EKESODU 21

₁“Ditaelo tse o tla di ba begelang ke tse: ₂Fa o reka lekgoba la Mohebere, a le go direle dinyaga di le thataro, mme ka ngwaga wa bosupa a le gololwe le tsamae, le sa ithekolole ka sepe. ₃Fa le tlile le le losi a le gololwe le le losi; fa le tlile le mosadi, a le gololwe le mosadi wa lone. ₄Mme fa morena wa lone a le naya mosadi yo o le belegelang bomorwa gongwe bomorwadi, mosadi yoo le bana ba gagwe ke ba morena wa lone. Monna a gololwe a le esi fela. ₅Mme fa lekgoba le bolela ka pelotshweu le re: ‘Ke rata morena wa me le mosadi wa me le bana ba me, ga ke rate go gololwa ka tsamaya,’ ₆foo morena wa lone a a le tlise fa pele ga baatlhodi, a le atametse lobati gongwe kota ya lone, mme morena wa lone a a le phunye tsebe ka thoko, e le gore le nne lekgoba la gagwe ka metlha yotlhe.

₇“Mme fa motho a rekisa morwadie gore a nne lekgoba, lone le se ka la gololwa jaaka lekgoba la monna. ₈Fa le sa kgatlhe morena wa lone ntlheng ya bosadi, a a le lese le rekololwe. Mme ga a na thata go le rekisa mo morafeng o sele, gonne o le diretse ka boikanyologo. ₉Mme fa a le tseela morwawe, a a le direle tse di tshwanetseng bomorwadia motho. ₁₀Fa a tsaya mosadi yo mongwe, a se ka a fokotsa dijo tsa lone le diaparo tsa lone le tshwanelo ya lone ya nyalo. ₁₁Fa a sa le direle dilo tse tharo tse, a le gololwe fela, le sa lefelwe sepe.

₁₂“Yo o itayang motho gore a be a swe, o tshwanetse go bolawa. ₁₃Mme fa a sa dira ka bomo, mme Modimo o iteisa seatla sa gagwe, foo ke tla go bontsha felo kwa a ka tshabelang teng. ₁₄Mme fa monna a tlhasela mongwe-ka-ene ka bomo gore a mmolae ka bolotsana, ene lo mo tlose, le fa a le fa aletareng ya me gore a swe.

₁₅“Yo o itayang rraagwe gongwe mmaagwe, a a bolawe.

₁₆“Yo o utswang motho, a mo rekisa gongwe a fitlhelwa a mo tshotse, o tshwanetse go bolawa.

₁₇“Yo o hutsang rraagwe gongwe mmaagwe o tshwanetse go bolawa.

₁₈“Fa banna ba lwa, mme mongwe a itaya yo mongwe ka lentswe gongwe ka letswele, mme e se mo a ka swang, mme a robala a ikoka. ₁₉Jaanong fa a tsoga gape, a itsamaela kwa ntle ka thobane ya gagwe, foo yo o mo iteileng a se ka a otlwa; fela a mo lefele ditshenyegelo tsa go lwala ga gagwe le dikalafo go ya a be a fole.

₂₀“Fa monna a itaya motlhanka wa gagwe gongwe lelata la gagwe ka thobane gore a be a swele mo diatleng tsa gagwe, o tshwanetse go bediwa. ₂₁Fela fa moitewa a phela letsatsi gongwe malatsi a le mabedi, foo a se ka a bediwa, ka a mo rekile.

₂₂“Fa banna ba lwa, mme ba thula mosadi yo moimana, mme a senyegelwa go se na bogole jo bongwe, moitei o tshwanetse go lefisiwa ka fa monna wa mosadi yoo a mo lefisang ka teng. Go lefiwe fa pele ga baatlhodi. ₂₃Mme fa a dirafalelwa ke bogole jo bongwe, o tshwanetse go lefela bophelo ka bophelo ₂₄le leitlho ka leitlho le leino ka leino le seatla ka seatla le lekoto ka lekoto ₂₅le phiso ka phiso le ntho ka ntho le letsadi ka letsadi.

₂₆“Fa monna a itaya motlhanka wa gagwe gongwe lelata la gagwe mo leitlhong, a le senya, a a mo lese a tsamae, a mo golole ka ntlha ya leitlho la gagwe. ₂₇Gongwe fa a kgola motlhanka wa gagwe gongwe lelata la gagwe leino, a a mo lese a tsamae, a mo golole ka ntlha ya leino la gagwe.

₂₈“Fa kgomo e tlhaba monna gongwe mosadi gore a be a swe, foo kgomo e tshwanetse go kgobotlediwa ka majwe, nama ya yona e se ka ya jewa, mme mong wa yona ga a bediwe. ₂₉Mme fa e le kgomo e e sa bolong go tlhaba, mme mong wa yona a ntse a begelwa, mme a sa e dise, fa yona e bolaya monna gongwe mosadi, gona kgomo eo e kgobotlediwe, mme mong wa yona le ene a bolawe. ₃₀Fa a lefisiwa madi a boitshwarelo, a a lefe tsotlhe tse a di lefisiwang gore a rekolole bophelo jwa gagwe. ₃₁Le fa e tlhaba mosimane gongwe e tlhaba mosetsana, a mong wa yona a direlwe ka fa molaong o. ₃₂Fa kgomo eo e tlhaba motlhanka gongwe lelata, mong wa yona o tshwanetse go ntshetsa morena wa gagwe selefera ya dišekele di le 30, mme kgomo eo e kgobotlediwe ka majwe.

₃₃“Fa monna a khurumolola sediba gongwe fa monna a epile sediba, a sa se khurumele, mme go wela kgomo gongwe esele mo go sona, ₃₄mong wa sediba a a e lefe ka selefera, a e busetse mong wa yona jalo, mme setoto e nne sa gagwe. ₃₅Fa kgomo ya motho e tlhaba kgomo ya mongwe-ka-ene, e be e swa, foo a ba rekise kgomo e e phelang, ba kgaogane tlhwatlhwa ya yona; le e e suleng ba e kgaogane. ₃₆Gongwe fa go itsiwe gore kgomo ga e bolo go tlhaba, mme mong wa yona a sa e dise, foo o tshwanetse go lefa kgomo ka kgomo, mme e e suleng e nne ya gagwe.