BARUKU 6

₁Ka ntlha ya dibe tse lo di dirileng fa pele ga Modimo lo tlaa isiwa kwa Babilone lo le magolegwa ke Nebukatenesare kgosi ya Babilone.

₂Fa lo sena go fitlha kwa Babilone lo tlaa nna teng dingwaga di le dintsi, nako e telele e e ka nnang dikokomana di supa; morago ga nako eo ke tlaa lo busetsa gae ka kagiso. ₃Jaanong gone kwa Babilone lo tlaa bona medimo e e dirilweng ka selefera, ka gouta, ka logong, e sikerwe ke batho e tshosa baheitane.

₄Lo itlhokomeleng. Lo se ka lwa etsa batho bao ba sele, lo se ka lwa tshosiwa ke ope wa medimo ya bone ₅fa lo ntse lo bona baobamedi ba yone ba ntse ba bopelela kwa pele le kwa morago ga yone. Lo mpe lo nne lo re ka pelo: “Morena, ke wena fela yo re tšhwanetseng go go obamela!” ₆Gonne moengele wa me o na le lona; ke ene yo o tlaa tlhokomelang botshelo jwa lona. ₇Le fa di gomilwe ka gouta le selefera, diteme tsa tsone di rethefaditšwe ke modiri mongwe, ke ditšhwantshiwa fela, le gone ga di kake tsa bua.

₈Baheitane ba ba tsaya gouta ba direla medimo dirwalo jaaka e kete ba direla mosetsana yo o ratang mekgabo. ₉Go gongwe, baprista ba tle ba utswe gouta le selefera e mo medimong ya bone ba e itirisetse, ba bo ba e fe diaka tsa tempele. ₁₀Ba apesa medimo e ya selefera le gouta le logong, ka diaparo jaaka e kete ba apesa batho, le mororo e ka se ka ya itshireletsa gore e se ka ya tladiwa lešwe kgotsa ya jewa ke phetlhu, le fa ba ntse ba e apesa dikobo tse di bobududu jo bo mokgona. ₁₁Difatlhogo tsa yone le tsone di tšhwanetse go nna di phophothwa lerole la tempele le le nnang le koegela mo go tsone. ₁₂O mongwe o tshotse thobane ya segosi jaaka molaodi wa kgaolo, mme ga o kake wa bolaya ope yo o o kgopisang; ₁₃o mongwe o tšhwere tšhaka le selepe ka letsogo la moja, mme o palelwa ke go iphemela mo ntweng le mo magodung. ₁₄Selo se se bontsha gore ga se medimo; lo se ka lwa bo lwa e boifa. ₁₅Fela jaaka pitsa e e tlholang e dirisiwa e a tle e re e thubegile e bo e sa tlhole e na le mosola, medimo e, e e beilweng mo ditempeleng tsa yone le yone e ntse fela jalo. ₁₆Matlho a yone a tletse lerole le le tlholang le tsosiwa ke dinao tsa batho ba ba tlholang ba tsena.

₁₇Fela jaaka motho yo o kgopisitseng kgosi mme a atlholelwe loso a a tle a lotlelelwe dikgoro ka ntlha tsotlhe, baprista le bone ba tšwalela ditempele tsa medimo e ka dikgoro le diboutu le mepako ba tshaba gore go ka tloga ga thubelwa. ₁₈Ba tshuba dipone tse dintsi go feta jaaka bone ba itshubela, mme medimo e ga e bone le fa e le lo le longwefela lwa tsone. ₁₉E tshwana fela le nngwe ya dipinagare tsa tempele, e e jegileng mo teng, jaaka batho ba bolela. Ga e lemoge fa phetlhu e e tswang fa fatshe e e gonya le motoutwane o ja diaparo tsa yone, ₂₀le gore difatlhogo tsa yone di ntshofadiwa ke mosi o o kuelelang mo tempeleng. ₂₁Bommamanthwane, dipeolwane le dinonyane di tlhola di phaphasela mo godimo ga mebele ya yone le ditlhogo tsa yone, dikatse le tsone di nailaka teng. ₂₂Selo se se dira gore le lona lo iponele ka bolona gore ga se medimo: lo se ka lwa e tshaba. ₂₃Gouta e e gomilweng ka yone e ntle tota go lejwa, fela fa go se na ope yo o e phatsimisang, medimo e ka boyone ga e kake ya bo ya iphatsimisa. Ka nako e e neng e dirwa ka yone ga e a ka ya bo ya utlwa sepe.

