2 MAKABISE 4

₁Simone yo o setseng a umakilwe fa godimo e le ene yo o neng a bolela kgatlhanong le madi a mantsi a a neng a beilwe le kgatlhanong le lefatshe la ga gabo, o ne a simolola go bua maswe ka Oniase; a bolela gore ke ene moprista yo mogolo yo o neng a tshwara Heliodoruse maswe a bo a tloga a nna motsisi wa ditiragalo tse di botlhoko tse. ₂Simone jaanong a nna le sebete sa go bitsa modiredimolemo yo wa motse, ene yo o neng a sireletsa ba ga gabo, ene yo o neng a tlhwaafaletse go boloka melao, a re ke motlhoi wa tse di siametseng setshaba. ₃Letlhoo le le ne la gola mo e leng gore batho bangwe ba ne ba bo ba bolaiwa ke ditsala dingwe tsa ga Simone. ₄Ya re Oniase a bona dilo tse, a lemoga ka mo borukhutlhi jo bo leng bosula ka teng, e bile a itse sentle gore Apolloniuse morwa Menesetheuse, motsamaisi wa batlhabani wa Koele-Siria le Fenisia, ke ene yo o ntseng a thusa Simone mo bosuleng jo jwa gagwe; ₅a ya go bona Kgosi, e se gore o ya go bua ka melato ya ba ga gabo, e le gore o batla go thusa setšhaba sotlhe le mongwe le mongwe. ₆O ne a bona gore fa kgosi e sa tle go thusa dilo ga di kake tsa bo tsa tlhola di tsamaya sentle, le gore Simone ga a kake a bo a kgonwa ke ope go emisa boeleele jwa gagwe.

₇E rile Seleukuse a swa mme Antiokuse yo o neng a bidiwa Epifanese a sena go tsaya maemo a gagwe a bogosi Jasone, morwarraagwe Oniase a itira moprista yo mogolo ka bolotsana. ₈A ya kwa kgosing a e solofetsa gore o tlaa e naya ditalenta di le 360 tsa selefera, mmogo le ditalenta tse di 80 tse di tlaa bong di tswa mo motlobong o mongwe wa madi. ₉A boa a ikgolega ka go solofetsa ditalenta tse dingwe di le 150 fa fela a ka dumelelwa go dirisa thata ya gagwe ya go laola mo go tlhomeng boitshidilelommele le maitisetso-baša, a bo a thaopela batho go nna Maantiokuse mo Jerusalema.

₁₀Ya re kgosi e dumela, Jasone a simolola go ruta ba ga gabo mekgwa ya segerika fela a sena go newa thata. ₁₁A fedisa ditetla tse kgosi e neng e di file Bajuta, tse ba neng ba di neilwe ka matsapa a ga Johane, rraagwe Eupolemuse yo e neng ya re morago ga moo a rongwa go ya go tlhoma botsala le botshwaragani le Baroma. A senya mekgwa e e siameng, mme a simolola e mengwe e meša e e neng e le kgatlhanong le Molao. ₁₂A fetelela mo a neng a bo a tlhoma boitshidilela-mmele go kgotlhagana le Motsana wa Phemelo, a bo a kgona go dira gore makau, a e neng e le bana ba batlotlegi ba motse, a rwale dihutshe tsa Magerika. ₁₃Ka Jasone e ne e le molotsana wa moikepi mme e se moprista yo mogolo tota, o ne a feteletse tota mo bosuleng jwa gagwe. Tota go ruta segerika ga gagwe go ne go le gontsi mo e leng gore ₁₄baprista ba ne ba sa tlhole ba bontsha kgatlhego mo ditirelong tsa aletara. E ne e tle e re ba nyatsa Tempele ba bo ba tlhokomologa ditshupelo ba itlhaganelele go ya go tsenya letsogo mo metshamekong e e neng e sa siama kwa lebaleng la boitshidilelo-mmele fa ba utlwa piletsa ya motshameko wa go kolopa leje kgotsa tshipi. ₁₅Ba ne ba sinalala sengwe le sengwe se bagologolo ba bone ba neng ba se tlotla, mme ba goletsa ditlotla tsa segerika. ₁₆Fela tse tsotlhe ba ne ba di otlhaelwa. Bone batho ba, ba mekgwa ya bone ba neng ba e kgatlhegela go le kanakana ba mo go sengwe le sengwe ba neng ba leka go ba etsa, e ne ya nna baba ba bone le babolai. ₁₇Go tlontlolola melao ya Modimo ga se selo se sennye, jaaka ditiragalo tse di neng tsa nna teng morago di supa.

