V. PHENYO YA SEJUTA. LOSO LWA MOTLHORISI LE PHEPAFATSO YA TEMPELE
Judase o tlhabana le Baheitane
1Judase Makabeuse le balekane ba gagwe ba ne ba nna ba tsamaya ka sephiri le metse, ba phutha ba ga bone. Ba ne ba thaopa ba ba neng ba sa ntse ba tshwere Sejuta, mme ba kgobokanya batho ba ka ne ba le 6 000. 2Ba rapela Morena gore a ke a gopole batho ba ba neng ba pitlagantswe ka ntlha tsotlhe, go tlhomogela Tempele e e neng e tlontlolotswe ke baikepi pelo, 3go utlwela botlhoko motse o o neng o setse o tlotlafala, mme o batla o gosomanye otlhe fa fatshe, go utlwa madi a ba ba neng ba bolailwe a ntse a mo tlhaeletse; 4go gopola polao ya bolalome ya bana ba ba se nang molato, le go otlhaela ditlontlololo tse leina ja gagwe le ne le tlontlololwa ka tsone.
5E rile fela Makabeuse a sena go bopa mophato, baheitane ba bo ba tlholwa ke go mo fenya, bogale jwa Morena jaanong bo fetogile bopelotlhomogi. 6A tlhasela metse le metsana e sa ntse e itebetse, mme a e tshuba. A gapa mafelo a a mo siametseng mo ntweng mme a alola batho ba le bantsi ba baba, 7gantsi a ithusa ka go tlhasela bosigo. Bonatla jwa gagwe jwa itsege kgakala.
Ditiro tsa Bonatla tsa ntlha
8E rile Filipo a bona gore Judase o ntse a tswelela-pele mme gantsi o a kgona, a kwalela Petolemi, motsamaisi wa batlhabani ba Koele-Siria le Fenisia, a mo kopa gore a okeletse kgosi ka batlhabani ba bangwe. 9Ka bonakonako Petolemi a tlhopha Nikanore morwa Patrokluse, mongwe wa Ditsala tsa Ntlha tsa kgosi, mme a mo romela a eteletse mophato wa ditšhaba pele o o neng o na le banna ba ka ne ba le 20 000, go ya go feleletsa setšhaba sa Bajuta sotlhe. A mo tlhophela mothusi: Goregiase, molaodi yo e neng e le motho yo o itseng ditiro tsa bosole tota. 10Nikanore o ne a ikaeletse go phutha ditalenta di le 2 000 tsa madi a lekgetho a kgosi e neng e a kolota Baroma, ka go rekisa magolegwa a ntwa a Bajuta.
11Mme ka bonako a laletsa metse e e neng a bapile le lewatle gore e tle go reka magolegwa a Bajuta, a ba solofetsa gore o tla ba neela magolegwa a le 90 ka talenta e le nngwefela. Fela o ne a sa akanye katlholo e e neng e tlaa tloga e mo wela godimo e tswa go Mogodimodimo.
12Ya re Judase a utlwa gore Nikanore o tsile go ba tlhasela, a bolelela banna ba gagwe gore mmaba o etla. 13Ke fa maboi le ba ba neng ba sa ikanya Modimo o o siameng ba tlhanola direthe mme ba sia. 14Ba bangwe ba rekisa tsotlhe tse ba neng ba sa ntse ba na natso, ba ntse ba rapela Morena gore a ba namole mo go Nikanore wa moikepi, yo o neng a setse e bile a ba rekisitse le pele ga a thulana nabo tota, 15fa a sa ba namole ka ntlha ya go tshwanela ga bone, mme a ba namole ka ntlha ya dikgolagano tse a neng a di dirile le bagologolo ba bone, le ka ntlha ya gore le bone ba ne ba bidiwa ka leina la gagwe le le boitshepo le le tlotlegang. 16Makabeuse a tsolopanya banna ba gagwe, ba ba neng ba batla ba le 6 000. Mme a ba kgothatsa gore ba se ka ba bo ba tshaba baba ba le gore ba se ka ba kgobega marapo fa ba bona bontsi jwa baheitane ba ba neng ba tsile go ba tlhasela ka bosula. A ba bolelela go lwa senna. 17A nna a ba gakolola lonyatso lo lo maswe lo banna ba ba neng ba nyaditse Felo mo go Boitshepo ka lone le pitlagano ya motse o o neng o tlontlolotswe, go sa umakwe tshenyo ya mekgwa ya bone. 18A nna a re, “Ba ke bone ba ka ne ba ikantse dibolao tsa bone le ditiro tsa bone tsa bonatla. Fela rona re ikantse Modimo o o thatayotlhe o fa o rata o ka fenyang botlhe ba ba tsileng go re tlhasela le lefatshe lotlhe nabo.”
