EKESODU 26

₁“Tempelana o e dire ka masela a le some, e le a masweu a a ditlhale-pedi le a mabududu le a bohibidu jwa bofifadu le a bohibidu jwa madi; o logele boKerubime mo go ona jaaka setswerere. ₂Boleele jwa lesela lengwe le lengwe e nne mabogo a le 28; bophara jwa lone e nne mabogo a le mane; masela otlhe a nne selekanyo se le sengwe fela. ₃Masela a le matlhano a rokaganngwe, le masela a matlhano a mangwe a rokaganngwe. ₄Jaanong o dire digole ka lesela le lebududu fa mafelelong a lesela le le fa thoko ga masela a a rokagantsweng; o dire jalo gape fa mafelelong a lesela la bofelo la thokaganyo ya bobedi. ₅O dire digole di le 50 mo leseleng lengwe, o be o dire digole di le 50 gape fa mafelelong a lesela le le mo thokaganyong ya bobedi. A digole di lebagane. ₆Le gona o dire dikgogetso di le 50 tsa gouta, o tshwaraganye masela a mabedi ao ka dikgogetso tseo gore e nne moago o le mongwe.

₇“Gape o dire masela a boboa jwa dipodi go nna thulelo ya tente godimo ga Tempelana. Dira masela a a ntseng jalo a le 11. ₈Boleele jwa lesela lengwe e nne mabogo a le 30; bophara jwa lone e nne mabogo a le mane; masela a le 11 a nne selekanyo se le sengwe fela. ₉O rokaganye masela a le matlhano go sele le masela a marataro a mangwe go sele. Mme lesela la borataro o le mene fa pele ga tente. ₁₀Le gona o dire digole di le 50 fa mafelelong a lesela la bofelo la thokaganyo ya ntlha le digole di le 50 fa mafelelong a lesela la bofelo la thokaganyo ya bobedi. ₁₁Gape o dire dikgogetso tsa kgotlho di le 50, o tsenye dikgogetso mo digoleng, o tshwaraganye thulelo ya tente jalo gore e nne e le nngwe fela. ₁₂Fa e le dikarolo tsa masela tse di fetang tekanyo ya tente, a di lepelele fela; bontlhanngwe jwa lesela le le fetang tekanyo o bo lepeletse ka fa morago ga Tempelana. ₁₃Boleele jwa masela bo fete bophara jwa Tempelana ka letsogo ka ntlha nngwe le ka ntlha e nngwe; a a lepelediwe mo ditlhakoreng tsa Tempelana go e bipa.

₁₄“O be o direle tente thulelo ya matlalo a diphelehu a a hubiditsweng, mme mo godimo ga yona go nne thulelo ya matlalo a dintšwa tsa lewatle.

₁₅“Le gona o direle Tempelana lebota la dipati tsa mokgwa. ₁₆Boleele jwa lobati longwe le longwe e nne mabogo a le some; bophara jwa lone e nne letsogo le bontlhanngwe. ₁₇A lobati longwe le longwe lo nne le malomelo a le mabedi a a lebaganyeng. O a direle dipati tsotlhe tsa Tempelana. ₁₈Fa e le dipati tsa Tempelana o direle lotlhakore lwa borwa dipati di le 20. ₁₉Le gona o direle dipati di le 20 tseo ditlhako tsa selefera di le 40; o direle malomelo a mabedi a lobati longwe le longwe ditlhako di le pedi. ₂₀Le lotlhakore lwa bobedi lwa Tempelana lo lo lebileng kwa bokone lo nne le dipati di le 20 ₂₁le ditlhako di le 40 tsa tsona tsa selefera, ditlhako di le pedi ka fa tlase ga lobati longwe le longwe. ₂₂Mme morago wa Tempelana o o hularetseng bophirimatsatsi o o direle dipati di le thataro. ₂₃Dikhutlo tsa Tempelana ka kwa morago o di direle dipati di le pedi. ₂₄A di nne di patagane go tswa kwa tlase di nne mmogo, di patagane go ya kwa godimo go fitlha molepong wa ntlha. A go nne jalo mo dikhutlong tsoo pedi. A tsona di bope dikhutlo tse pedi. ₂₅E tla nna dipati di le 8 le ditlhako tsa tsona tsa selefera, e bong ditlhako di le 16; ditlhako di le pedi ka fa tlase ga lobati longwe le longwe.

₂₆“Le gona o dire mephakarego ka dikota tsa morukuru, e le metlhano ya dipati tsa lotlhakore longwe lwa Tempelana ₂₇le mephakarego e le metlhano ya dipati tsa lotlhakore lwa bobedi lwa Tempelana le mephakarego e le metlhano ya dipati tsa morago wa Tempelana o o hularetseng bophirimatsatsi. ₂₈Jaanong a mophakarego o o fa gare o kgabaganye dipati ka bogare go tswa ka fa go ya ka fa. ₂₉O manege dipati gouta, o dire melepo ya tsona ka gouta, mephakarego e somelwe mo go yona; le mephakarego o e manege gouta. ₃₀Tlhoma Tempelana jalo ka mokgwa o ò o bontshitsweng mo thabeng.

₃₁“Le gona o dire lesire ka masela a mabududu le a bohibidu jwa bofifadu le a bohibidu jwa madi le a masweu a a ditlhale-pedi. O logele boKerubime mo go lone jaaka setswerere. ₃₂O le pege mo maotwaneng a le mane a mokgwa a a manegilweng gouta, a dikgoge tsa ona e leng tsa gouta a a tlhomilweng mo ditlhakong di le nne tsa selefera. ₃₃O pege lesire mo dikgogeng, o tsenye Letlole la Tshupo gona ka fa teng ga lesire; mme a lesire le kgaoganyetse Felo-ga-Boitshepo le Felo-ga-Boitshepo-jwa-Maitshepo. ₃₄Mme o khurumele Letlole la Tshupo ka sekhurumelo sa thuanyo mo Felong-ga-Boitshepo-jwa-Maitshepo. ₃₅Lomati lwa bojelo lone o lo bee ka fa ntle ga lesire fa lotlhakoreng lwa bokone lwa Tempelana; setlhomo sa dipone sone o se bee fa lotlhakoreng lwa borwa, se lebane le lomati lwa bojelo.

₃₆“Le gona o direle mojako wa tente sebipo ka masela a mabududu le a bohibidu jwa bofifadu le a bohibidu jwa madi le a masweu a a ditlhale-pedi, se logilwe ke mologi wa masela a a marabata. ₃₇Sebipo seo o se direle maotwana a le matlhano a mokwa, o a manege gouta; dikgoge tsa ona e nne tsa gouta; o a bopele ditlhako di le tlhano tsa kgotlho.