DANIELE (SEGERIKA) 13

₁Go kile ga bo go na le monna mo Babilone a bidiwa Joyakime. ₂A nyetse Susanna, morwadia Hilekia, e le mosadi yo montle thata; e bile a boifa Modimo, ₃ka batsadi ba gagwe e ne e le batho ba ba tlotlegang mme ba rutile morwadiabone mo Molaong wa ga Moše. ₄Joyakime o ne a humile thata, a bile a na le tshimo ya ditlhare go ikgotlha ka ntlo ya gagwe. Bajuta ba ne ba tlhola ba mo jela nala ka a ne a tšhwaretšwe kwa godimo go feta banna botlhe. ₅Bannabagolo ba babedi ba ne ba tlhophilwe mo bathong go nna baatlhodi mo ngwageng oo. Ka ga ba Morena o ne a rile, “Bosula bo tsile mo Babilone ka bagolwane le baatlhodi ba ba ipayang e kete ke bagogi ba batho.” ₆Banna ba ba ne ba tlhola ba le kwa ga Joyakime, mme botlhe ba ba sekisanang ba tla mo go bone.

₇E ne e tle e re motshegare wa sethoboloko, fa botlhe ba sena go phatlalala, Susanna a ye go tsamaya-tsamaya mo tshimong ya ditlhare ya monna wa gagwe go ya go iphokisa phefo. ₈Bagolwane ba babedi, ba ba neng ba tle ba nne ba mo lebelele a tsena go ya go iphokisa phefo, ba simolola go nna ba mo eletsa. ₉Ba ikemisa ditlhaloganyo, ba se ka ba leka le go leka go akanya legodimo, ba itebatsa tshiamo e le e batlang. ₁₀Boobabedi ba mo eletsa ka keletso e e bosula ka go tshwana, fela ba fitlhelana keletso e, ₁₁gonne ba ne ba tlhabiwa ke ditlhong go dumelana le gore ba eletsa go robala nae, ₁₂fela ba ne ba nna ba loga maano a go mmona malatsi otlhe.

₁₃Tsatsi lengwe, e rile ba sena go kgaogana ka mafoko a, “A re ye gae, ke nako ya dijo tsa motshegare” ba tsaya ditsela tse di farologanyeng. ₁₄Fela boobabedi ba tloga ba ikgata motlhala, ba bo ba kgatlhana gape. Ke fa ba tšhwanela ke gore ba itlhalose. Boobabedi ba dumelana le gore ba na le keletso nngwe, mme ba rulaganya go batla lobaka longwe lo lo siameng lo ba ka mo fitlhelang a le esi ka lone.

₁₅Jaanong ba e emela nako e e ba siametseng e; mme tsatsi lengwe Susanna a tla jaaka gale, a patilwe ke bahulanyana fela ba le babedi. Letsatsi le ne le le mogote, mme a batla go tlhapa mmele mo tshimong. ₁₆Go ne go se na ope fa e se bagolwane ba babedi ba, ba ntse ba mo okomela fa ba neng ba iphitlhile teng. ₁₇A raya batlhanka a re, “A ko lo ntsisetseng mafuranyana le balesamo foo, lo bo lo tšwala kgoro ya tshimo ke sa ntse ke tlhapa.” ₁₈Ba dira jaaka ba ne ba boleletšwe, ba tšwala kgoro ya tshimo mme ba tšwa ka seferwana go boela kwa tlung go ya go tsaya se a neng a se kopile, ba sa itse sepe ka bagolwane ba, ba ba neng ba iphitlhile.

₁₉E rile fela jaaka batlhanka ba ba sena go tsamaya, bagolwane ba babedi ba bo ba mo tabogela, ba mo raya ba re, “A ko O bone, kgoro ya tshimo e tswetswe, ga go na le fa e le ope yo o ka re bonang. ₂₀Re a go batla, ineele he, mme O re dumelele! ₂₁Fa O ka bo wa gana fela, roobabedi re ya go ntsha bosupi jwa gore lekawananyana lengwe le ne le na nao, ke sone se se dirileng gore O kobe bahula ba gago.”