₂₄Le fa e dueletswe go le kanakana, ga go na le fa e le moyanyana mo go yone. ₂₅Ka e ka se ka ya itsamaisa, e tlhola e sikerwe ke batho, e leng selo se se bontshang ka mo e sa thuseng sepe ka teng. Le gone ke selo se se tlhabisang baobamedi ba yone ditlhong ba, e a reng e ole, ba bo ba tšhwanela go tla go e emisa. ₂₆Mme fela fa e sena go emisiwa jalo ga e kake ya bo ya itsikinya; fa e ka sekama, ga e kake ya bo ya itlhamalatsa. Ditlhabelo tse e di isediwang go tšhwana fela le fa di ka bo di isediwa bašwi. ₂₇Sengwe le sengwe se e se ntshediwang setlhabelo, baprista ba se rekisa gape ba bo ba beletsa morokotso ka kgwatlha; fa basadi ba bone, bone, ba dira digwapa ka bontlhabongwe jwa sone, ba sa fe bahumanegi le digogou sepe. Fa e le ditlhabelo tsone, le basadi ba ba tlhatšwang tota le batsetsi ga ba tshabe go di ama! ₂₈Jaaka lo ka nna lwa iponela mo dikaing tse gore ga se medimo: lo se ka lwa bo lwa e tshaba. ₂₉Tota le gone! medimo e ya selefera le gouta le logong, e ka bidiwa medimo jang, fa basadi ba tlhola ba e isetsa dineelo jaana?

₃₀Mo ditempeleng tsa yone, baprista O fitlhela ba phuphame fela fa fatshe, diaparo tsa bone di ntse makgasa, ba ipeotse ditlhogo le ditedu, ba bile ba sa rwala sepe mo tlhogong, ₃₁ba gogotla, ba goa fa pele ga medimo e ya bone fela jaaka batho ba a tle ba dire mo meletlong ya diphitlho. ₃₂Baprista ba tsaya diaparo tsa medimo e ba ya go apesa basadi ba bone le bana. ₃₃A medimo e e tšhwerwe mašwe kgotsa e tšhwerwe sentle, e palelwa ke go duela tšhwaro nngwe le nngwe ka mo e tšhwanelwang ka teng; fela jaaka le gone e palelwa ke go tlhoma kgotsa go tlhomolola dikgosi. ₃₄Ka mokgwa o o tšhwanang le gone e palelwa ke go aba khumo kgotsa madi. Fa motho a palelwa ke go diragatsa maikano a o a e diretseng, ga e kake ya bo ya mo sekisa. ₃₅Ga e kake ya bo ya falodisa motho loso kgotsa ya namola motho yo o bokoa mo go yo o thata, ₃₆ya budulola matlho a sefofu, kgotsa ya thusa motho yo o mo matšhwenyegong, ₃₇ya tlhomogela motlholagadi pelo kgotsa ya fa lesiela. ₃₈Medimo e e gomilweng ka gouta le selefera e ga e na thuso, fela jaaka mafika a a phatlotšweng mo letlhakoreng la thaba. Tsatsi lengwe ba-e-obamedi ba tlaa tlhabiwa ke ditlhong. ₃₉Jaanong tota motho o ka akanya jang kgotsa a bua jang, a re ke medimo? ₄₀Makaledia le one a a e tlontlolola; gonne fa ba bona mongwe e le semumu mme a ka se ka a bua, ba mo isa kwa go Bele, ba mo kopa gore a mo neye puo, jaaka e kete o ka ba utlwa! ₄₁Le fa go ntse jalo le bone ba palelwa ke go bona selo se, ba e tlogela medimo e, gonne le bone ga ba na tlhaloganyo. ₄₂Basadi ba nna mo mebileng ba ikgatlhile matheka ka megala, ba tshubile moko jaaka maswelo. ₄₃Fa mongwe wa bone a ka tlhophiwa ke mofeti-ka-tsela a robalwa, o tshega yo o bapileng nae ka gore ga a a ka a tlhophiwa le gone mogala wa gagwe ga o a kgaolwa. ₄₄Sengwe le sengwe se se dirwang golo gongwe gaufi le medimo e ga se sa mmatota. Jaanong tota motho o ka akanya jang kgotsa a bua jang a re ke medimo?

₄₅Ka e dirilwe ke babetli le bathudi ba gouta, ke se badiri ba ba neng ba batla gore e nne sone. ₄₆Badiri ba le bone ga ba na botshelo jo boleele, jaanong dilo tse ba di diririleng e ka nna medimo jang? ₄₇Bošwa jo ba bo tlogelelang lotso lwa bone ga se sepe fela fa e se tsietso le mašwabi. ₄₈Fa ntwa e lwa kgotsa bomadimabe bongwe bo tlhaga, baprista ba rerisana gore ba ka iphitlha kae le gore ba ka fitlha medimo e kae; ₄₉motho o ka tlholwa jang go bona gore ga se medimo, fa e palelwa ke go iphalodisa ntwa kgotsa bomadimabe bongwe?