19A ba gopotsa metlha e borraabo-nemogolwagolwana ba neng ba thusiwa ka yone: motlhang go swang banna ba le 185 000 Saneheribe a ba eteletse pele: 20le mogang ba tlhabanang le Bagalata kwa Babilone fa batlhabani ba Bajuta ba ne ba le 8 000 le Masedonia a le 4 000, mme e rile Masedonia a pitlagantswe thata, ba le 8 000 ba ne ba feleletsa ba le 120 000 ka ntlha ya thuso e One wa Legodimo o neng wa ba thusa ka yone. Mme ba gapa dtihopo tse dintsi.
21Ka mafoko a o ne a dira gore ba nne pelokgale mme ba ikaelele go swela melao ya bone le lefatshe la ga bone. Ke fa a kgaoganya lekoko la gagwe ditlhopha di ka nna nne. 22A baya bomorwarraagwe bo-Simone, Josefa le Jonathane kwa tlhogong ya ditlhopa, a naya mongwe le mongwe wa bone banna ba le 1 500. 23Ke fa a laela Esediriase go balela Lokwalo lo lo boitshepo godimo, mme a ba naya lentswe je la segakolodi: “Thuso ya Modimo”, a ba a ipaya kwa tlhogong ya setlhopha sa ntlha, a bo a ya go tlhasela Nikanore.
24Mogodimodimo a ba thusa, mme ba bolaya batlhabani ba feta 9 000 ba mephato ya baba. Ba kobesa, mme ba golafatsa batlhabani ba le bantsi go feta moo ba lekoko la ga Nikanore. Ba ba phatlhalatsa. 25Ba gapa madi a ba ba neng ba tsile go ba reka e le magolegwa. Ya re ba sena go nna ba ba kobakoba nako e telele, ba boa gonne nako e ne setse e ile. 26E ne e le letsatsi pele ga Sabbata. Ke gone ka moo ba neng ba se ka ba tswelela-pele ka go ba sala morago. 27Ba ne ba iphuthela dibolao tsa baba, mme ba ba tseela dithopo. Ke fa ba ja letsatsi la Sabata ba baka Morena ka pelo yotlhe, ba mo leboga thata, ene yo o neng a beetse tsatsi leo go rothisetsa monyo wa ntlha wa boutlwelo-botlhoko jwa gagwe mo go bone. 28Ya re Sabata e sena go feta ba abela ba ba neng ba ntse ba tlhorisiwa, batlholagadi le masiela dithopo dingwe. Tse di setseng ba di kgaoganya, ba bo ba di abela bana ba bone. 29Ke fa ba rapela mmogo mo pontsheng ba kopa Morena yo o boutlwelo-botlhoko gore a agisane le batlhanka ba gagwe.
Timotheuse le Bakidese ba a fenngwa
30Ba bo ba gwetlha batlhabani ba mephato ya bo-Timotheuse le Bakidese, mme ba bolaaka ba ba fetang 20 000 ba bone. Ba gapa dikago tse di goletseng kwa godimo di le dintsintsi. Ba dira diabe di le pedi ka dithopo tse dintsi tsa bone. Seabe sengwe ya nna sa bone, se sengwe ya nna sa ba ba neng ba tlhorisiwa, masiela le batlholagadi, ba ntse ba sa lebale batsofe. 31Ba phutha dibolao tsa baba ka kelotlhoko mme ba di baya mo mafelong a a siameng. Dithopo tse dingwe ba di isa Jerusalema. 32Ba bolaya kgosana e e neng e laola balebeledi ba ga Timotheuse, yo e neng e le monna yo o bosula tota, yo o neng a dirile tshenyo tse dintsi thata mo gare ga Bajuta. 33Ya re ba ntse ba ja mediro ya phenyo ya bone kwa Jerusalema ba tshuba banna ba ba neng ba fisitse dikgoro tse di boitshepo, ba ba neng ba sietse mo ntlwaneng nngwe le Kallisethenese. Jalo he batho ba ba ne ba duelelwa itshepololo ya bone sentle.
Go sia ga ga Nikanore le Bosupi jwa gagwe
34E rile namane e tona ele ya molotsana e go tweng Nikanore ene yo o neng a tsisitse boradipapadi ba le 1 000 go tla go reka Bajuta,
35a bona gore bone batho ba ba neng a ba gopolela gore ga se batho ba sepe ba mo kokobeditse, a ikapola diaparo tse di magasigasi tsa gagwe, mme a kgabaganya lefatshe a le esi, a tshwana le lekgoba le le thobileng. A fitlha kwa Antioko ka lesego fela, ka batlhabani ba lekoko la gagwe ba bolailwe.
36Ka mokgwa o, motho yo o neng a solofeditse Baroma gore o tlaa duela madi a bone e lekgetho ka go rekisa magolegwa kwa Jerusalema ke ene yo jaanong a neng a bolela gore Bajuta ba na le Mofemedi, le gore ka ntlha ya Mofemedi yo ga go na ope yo o ka ba utlwisang botlhoko gonne ba latela melao e e tlhomilweng ke ene Mofemedi yo.
