EKESODU 1

₁Maina ke a, a bomorwa Iseraele ba ba neng ba ya kwa Egepeto mmogo le Jakobe le malapa a bone: ₂Rubene le Simeone le Lefi le Juta ₃le Isašare le Sebulone le Benyamene ₄le Dane le Nafetale le Gate le Asere. ₅Mme botlhe ba e leng ba losika lwa ga Jakobe e ne e le batho ba le 70. Mme Josefa o ne a sa bolo go ya kwa Egepeto. ₆Jaanong ya re Josefa a se na go swa le bomorwa-rraagwe botlhe le losika lwa ntlha, ₇bana ba bone, e bong Baiseraele ba sala ba ata, ba ntsifala, ba nna bantsi, mo ba bileng ba tlala ka lefatshe.

₈Mme ga busa kgosi e ntšhwa kwa Egepeto e e sa itseng sepe ka ga Josefa. ₉Yona ya raya morafe wa yona ya re: “Bonang, morafe wa Baiseraele o mogolo, o tloga o nna thata bogolo go rona. ₁₀Tlayang, re ba logeleng maano, e se re gongwe ba atela pele, mme ya re fa ntwa e ka tla, ba goga le baba ba rona, ba tlhabana le rona, ba tlogela lefatshe le.” ₁₁Ya baa gona ba ba beelang baokamedi ba ba ba pateletsang tirong, e le go ba bogisa ka ditiro tse di bokete tsa bone. Ba agela Farao metse ya difala tse di bolokang dijo, e bong Phitome le Ramasese. ₁₂Mme le fa ba ba bogisa thata, bone ba ata thata, ba anama segolo, mo Baegepeto ba bileng ba boifa Baiseraele. ₁₃Ke fa Baegepeto ba dira Baiseraele batlhanka ka thata; ₁₄ba galakisa bophelo jwa bone ka tiro e e bokete letsopeng le diekaneng le ka tiro tsa mefutafuta kwa masimo; ditiro tsotlhe tsa bone ba di ba dirisa setlhogo.

₁₅Gape kgosi ya Egepeto ya laela babelegisi ba basadi ba Bahebere, e bong Sifera le Phua, ₁₆ya re: “Fa lo belegisa basadi ba Bahebere, lo lebalebe ngwana; fa e le mosimane, mmolaeng; fa e le mosetsana, a a phele!” ₁₇Mme babelegisi ba bo ba boifa Modimo, ba se ka ba dira ka fa kgosi ya Egepeto e ba laetseng ka teng, ba leseletsa basimane go phela. ₁₈Ke fa kgosi ya Egepeto e bitsa babelegisi, e ba botsa e re: “Ke ka ntlha ya eng, fa lo dirile jalo, lwa phedisa basimane?”

₁₉Babelegisi ba fetola Farao ba re: “Kana basadi ba Bahebere ga ba tshwane le basadi ba Baegepeto, mme bone ba thata. E a tle e re mmelegisi a ise a fitlhe kwa go bone, ba bo ba setse ba belege.” ₂₀Babelegisi bao Modimo wa ba phedisa sentle, mme morafe wa Baiseraele wa ata, wa tia thata. ₂₁Mme ya re ka babelegisi ba boifa Modimo, ona wa ba naya malapa a a tletseng bana. ₂₂Ke fa Farao a laela morafe otlhe wa gagwe a re: “Basimane botlhe ba Bahebere ba ba tla tsalwang lo ba latlheleng mo nokeng ya Nile, mme basetsana botlhe lo ba lese ba phele!”