₅₀Le gone ka tota e dirilwe ka logong fela lo lo gomilweng ka gouta le selefera, mongwe le mongwe o tšhwanetse a bo a ka bona mo selong se gore ga se ya mmatota; e bile go tšhwanetse go bo go bonala mo go mongwe le mongwe, mo ditšhabeng le dikgosing, gore ga se medimo, ke tiro ya diatla tsa batho, le gore ga go na tiro epe ya bomodimo mo go yone. ₅₁A go sa ntse go ka nna le mongwe yo o sa boneng gore ga se medimo? ₅₂Ga e kake ya bo ya tlhoma kgosi go busa lefatshe, kgotsa ya naya batho pula,

₅₃kgotsa ya laola ditiragalo tsa yone, kgotsa ya namola mongwe yo o siamololelwang. Ga e thuse sepe fela jaaka magakabe a a fofang fa gare ga loapi le lefatshe. ₅₄Fa molelo o fisa tempele e medimo e ya logong e e gomilweng ka gouta le selefera e leng mo go yone, baprista ba yone ba a sia ba batla go iphalodisa, fa yone e ša jaaka dipinagare mo teng. ₅₅Ga e kake ya bo ya emelana le kgosi epe kgotsa baba bape. ₅₆Jaanong tota motho o ka akanya jang kgotsa a bua jang a re ke medimo?

₅₇Medimo e e dirilweng ka logong e, e e gomilweng ka gouta le selefera e, ga e kake ya tila magodu le disenyi; banna ba ba digagapa ba ka nna ba e amoga goutanyana le seleferanyana ya yone, ba sia ka diaparo tse e di apesitšweng; mme le fa go ntse jalo ga e kake ya bo ya ithusa. ₅₈Go botoka go nna kgosi e e bontshang botšwerere jwa yone, go nna pitsa ya lolwapa e e nang le thuso go mong wa yone, go na le go nna medimo e, e e seng ya mmatota e; kgotsa go nna lebati la ntlo, le le sireletsang se se mo teng, go na le go nna medimo e ya maaka e; kgotsa lootwana lwa logong mo tlung ya kgosi go na le go nna medimo e ya maaka e. ₅₉Letsatsi, ngwedi, le dinaledi tse di phatsimang, tse di neilweng tiro nngwe go e dira, di a utlwa; ₆₀ka mokgwa o o tšhwanang, legadima, fa le ntse le lakasela, ke selo se se kgatlhang go bonwa, le yone phefo fa e ntse e foka go kgabaganya lefatshe lengwe le lengwe, ₆₁maru a dira jaaka Modimo o a laetse go feta fa godimo ga lefatshe lotlhe, le molelo, o o rometšweng o tswa kwa godimo go fisa thaba le sekgwa, o diragatsa ditaelo tsa one. ₆₂Jaanong medimo e ga e lekane le dilo tse, ka bontle kgotsa ka nonofo. ₆₃Jalo he, ga go na ope yo o ka akanyang kgotsa a re ke medimo, gonne ga e ka ke ya atlhola kgetsi kgotsa ya thusa ope. ₆₄Jalo he, ka lo a itse gore ga se medimo, lo se ka lwa e tshaba.

₆₅Ga e ka ke ya hutsa kgotsa ya tshegofatsa dikgosi, ₆₆kgotsa ya direla ditšhaba ditshupo mo legodimong, kgotsa ya phatsima jaaka letsatsi, gongwe ya naya lesedi jaaka ngwedi. ₆₇Diphologolo e bile di botoka go na le yone, ka tsone di ka nna tsa itshireletsa, tsa itlhokomela. ₆₈Ga go bonale le go bonala gore ke medimo; lo se ka lwa e boifa!

₆₉Medimo e ya bone e e dirilweng ka logong e, e e gomilweng ka gouta le selefera e tšhwana le setshosa mo tshingwaneng ya magapu – se se sa sireletseng sepe. ₇₀Gape medimo e ya bone e e dirilweng ka logong e, e e gomilweng ka gouta le selefera e tšhwana le mosunyana mo serapeng – nonyane nngwe le nngwe e ka nna ya kotama mo go sone – e tšhwana gape le setoto se se latlhetšweng mo lefifing. ₇₁Lo tla lemoga gore ga se medimo ka go bona letsela la leloba le le boleta le le bohibidu jo bo mokgona le onalela mo mekwatleng ya yone; mme la bofelo yone ka boyone e tla nna e rumega, mme e tla tlhabisa lefatshe leo ditlhong. ₇₂Ke gone ka moo go leng botoka go nna motho yo o siameng yo o se nang medimo ya disetwa; ditlhong ga di na go mo atamela.