EKESODU 28

₁“Foo o atametse Arone mogoloo le bomorwawe nae kwa go wena, o ba ntshe mo Baiseraeleng gore a ntirele e le moperesiti, ene Arone le Natabe le Abihu le Eleasare le Ithamare, bomorwa Arone. ₂O direle Arone mogoloo diaparo tse di boitshepo tsa tlotlo le tsa mokgabo. ₃O bue le botlhe ba ba botlhale ba ke ba tladitseng mowa wa botswerere gore ba direle Arone diaparo gore a itshepisediwe go nna moperesiti wa me. ₄Diaparo tse ba tshwanetseng go di dira ke tse: Kgwatlhana ya sehuba le khiba le kobo e kgolo le hempe e e logilweng ka botswerere le serwalo le moitlamo. A ba direle Arone mogoloo le bomorwawe diaparo tse di boitshepo jalo gore a ntirele e le moperesiti.

₅“A ba tsee gouta le masela a mabududu le a bohibidu jwa bofifadu le a bohibidu jwa madi le a masweu, ₆ba dire khiba ka gouta le ka masela a mabududu le a bohibidu jwa bofifadu le a bohibidu jwa madi le a masweu a a ditlhale-pedi a a logilweng ka botswerere. ₇A e nne le dibata tse pedi tsa magetla tse di tshwaragantsweng. A e kopanngwe natso fa dintlheng tse pedi tsa yona. ₈A moitlamo wa yona o segwe ka masela a yona, e nne wa gouta le wa masela a mabududu le a bohibidu jwa bofifadu le a bohibidu jwa madi le a masweu a a ditlhale-pedi.

₉“O tsee majwana a a tlhokegang a le mabedi a šohama, o gwae maina a bomorwa Iseraele mo go ona; ₁₀maina a le marataro a bone mo lentswaneng lengwe le a marataro a a setseng mo lentswaneng la bobedi ka fa ba tlhomaganang ka teng. ₁₁O gwae maina a bomorwa Iseraele mo majwaneng a mabedi ao; e le tiro ya ba ba gabang mafika, ba ba gwayang sekano; o a tsenye mo khuparelong ya gouta. ₁₂O gokelele majwana a mabedi ao mo dibateng tsa magetla tsa khiba, e le mafikana a a thusang gore Baiseraele ba gopolwe. A Arone a sikare maina a bone fa pele ga Morena mo magetleng a mabedi a gagwe gore Morena a ba gopole. ₁₃O dire dikhuparelo tsa gouta ₁₄le dikeetane di le pedi tsa gouta e e sa pekwang; o di dire ka go di tshopha jaaka megala; o gokelele dikeetane tse di tshophilweng mo dikhuparelong tsele.

₁₅“Le gona o dire kgwatlhana ya katlholo e logiwe ka botswerere; o e dire jaaka go dirilwe khiba; o e dire ka gouta le ka masela a mabududu le a bohibidu jwa bofifadu le a bohibidu jwa madi le a masweu a a ditlhale-pedi. ₁₆A e nne le dikhutlo di le nne e patagane. Boleele le bophara jwa yona bo lekane le seatla. ₁₇Gokelela dikhuparelo tse di nang le majwana mo go yona; o dire methalo e le mene ya majwana. Mo mothalong wa ntlha go tlhomagane majwana a kareneole le topase le semarage. ₁₈Mo mothalong wa bobedi go nne rubine le safire le jasepise. ₁₉Mo mothalong wa boraro go nne hiasinte le agate le amethisete. ₂₀Mo mothalong wa bone go nne kerisolite le šohama le onikese. A a tlapisiwe ka gouta e a huparele. ₂₁A majwana ao a nne lesome le bobedi ka fa maineng a bomorwa Iseraele. Lentswana lengwe le lengwe le nne le leina la lotso longwe lwa ditso tse di lesome le bobedi le kwadilwe ka go gwaiwa jaaka sekano.

₂₂“O dire dikeetane tse di tshophilweng mo kgwatlhaneng ya sehuba; di tshophilwe jaaka megala, e le tsa gouta e e sa pekwang. ₂₃Dira mefitshane e le mebedi ya gouta mo kgwatlhaneng; o gokelele mefitshane e mebedi eo mo dikhutlong tse pedi tse di kwa godimo tsa kgwatlhana. ₂₄Jaanong o gokelele dikeetane tse pedi tsa gouta mo mefitshaneng e mebedi eo fa dikhutlong tsa kgwatlhana. ₂₅Mme dintlha tse pedi tse dingwe tsa dikeetane tse pedi tseo o di gokelele mo dikhuparelong tse pedi tsele; mme tsone o di bofelele mo dibateng tsa khiba ka fa pele ga yona.

