EKESODU 40

₁Morena a raya Moše a re: ₂“Tlhoma Tempelana ya Tente ya Boipontsho ka letsatsi la ntlha la kgwedi ya ntlha. ₃O tsenye Letlole la Tshupo mo go yona o sire Letlole ka lesire. ₄O ise lomati mo teng, o rulaganye tse di tshwanetseng mo go lone; o ise setlhomo sa dipone mo teng, o tlhome dipone tsa sona. ₅O bee aletare ya gouta ya maswalo fa pele ga Letlole la Tshupo, o pege sebipo sa mojako wa Tempelana.

₆“Aletare ya ditlhabelo tsa phiso o e bee ka fa ntle ga mojako wa Tempelana ya Tente ya Boipontsho. ₇Mogopo o o tlhapelang o o bee fa gare ga Tempelana ya Boipontsho le aletare eo, o tshele metsi mo go ona. ₈O age logora lwa lelapa mo tikologong, o pege sebipo sa kgoro ya lelapa.

₉“O be o tsee lookwane lwa tlotso, o tlotse Tempelana le tsotlhe tse di mo go yona, o e itshepise jalo le dilo tsotlhe tsa yona gore e nne boitshepo. ₁₀O tlotse aletare ya ditlhabelo tsa phiso le didiri tsotlhe tsa yona, o itshepise aletare gore aletare e nne boitshepotshepo. ₁₁O tlotse mogopo o o tlhapelang le lekoto la ona, o o itshepise jalo.

₁₂“O atametse Arone le bomorwawe kwa mojakong wa Tempelana ya Boipontsho, o ba tlhapise ka metsi. ₁₃O apese Arone diaparo tse di boitshepo, o mo tlotse, o mo itshepise jalo gore a ntirele e le moperesiti. ₁₄O be o atametse bomorwawe, o ba apese dihempe, ₁₅o ba tlotse jaaka o tloditse rraabo gore ba ntirele e le baperesiti. Mme go tlodiwa ga bone go tla fetisetsa boperesiti jo bo sa khutleng mo ditshikeng tsa bone.”

₁₆Moše a dira tsotlhe fela jaaka Morena a mo laetse. ₁₇Tempelana ya tlhomiwa jalo ka la ntlha la kgwedi ya ntlha ya ngwaga wa bobedi. ₁₈Moše a tlhoma Tempelana, a baya ditlhako tsa yona, a emisa dipati tsa yona, a tsenya mephakarego ya tsona, a tlhoma maotwana a yona. ₁₉A tsharolola thulelo ya tente mo godimo ga Tempelana, a baya matlalo a thulelo ya tente mo godimo ga yona jaaka Morena a laetse Moše. ₂₀A ba a tsaya matlapa a molao, a a tsenya mo Letloleng, a somela dithobane mo melepong ya Letlole, a khurumela Letlole ka sekhurumelo sa thuanyo. ₂₁A isa Letlole mo teng ga Tempelana, a pega lesire la masela, a sira Letlole la Tshupo jaaka Morena a laetse Moše.

₂₂A baya lomati mo Tempelaneng ya Boipontsho mo lotlhakoreng lwa bokone lwa moago ka fa ntle ga lesire. ₂₃A baya dinkgwe mo go lone ka thulaganyo fa pele ga Morena, jaaka Morena a laetse Moše. ₂₄A baya setlhomo sa dipone mo Tempelaneng ya Boipontsho, sa lebana le lomati, se le mo lotlhakoreng lwa borwa lwa moago. ₂₅A tlhoma dipone fa pele ga Morena jaaka Morena a laetse Moše. ₂₆A baya aletare ya gouta mo Tempelaneng ya Boipontsho ka fa ntle ga lesire, ₂₇a tshuba maswalo a a nkgang monate mo go yona, jaaka Morena a laetse Moše. ₂₈A pega sebipo sa mojako wa Tempelana.

₂₉Mme aletare ya ditlhabelo tsa phiso a e baya ka fa ntle ga mojako wa moago, mo lapeng la Tempelana ya Boipontsho, a dira setlhabelo se se fisiwang le tshupelo ya dijo mo go yona jaaka Morena a laetse Moše.

₃₀Mogopo o o tlhapelang a o baya fa gare ga Tempelana ya Boipontsho le aletare, a tshela metsi a go tlhapa mo go ona. ₃₁Jaanong Moše le Arone le bomorwawe ba tlhapa diatla le dinao ka ona. ₃₂E ne ya re fa ba tsena mo Tempelaneng ya Boipontsho gongwe ba atamela aletare, ba tlhape jaaka Morena a laetse Moše. ₃₃A aga logora lwa lelapa mo tikologong ya Tempelana mmogo le aletare, a pega sebipo sa kgoro ya lelapa. Moše a fetsa tiro yotlhe jalo.

₃₄Ke fa leru le khurumetsa Tempelana ya Boipontsho le kgalalelo ya Morena e tlala ka moago. ₃₅Mme Moše a palelwa ke go tsena mo Tempelaneng ya Boipontsho, ka gonne leru le ne le le mo godimo go yona le kgalalelo ya Morena e tletse ka moago.

₃₆E ne ya re fa leru le tlhatloga mo moagong, Baiseraele ba bothologe ba tsene mo mesepelong yotlhe ya bone. ₃₇Mme fa leru le sa tlhatloge, ba se ke ba tloge, go fitlhelela letsatsing le, le tlhatlogang ka lone. ₃₈Gonne leru la Morena le ne le le mo godimo ga moago motshegare, mme bosigo go le molelo mo go lone fa pele ga matlho a Baiseraele botlhe mo mesepelong yotlhe ya bone.