Matlapa a mašwa a melao
1Morago ga moo Morena a raya Moše a re: “Ipetlele matlapa a le mabedi a maboti a a tshwanang le ale a pele gore ke kwale mafoko mo matlapeng ao, a a neng a le mo matlapeng a pele, a o a thubagantseng. 2Kamoso o bo o ipaakantse, o tlhatlogele phakela mo thabeng ya Sinai, o eme fa go nna teng mo godimo ga thaba. 3A go se ka ga tlhatloga ope nao; le gona a go se ka ga bonwa ope mo thabeng yotlhe e; le difutshane le dikgomo di se ka tsa atamela thaba e, fa di fula.” 4Moše a betla matlapa a le mabedi a maboti a a tshwanang le a pele, a phakela mo mosong, a tlhatlogela mo thabeng ya Sinai jaaka Morena a mo laetse, a tshotse matlapa a mabedi a maboti ka diatla.
5Ke fa Morena a fologa a le mo lerung, a ema fa go ene, a kua leina la Morena. 6Jaanong Morena a feta fa pele ga gagwe, a kua a re: “Morena! Morena! Ke Modimo o o boutlwelo-botlhoko le boitshwarelo, o o sa feleng pelo, o o letlotlo la bopelotlhomogi le boikanyego; 7o o bolokelang ba le dikete bopelotlhomogi; o o itshwarelang molato le tlolo le boleo, mme o sa lese ope fela o sa mmetse, mme o beletsa bana le bana ba bana tshiamololo ya borraabo go ya losikeng lwa boraro le lwa bone.”
8Ke fa Moše a akofa a ikobela fa fatshe, a obamela 9a re: “Fa ruri ke bonye bopelotlhomogi mo matlhong a gago, Morena, a Morena a ke a ye le rona – gonne ke morafe wa dithamo tse di gagametseng – mme o re itshwarele molato wa rona le boleo jwa rona, o re tshole, re nne ba gago.”
Ntšhwafatso ya Kgolagano
10Ke fa Morena a araba a re: “Bona, ke tla dira kgolagano ya go re: Fa pele ga morafe otlhe wa gago ke tla dira dilo tse di gakgamatsang tse di iseng di ke di dirwe mo lefatsheng lotlhe le mo ditšhabeng tsotlhe. Mme morafe otlhe o ò leng mo gare ga ona o tla bona tiro ya Morena. Gonne di a boitshega tse ke tla di dirang ke na nao. 11Fela tshegetsang tse ke di lo laelang kajeno. Bonang, ke tla lo etelela pele, ke leleka Baamori le Bakanana le Bahethe le Baferesi le Bahewi le Bajebusi. 12Itiseng gore lo se ka lwa dira kgolagano le baagi ba lefatshe le lo tla tsenang mo go lone, e se re gongwe ba lo fetogela seru ba le mo gare ga lona. 13Mme lo dige dialetare tsa bone, lo thubaganye majwe a a motloutlo a bone, lo reme medimako ya bone ya Ašera.
14“Gonne ga lo a tshwanela go obamela modimo o sele. Gonne Morena yo leina la gagwe e leng Mofufegedi ke Modimo o o lefufa. 15Lo se ka lwa dira kgolagano le baagi ba lefatshe leo, e se re gongwe fa ba dira boaka ka go latela medimo ya bone ba e direla ditlhabelo, ba lo laletsa, mme lwa ja ditlhabelo tsa bone; 16e se re gongwe lwa batlela bomorwaa-lona bomorwadia-bone, mme ya re fa bomorwadia-bone ba dira boaka ka go latela medimo ya bone, ba dirisa bomorwaa-lona boaka ka go ba latedisa medimo ya bone.
17“Lo se ka lwa itirela medimo e e bopilweng.
18“Tshegetsang moletlo wa dinkgwe tse di sa bedisiwang, lo je dinkgwe tse di sa bedisiwang malatsi a supa ka sebaka sa kgwedi ya Abibi jaaka ke lo laetse. Gonne lo hudugile kwa Egepeto ka kgwedi ya Abibi.
19“Sengwe le sengwe se mmaaso a itibolang ka sona ke sa me, e bong tse ditonanyana tsotlhe tsa maitibolo a diruiwa tsa lona a dikgomo le a difutshane. 20Mme leitibolo la esele lo le rekolole ka kwana; mme fa lo sa le rekolole, lo le robe molala. Lo rekolole maitibolo otlhe a bomorwaa-lona. A go se nne ope yo o bonalang fa pele ga me a iphotlhere fela.
21“Dirang ditiro tsa lona ka malatsi a marataro, mme ka letsatsi la bosupa lo ikhutse; le fa go lemiwa gongwe go kotulwa lo ikhutse.
22“Le moletlo wa dibeke lo o tshegetse, e nne wa mabutswapele a kotulo ya mabele a korong le moletlo wa go fula maungo ka bofelo jwa ngwaga.
23“A banna botlhe ba lona ba bonale fa pele ga Morena, Morena Modimo wa Iseraele gararo ka ngwaga. 24E tla re fa ke se na go lo etelela pele le go leleka ditšhaba le go atlhamolosa naga ya lona, go se ke go nne ope yo o ka eletsang lefatshe la lona, fa lo ya go bonala fa pele ga Morena Modimo wa lona, gararo ka ngwaga.
25“Se tliseng madi a setlhabelo sa me mmogo le tse di bedisitsweng. A setlhabelo sa Tlolaganyo se se ka sa salela ka moso.
26“Tse di molemo tsa mabutswapele a masimo a lona lo di ise kwa Ntlong ya Morena, Modimo wa lona. Lo se ka lwa apaya potsane ka mašwi a mmaayo.”
27Jaanong Morena a raya Moše a re: “Kwala mafoko a; gonne ke dirile kgolagano nao le Baiseraele ka fa mafokong a.” 28Moše o ne a nna teng a na le Morena malatsi a le 40 le masigo a le 40, a sa je dijo a sa nwe metsi. Mme a kwala mafoko a kgolagano a le some mo matlapeng ale.
Moše o boa mo Sinai
29E rile Moše a fologa mo thabeng ya Sinai a bo a tshotse matlapa a molao ka diatla, mme Moše a bo a sa itse gore a letlalo la sefatlhego sa gagwe le a phatsima, ka a buile le Ona. 30Jaanong ya re Arone le Baiseraele botlhe ba leba Moše, ba fitlhela letlalo la sefatlhego sa gagwe le phatsima; ka moo ba boifa go mo atamela. 31Mme Moše a ba bitsa; ke fa Arone le bagolo botlhe ba phuthego ba ya kwa go ene, mme Moše a bua nabo. 32Morago ga moo Baiseraele botlhe ba atamela, mme a ba laela tsotlhe tse Morena o di buileng nae kwa thabeng ya Sinai. 33Ya re Moše a sena go fetsa go di ba bolelela, a bipa sefatlhego sa gagwe ka lesire. 34Mme e ne ya re fa Moše a tsena fa pele ga Morena go bua nae, a tlose lesire go fitlhelela a be a tswe; jaanong fa a sena go tswa, a bolelele Baiseraele tse a di laetsweng. 35Ke fa Baiseraele ba bona sefatlhego sa ga Moše, ba fitlhela letlalo la sefatlhego sa ga Moše le phatsima, mme Moše a busetsa lesire mo sefatlhegong sa gagwe, go ya a be a tsene gape go bua nae.