₂₆“Gape o dire mefitshane e le mebedi e mengwe ya gouta, o e gokelele mo dikhutlong tse pedi tse di kwa tlase tsa kgwatlhana fa mafelelong a yona a a potileng ka fa khibeng, ka fa teng. ₂₇O dire mefitshane ya gouta e le mebedi gape, o e gokelele mo dibateng tse pedi tsa magetla tsa khiba ka fa pele fa tlase fa khiba e tshwaragantsweng teng le dibata tsa magetla fa godimo ga moitlamo wa khiba. ₂₈A go gokelelwe kgwatlhana ka mogala o mobududu o o tswang mefitshaneng ya yona, o ya kwa mefitshaneng ya khiba gore kgwatlhana e pote ka fa godimo ga moitlamo wa khiba, mme e se ka ya suta, le e seng go tloga mo khibeng.

₂₉“Arone a rwale maina a bomorwa Iseraele jalo mo kgwatlhaneng ya katlholo fa pelong ya gagwe, fa a tsena mo Felong-ga-Boitshepo fa pele ga Morena gore a tle a ba gopole ka gale. ₃₀Gape dira ditengwa tse di bidiwang Lesedi le Tshiamo, o di tsenye mo kgwatlhaneng ya katlholo gore di nne fa pelong ya ga Arone, fa a tsena go ema fa pele ga Morena. Arone o tla rwala katlholo ya Baiseraele jalo fa pelong ya gagwe fa pele ga Morena ka gale.

₃₁“Kobo e kgolo e e ka fa teng ga khiba o e dire yotlhe ka lesela le lebududu. ₃₂A go nne phatlha ya go somela tlhogo mo go yona; phatlha ya yona e nne le momeno mo molaleng o logilwe. A e nne phatlha e e tshwanang le ya seaparo sa tshipi sa motlhabani gore e se ka ya gagoga. ₃₃Le gona o dire digaranata mo mafelelong a kobo ka masela a mabududu le a bohibidu jwa bofifadu le a bohibidu jwa madi, di nne mo mafelelong a yona go e potologa yotlhe kwa tlase. Mme a ditshipinyana tse di lelang tsa gouta di tlhabakane natso go potologa kobo yotlhe. ₃₄Tshipinyana ya gouta e bapane le garanata di dikologe jalo mo mafelelong a kobo e kgolo. ₃₅A Arone a e apare, fa a ya go ntirela gore go lela ga ditshipinyana go utlwale, fa a tsena mo Felong-ga-Boitshepo fa pele ga Morena, le fa a tswa gore a se ka a swa.

₃₆“Le gona o dire papetlana ya gouta e e sa pekwang, o gwae mo go yona jaaka go gwaiwa sekano o re: ‘O itshepetse Morena.’ ₃₇Gape o gokelele mogala wa lesela le lebududu mo go yona gore e bofelelwe mo serwalong; a e nne fa pele ga serwalo fa phatleng. ₃₈A e nne mo phatleng ya ga Arone gore Arone a rwale melato ya Baiseraele ya go fosetsa tse di boitshepo tse ba di itshepisang, e bong dineo tsotlhe tse ba di kgethelang Felo-ga-Boitshepo. A e nne mo phatleng ya ga Arone ka gale gore ba tle ba kgatlhe Morena.

₃₉“Le gona o loge hempe ka lesela le le marabata, o dire serwalo ka lesela le lesweu, o dire moitlamo ka mokgwa wa go loga marabata.

₄₀“O direle bomorwa Arone dihempe le meitlamo; o be o ba direle ditlhoro tsa tlotlo le mokgabo. ₄₁O di apese Arone mogoloo le bomorwawe nae, o ba tlotse, o tlatse diatla tsa bone, o ba itshepise gore ba ntirele e le baperesiti. ₄₂O ba direle marokgwe a lesela le lesweu go bipa bosaikatega; a simologe fa lethekeng go fitlha mo diropeng. ₄₃A Arone le bomorwawe ba a apare, fa ba tsena mo Tempelaneng ya Boipontsho, gongwe fa ba atamela kwa aletareng go direla mo Felong-ga-Boitshepo gore ba se ka ba ithwesa molato, ba swa. Se ke molao o o sa khutleng wa gagwe le wa losika lwa gagwe sehularong sa gagwe.