga Jakobe ke Rubene. ₉Bomorwa Rubene ke Henoge le Phalo le Heserone le Karemi. ₁₀Bomorwa Simeone ke Jemuele le Jamine le Ohate le Jagine le Sohare le Saule morwa mosadi wa Mokanana. ₁₁Bomorwa Lefi ke Geresone le Kahathe le Merari. ₁₂Bomorwa Juta ke Ere le Onane le Sela le Pherese le Sera. Mme Ere le Onane ba ne ba swela mo lefatsheng la Kanana. Bomorwa Pherese e ne e le Heserone le Hamule. ₁₃Bomorwa Isašare ke Thola le Phuwa le Jobe le Simerone. ₁₄Bomorwa Sebulone ke Serete le Elone le Jahalele. ₁₅Ke bone bomorwa Lea ba o ba tsaletseng Jakobe kwa Phatane-Arame mmogo le Dina morwadie. Bomorwawe le bomorwadie botlhe e ne e le batho ba le 33.

₁₆Bomorwa Gate ke Sifione le Haki le Suni le Esebone le Eri le Arodi le Aredi. ₁₇Bomorwa Asere ke Imena le Iswa le Iswi le Beria le Sera kgaitsadia bone. Bomorwa Beria ke Hebere le Malekhiele. ₁₈Ke bone bomorwa Silepa yo Labane a mo neetseng Lea morwadie, a tsalela Jakobe bana bao, mmogo e le batho ba le 16.

₁₉Bomorwa Ragele mosadi wa ga Jakobe ke Josefa le Benyamene. ₂₀Mme Josefa a tsala Manase le Eferaime mo lefatsheng la Egepeto, a ba tsala le Asenathe morwadia Photifera, moperesiti wa kwa One. ₂₁Bomorwa Benyamene ke Bela le Begere le Asebele le Gera le Naamane le Egi le Roše le Muphime le Huphime le Arete. ₂₂Ke bone bomorwa Ragele ba ba tsaletsweng Jakobe. Mmogo ke batho ba le 14.

₂₃Morwa Dane ke Hušime fela. ₂₄Bomorwa Nafetale ke Jahaseele le Guni le Jesere le Sileme. ₂₅Ke bone bomorwa Bileha yo Labane a mo neetseng Ragele morwadie; a tsalela Jakobe bana bao, mmogo e le batho ba supa.

₂₆Batho botlhe ba ba ileng le Jakobe kwa Egepeto ba e leng bana ba mmele wa gagwe, go sa balwe basadi ba bomorwa Jakobe, mmogo ke batho ba le 66. ₂₇Bomorwa Josefa ba o ba tsetseng kwa Egepeto ba bedi fela. Ba lapa la ga Jakobe botlhe ba ba ileng kwa Egepeto ba ne ba le 70.

₂₈Jakobe o ne a roma Juta gore a ye kwa pele kwa go Josefa gore ene Josefa a ba baakanyetse magorogelo kwa Gosene. Ba fitlha kwa nageng ya Gosene. ₂₉Ke fa Josefa a baakanya koloi ya gagwe, a bolola go kgatlhantsha Iseraele rraagwe kwa Gosene. Ya re a mmona, a wela mo molaleng wa gagwe, a lelela sebaka mo molaleng wa gagwe. ₃₀Mme Iseraele a raya Josefa a re: “Jaanong nka swa ka boitumelo, ka ke bonye sefatlhego sa gago o sa ntse o phela.”

₃₁Josefa a raya bomorwa-rraagwe le ba lapa la ga rraagwe a re: “Ke tla ya, ke begela Farao, ke mo raya ke re: ‘Bomorwa-rre le ba lapa la ga rre ba ba neng ba le kwa lefatsheng la Kanana, ba tlile kwano go nna. ₃₂Banna bao ke badisa ba difutshane – gonne e ne e le beng ba diruiwa – ba tlile le matsomane a bone le metlhape le tsotlhe tse ba nang natso.’ ₃₃Jaanong e tle e re fa Farao a lo bitsa, a lo botsa a re: ‘Tiro ya lona ke eng?’ ₃₄lo arabe lo re: ‘Batlhanka ba gago, rona le borraetsho, re sa le re nna barui ba diruiwa go tswa bonyaneng jwa rona go fitlhelela kajeno!’ gore lo tle lo letlelelwe go aga mo nageng ya Gosene.” Gonne badisa botlhe ba matsomane ba nyatsegile mo go Baegepeto.