₂₂Ke fa Susanna a fegelwa. A re, “Ke gamaregile fela, ga ke itse gore tota nka dirang. Gonne fa ke dira selo se, ke loso mo go nna, mme le gone fa ke sa se dire, ga nkitla ke falola diatla tsa lona. ₂₃Mme go botoka gore ke wele mo diatleng tsa lona, ke sa leofa, go na le go leofa Morena a ntse a bona.” ₂₄Ke fa a goela kwa godimodimo. Mme bagolwane ba babedi ba, le bone ba simolola go goa, ba mo tšhwaya phoso. ₂₅Mongwe wa bone a bo a tabogela kwa kgorong ya tshimo go ya go bula.

₂₆Ya re ba ntlo ba utlwa go goa mo, mo tshimong, ba betsega ka seferwana go ya go bona gore go diragala eng. ₂₇E rile fela bagolwane ba sena go bolela maaka a bone batlhanka ba gakgamala fela mo go mašwe, gonne selo se se se ntseng jaana se ne se ise se ke se buiwe ka Susanna.

₂₈Ya re ka moso pitso ya tšhwarelwa kwa tlung ya monna wa gagwe Joyakime. Bagolwane ba babedi ba fitlha, mo bolalomeng jwa bone ba ikaeletse go dira gore Susanna a bolawe. ₂₉Ba bua le phuthego ba re, “Bitsang Susanna, morwadia Hilekia, mosadi wa ga Joyakime.” A ya go bidiwa. ₃₀Mme a tla a patilwe ke batsadi ba gagwe, bana ba gagwe le botlhe ba losika lwa gagwe. ₃₁Susanna o ne a bopegile sentle mme a le mabono mantle. ₃₂O ne a rwele sengwe a ipipile matlho, fela balotsananyana ba, ba bo ba re a ipipolole gore ba tle ba je monate go bona bontle jwa gagwe. ₃₃Batho ba gaabo botlhe ba ne ba lela, le ba bangwe botlhe ba ba neng ba mmona.

₃₄Bagolwane ba babedi ba ba ema, ba dikologilwe ke batho, mme ba baya diatla mo tlhogong ya mosadi yo. ₃₅Matlho a gagwe ya re a sekile dikeledi jaana a lelala legodimo, pelo ya gagwe e ikantse Modimo. ₃₆Ke fa bagolwane ba tšwa molomo, ba re, “E rile re ntse re tsamaya re le rosi mo tshimong, mosadi yo a fitlha a na le batlhanka ba le babedi. A tšwala kgoro ya tshimo mme a leleka batlhanka ba. ₃₇Lekawananyana lengwe le le neng le ntse le iphitlhile la ya kwa go ene mme ba robala mmogo. ₃₈Ya re re le ka kwa ntlheng e nngwe ya tshimo, ra bona molato o diragala, ra bo re tabogela kwa go bone. ₃₉Le mororo re ba bonye ba le mmogo re ne ra palelwa ke go kapa monna yo: o ne a re fekeetsa; a bula kgoro mme a re supa ka direthe. ₄₀Fela mosadi yo ene re ne ra mo kapa, ra mmotsa gore lekawana le ke mang. ₄₁A gana go re bolelela. Ke jone bosupi jwa rona joo.” Ka e ne e le bagolwane ba batho le baatlhodi, phuthego ya ba dumela. Susanna a atlholelwa loso.

₄₂A goela godimo thata a re, “Oh Modimo o o se nang tshimologo le bokhutlo, O itse diphiri tsotlhe le sengwe le sengwe pele ga se diragala; ₄₃O a itse fa ba nkakela. A jaanong ke tšhwanetse go swa, ke se na molato ope fela mo go tsotlhe tse bosula jwa bone bo di bopileng kgatlhanong le nna?”

₄₄Morena a utlwa selelo sa gagwe ₄₅mme, ya re a isiwa go ya go šwa jaana, a tsosa moya o o boitshepo o o neng o le mo mosimanyaneng mongwe jaana a bidiwa Daniele, ₄₆yo o neng a simolola go goa a re, “Ga ke na molato ope mo losong lwa mosadi yo!”

