DOITERONOMIO 19

₁“E re Morena, Modimo wa gago, a sena go nyeletsa ditšhaba tse o tla go nayang lefatshe la tsona gore o di leleke, o nne mo metseng ya tsona le mo matlong a tsona, ₂gona o itomololele metse e le meraro mo lefatsheng la gago le Morena, Modimo wa gago, o tla le go nayang gore e nne la gago. ₃O be o ipaakanyetse ditsela tse di yang teng, o kgaoganye naga ya lefatshe la gago le Morena, Modimo wa gago, o tla le go ruisang dikarolo di le tharo, e le gore mmolai mongwe le mongwe a nne le kwa a ka tshabelang teng. ₄Mme mmolai yo o ka tshabelang teng gore a phele, ke yo o ntseng jaana: Ke yo o bolaileng mongwe-ka-ene e se ka bomo, a sa mo tlhoa pele ga foo; ₅jaaka fa a ya le mongwe-ka-ene kwa sekgweng go rema ditlhare, a tsholetsa selepe ka letsogo go rema setlhare, mme tshipi ya selepe e somoga mo mfenyaneng, e rema mongwe-ka-ene gore a be a swe, ke ene yo o ka tshabelang kwa motseng mongwe wa metse eo gore a phele; ₆e se re gongwe mmusolosi wa madi a mo latelela a ntse a gaketse, a mo tshwara, ka tsela e le telele, a mmolaya, le fa a sa tshwanelwa ke loso, ka a ne a sa mo tlhoa pele ga foo. ₇Ke ka moo ke go laelang gore o itomololele metse e meraro ya botshabelo.

₈“Morena, Modimo wa gago, o tla katolosa naga ya gago jaaka a ikanetse borraeno, a go naya lefatshe lotlhe le a le solofeditseng borraeno go le ba naya, ₉fa o tlhokomela ditaelo tsotlhe tseo go dira ka tsona tse ke di go laelang kajeno, ka go rata Morena, Modimo wa gago, le ka go sepela mo ditseleng tsa gagwe ka gale. Fa go dirafetse jalo, o ikokeletse metse e le meraro gape kwa ntle ga e meraro eo, ₁₀e se re gongwe ga tshololwa madi a a se nang molato mo lefatsheng la gago le Morena, Modimo wa gago, a tla le go nayang go nna boswa, ga nna molato wa polao mo go wena.

₁₁“Mme e re fa motho a tlhoile mongwe-ka-ene, a mo lalela, a mo wela, a mmolaya, mo a bileng a swa, mme a tshabela kwa motseng mongwe wa metse eo, ₁₂gona a bagolo ba motse wa ga gabo ba rome batho, ba mo tsee teng, ba mo neele mo diatleng tsa mmusolosi wa madi gore a swe. ₁₃O se ka wa mo leba ka bopelotlhomogi, mme o lefele madi a a se nang molato mo go Iseraele gore o tlhogonolofale.

₁₄“Molelwane wa mongwe-ka-wena o o beilweng ke ba bogologolo o se ka wa o katosa mo bosweng jwa gago jo o tla bo ruang mo lefatsheng le Morena, Modimo wa gago, o tla le go nayang gore e nne la gago.

₁₅“Mosupi a le mongwe fela a se ka a lekana go ka supa ka ga motho, le fa e le molato ofe gongwe boleo bofe; a boleo bongwe le bongwe jo motho o ka bo dirang bo sekisiwe ka tshupo ya basupi ba le babedi gongwe ba le bararo. ₁₆Mme e re fa mosupi wa pateletso a ka iphetlhela motho go supa tlolo ya molao ka ga gagwe, ₁₇gona a banna ba babedi ba ba sekisanyang ba eme fa pele ga Morena, fa pele ga baperesiti le baatlhodi ba ba tla bong ba le teng ka malatsi ao. ₁₈A baatlhodi ba tlhotlhomise sentle, mme fa go fitlhelwa mosupi yoo e le wa maaka, a supile maaka ka ga mongwe-ka-ene, ₁₉gona lo mo direle ka fa a neng a ikaeletse ka teng go direla mongwe-ka-ene. O tlose bosula jalo mo go wena ₂₀gore ba bangwe ba utlwe, ba boife, mme bosula jo bo ntseng jalo bo se tlhole bo dirwa mo go wena. ₂₁A leitlho la gago le se ka la mo rekegela: A botshelo bo lefiwe ka botshelo, le leitlho ka leitlho, le leino ka leino, le seatla ka seatla, le lonao ka lonao.