DANIELE 6

₁Dario o ne a bona gore go molemo go baya dikgosana di le 120 tse di disang puso yotlhe. ₂Dikgosana tseo a di beela baokamedi ba le bararo ba Daniele e leng mongwe wa bone, ba dikgosana di tshwanetseng go dira ka fa tlase ga bone gore kgosi e se ka ya senyegelwa ke sepe. ₃Ke fa go bonala gape gore Daniele o gaisa baokamedi le dikgosana, ka gonne go ne go le mowa wa maatlametlo mo go ene. Kgosi ya akanya go mo dira mookamedi wa puso yotlhe. ₄Ka moo baokamedi mmogo le dikgosana ba batla lebaka go ka baya Daniele molato ntlheng ya puso, mme ba palelwa ke go bona molato gongwe tshenyo mo go ene; ka gonne o ne a ikanyega, go sa bonwe phoso epe le e seng tshenyo mo go ene. ₅Banna bao ba tlhoboga foo ba re: “Ga re nke re bona molato ope mo go Daniele yo, fa re sa o batle mo tirelong-Modimo ya gagwe.”

₆Ke fa baokamedi bao le dikgosana ba itlhaganela, ba ya kwa kgosing, ba e raya ba re: “Kgosi Dario, phela ka bosakhutleng! ₇Baokamedi botlhe ba puso le bagolo le dikgosana le bagakolodi le balaodi ba mephato ba utlwanye gore go bewe molao wa kgosi, go ntshiwe kiletso e e gagamaditsweng e e reng: ‘Le fa e le mangmang yo o tla kopang sengwe thapelong mo modimong mongwe gongwe mo mothong ka malatsi a le 30, fa e se mo go wena kgosi fela, o tla latlhelwa mo logageng lwa ditau.’ ₈Jaanong kgosi, baya kiletso, ò ntshe molao o o kwadilweng, o o sa fetolweng, o o tshwanang le molao wa Bamedia le Baperesia o o sa ka keng wa dirololwa.” ₉Ka ntlha ya tseo kgosi Dario a kwala molao oo, le kiletso eo.

₁₀E rile Daniele a sena go utlwa gore molao oo o kwadilwe, a tsena mo ntlong ya gagwe; o ne a na le difenstere tse di bulegileng mo ntlwaneng ya gagwe e e kwa godimo tse di lebileng kwa Jerusalema; a khubama teng gararo ka mangole ka letsatsi leo, a rapela, a leboga Modimo wa gagwe, jaaka a ne a ntse a dira pele ga foo.

₁₁Ke fa banna bale ba itlhaganela, ba ya teng, ba fitlhela Daniele a rapela, a kopa bopelotlhomogi fa pele ga Modimo wa gagwe. ₁₂Ba ya kwa kgosing, ba e botsa ka ga kiletso ya kgosi ba re: “A ga ò a kwala kiletso e e reng: Le fa e le mang yo o kopang sengwe mo modimong mongwe gongwe mo mothong ka malatsi a le 30, fa e se mo go wena kgosi fela, o tla latlhelwa mo logageng lwa ditau?” Kgosi ya araba ya re: “Kiletso eo e tlhomame jaaka molao wa Bamedia le Baperesia o o sa dirololweng.”

₁₃Ba boa ba fetola, ba begela kgosi ba re: “Daniele, mongwe wa batshwarwi ba Bajuta, ga a re sepe ka wena kgosi, le kiletso e ò e kwadileng ga a e kgathalele. O ntse a rapela thapelo ya gagwe gararo ka letsatsi.”

₁₄Ya re kgosi e utlwa puo e, ya utlwa botlhoko thata, ya logela Daniele maano a go mo golola; ya nna ya batla tsela ya go mo pholosa ga tsamaya letsatsi la phirima. ₁₅Jaanong banna bao ba itlhaganela, ba ya kwa kgosing, ba raya kgosi ba re: “Kgosi, itse gore ke molao wa Bamedia le wa Baperesia o o reng: Kiletso nngwe le nngwe le molao mongwe le mongwe tse di beilweng ke kgosi, ga di ka ke tsa fetolwa.”

₁₆Ya baa gona kgosi e atlholang jalo, mme ba tlisa Daniele, ba mo latlhela mo logageng lwa ditau. Kgosi ya raya Daniele ya re: “Modimo wa gago o ò o direlang ka gale, a ona o go pholose!” ₁₇Ga tlisiwa lefika, la bewa mo botsenong jwa logaga; mme kgosi ya le kana ka palamonwana ya yona le ka palamonwana ya ditona tsa yona gore go se ka ga fetolwa sepe sa katlholo ka ga Daniele. ₁₈Ke fa kgosi e tloga, e ya kwa ntlong ya yona, e lala e itimile dijo; ya se ka ya laola go tlisediwa bagadingwana, ya ba ya tlhoka boroko.

₁₉Ya re mahube a bonala, kgosi ya tsoga phakela, ya itlhaganela, ya ya kwa logageng lwa ditau. ₂₀Ya re e atamela logaga, ya bitsa Daniele ka lentswe le le hutsafetseng; kgosi ya botsa Daniele ya re: “Daniele, motlhanka wa Modimo o o phelang, a Modimo wa gago o ò o direlang ka gale o ne o nonofile go go boloka mo ditaung?” ₂₁Daniele a araba kgosi a re: “Kgosi, phela ka bosakhutleng! ₂₂Modimo wa me o romile moengele wa ona; ene o momisitse ditau melomo, ga di a ntira sepe; ka gonne ga ke a bonwa molato fa pele ga ona; le fa pele ga gago, kgosi, ga ke a dira tshiamololo epe.”

₂₃Jaanong kgosi ya itumela thata, ya laola gore Daniele a ntshiwe mo logageng. Daniele a ntshiwa jalo mo logageng, go sa bonwe ntho epe mo go ene, gonne o ne a ikantse Modimo wa gagwe. ₂₄Kgosi ya ba ya laola gore go tlisiwe banna bale ba ba sentseng Daniele leina, mme ba latlhelwa mo logageng lwa ditau, bone le bana ba bone le basadi ba bone. Ya re ba ise ba fitlhe fa fatshe logageng, ditau tsa ba kapa, tsa ruga marapo otlhe a bone.

₂₅Morago ga moo kgosi Dario ya kwalela batho botlhe ba merafe le ditšhaba le dipuo ba ba agileng mo lefatsheng lotlhe ya re:

“A kagiso ya lona e nne kgolo! ₂₆Molao o beilwe ke nna o o reng: A batho ba rorome fa pele ga Modimo wa ga Daniele, ba o boife mo pusong yotlhe ya bogosi jwa me!

₂₈Daniele yoo o ne a tshegofala mo pusong ya ga Dario le mo pusong ya ga Korese wa Moperesia.