₄₇Ya re a bua jalo batho ba retologela kwa go ene mme ba mmotsa ba re, “O raya eng ka mafoko a?” ₄₈A ema fa gare ga bontsi jwa batho mme a fetola a re, “A lo dimatla go le kalo, barwa Iseraele, gore lo atlhole morwadia Iseraele a ise a utlwiwe, le go itšhwenye tota lo ise lo itšhwenye go bona boammaaruri? ₄₉Boelang kwa go ne go sekisediwa teng. Bannanyana ba ba mo tlabile fela ba.”

₅₀Batho botlhe ba itlhaganela ba boela morago, mme bagolwane ba raya Daniele ba re, “Tlaa O nne le rona fa, O re bolelele gore O raya eng, gonne Modimo o go file dineo tse bagolwane ba nang natso.”

₅₁Daniele a bo a re, “Kgaoganyang banna ba gonne ke batla go ba botsa.” ₅₂Ya re banna ba sena go kgaoganngwa Daniele a re yo mongwe a tsisiwe kwa go ene. A mo raya a re, “O tsofalela mo bosuleng, jaanong dibe tse O sa bolong go di dira mo bonyaneng jwa gago di go tšhwere tsa bo tsa go feta, ₅₃wena yo o atlholang kwa ntle ga tshiamo, wena yo o bonang ba ba se nang molato molato, wena yo o tlogelang batho ba ba molato, le mororo Morena a rile, ‘O se ka wa atlholela ba ba se nang molato le basiami loso.’ ₅₄Jaanong he, ka O ba bonye sentle, a ko O mpolele gore O ba bonye ba robetse ka fa tlase ga setlhare sefe?” A fetola a re, “Ka fa tlase ga setlhare sa masetika.”

₅₅Daniele a mo raya a re, “Go siame he! Maaka a gago a tsile go menogela mo tlhogong ya gago, moengele wa Modimo o setse a amogetse katlholo mo go one, mme o tsile go go phatloganya.”

₅₆A bo a thibosa monna yoo, a re yo mongwe a tsisiwe mme a mo raya a re, “Selo ke wena, wa Mokanananyana, yo O seng Mojuta, bontle bo go gapile maikutlo, keletso e e bosula ya go sokamisa pelo. ₅₇Selo se ke se O ntseng O se dira le barwadia Iseraele mme ba ntse ba tshaba go gana, fela O kopanye le morwadia Juta yo o neng a ferosiwa sebete ke bosula jwa gago. ₅₈Jaanong he, a ko O mpolelele gore O ba tšhwere ba le ka fa tlase ga setlhare sefe?” A fetola a re, “Ka fa tlase ga setlhare sa moholomo.”

₅₉Daniele a mo raya a re, “Go siame! Maaka a gago a tsile go menogela mo tlhogong ya gago: moengele wa Modimo o eme ka lerumo, a emetse go go fatola ka bogare, mme a lo nyeletsa loobabedi.”

₆₀Ke fa phuthego yotlhe e goa, ya baka Modimo, mmoloki wa ba ba o ikanyang. ₆₁Batho ba wela bagolwane ba babedi ba godimo ba Daniele ka mafoko a bone a neng a ba bonye molato wa go tlaba. ₆₂Jaaka go kwadilwe mo Molaong wa ga Moše ba ne ba atlholelwa yone kotlhao e ba neng ba ikaeletse go e atlholela mokaulengwe wa bone. Ba ba bolaya, botshelo jwa mosadi yo o se nang molato jwa bolokwa letsatsing leo. ₆₃Hilekia le mosadi wa gagwe ba leboga Modimo, ba o lebogela Susanna morwadiabone; Joyakime monna wa gagwe le losika lotlhe lwa gagwe le bone ba leboga, gonne o ne a sa bonwa molato wa sepe se se tlhabisang ditlhong. ₆₄Go tšwa mo letsatsing leo, batho ba tšhwarela Daniele kwa godimo thata.