₁₈E ne ya re ka nako ya metshameko ya sengwaga-tlhano e e neng e tshwarelwa kwa Tire, kgosi e le teng, ₁₉Jasone yo o bosula yo, a romela Maantiokuse mangwe a tswa kwa Jerusalema, e le balebeledi ba semmuso, go isa diterekema tsa selefera di le 300, ba isetsa tshupelo ya ga Herekulese. Fela le bone ba ba neng ba isitse madi ba ne ba bona go sa tshwanela gore ba a dirisetse tshupelo, ka go ne go tla se ka go siama. Ba ne ba bona go le botoka gore ba a dirise mo ditshenyegelong tse dingwe. ₂₀Jalo he, madi a, a moromedi wa one a neng a ikaeletse gore a dirisediwe tshupelo ya ga Herekulese, ba ba neng ba a tshotse bone ba ne ba bona go le botoka go a dirisa mo go ageng dikepe tsa ntwa tse di mafuduo-mararo.

₂₁Apolloniuse morwa Menesetheuse o ne a rometswe kwa Egepeto go ya go nna gone mo peong ya ga Kgosi Filometore. Antiokuse a utlwa gore ene Kgosi Filometore o ne a tlhoile go busa ga gagwe, mme a simolola go loga maano a go falola. Ke fa a tswa mo Joppa a ya kwa Jerusalema. ₂₂Jasone le batho ba motse ba mo amogela ka mabogo a mabedi le ka matlomo a magolo, a tshubelwa dipone, a lelediwa megolokwane. Morago ga mo, a isa lekoko la gagwe la ntwa kwa Fenisia.

₂₃Morago ga dingwaga di le tharo, Jasone o ne a roma Menelause, morwarraagwe Simone, yo o umakilweng fa godimo, gore a ise madi kwa kgosing mme a tle le maikutlo a yone mabapi le dilo tse dintsinyana tsa botlhokwa tse di neng di dirwa. ₂₄Fela Menelause ene, e rile a isitswe kwa kgosing a feta a e boka thata jaaka e kete ke ene yo o laolang. Ka mokgwa oo, a dira gore go dirwe ene moprista yo mogolo, a fetile Jasone ka ditalenta tsa selefera di le 300! ₂₅O ne a boa a na le ditaelo tsa kgosi, mme go se na sepe sa boprista jo bogolo mo go ene, a mpa a thusiwa ke bogale jwa segagapa se se setlhogo le kgakalo ya sebatana sa naga. ₂₆Ka mokgwa o, Jasone yo le ene a neng a tlhonkolotse morwarraagwe, le ene o ne a tlhonkololwa ke yo mongwe wa boraro, a bo a patelesega go tshabela kwa kgaolong ya Maamonite. ₂₇Fa e le Menelause ene, o ne a nna a nna mo maemong a a kwa godimo a gagwe. Fela a se ka a naya kgosi madi sentle jaaka a ne a e solofeditse, ₂₈le mororo Soseteratuse, molaodi wa Motsana wa Phemelo, yo tiro ya gagwe e neng e le go kgobokanya madi a lekgetho, a ne a nna a batla tuelo e. Ka ntlha ya selo se boobabedi ba ne ba bilediwa fa pele ga kgosi. ₂₉Menelause o ne a tlogela morwarraagwe Lisimakuse e le moemedi wa moprista yo mogolo, fa Soseteratuse ene a ne a tlogela Keratse, molaodi wa mephato ya Masiperiote, e le moemedi wa gagwe.

₃₀Fa tse di ntse di diragala, go ne ga diragala gore batho ba Taresuse le Malluse ba tsose mokubukubu, gonne metse ya bone e ne e filwe Maantiokuse, nyatsi ya kgosi. ₃₁Ke fa kgosi e itlhaganelela go ya go fedisa mokubukubu o, e tlogela Anderonikuse, mongwe wa magosana a yone, a mo emetse. ₃₂Menelause, ka a ne a gopola gore o bonye nako e e mo siametseng, o ne a somola dijana dingwe tsa gouta mo Tempeleng mme a di naya Anderonikuse, a bo a kgona go rekisetsa motse wa Tire le metse e mengwe e e gaufi tse dingwe. ₃₃Ya re Oniase a tla go itse dilo tse sentle, a ikgogela golo gongwe ga felo ga botshabelo kwa Dafene gaufi le Antioko, mme a ntse a le teng a bo a omanya Menelause thata. ₃₄Ke fa Manelause a tseela Anderonikuse fa thoko, a mo tlhotlheletsa go bolaya Oniase. Anderonikuse a subolola Oniase, mme ka bolotsana a mo tlhomamisetsa ka go ikana gore o na le kagiso nae. Mme ka mokgwa oo a kgona go dira gore a tswe mo felong ga botshabelo, le fa a ne a ntse a belaela. Ke fa a tlhokomologa tshiamo, mme a mmolaya.

₃₅Ke gone ka moo Bajuta le batho ba ditšhaba tse dingwe ba neng ba utlwa botlhoko ba bo ba tenega ka ntlha ya polao e e sa siamang e. ₃₆Ya re kgosi e boa kwa kgaolong ya Silisia, Bajuta ba motse mogolo le Magerika a le one a neng a sa utlwane le go bolaelwa swele mo ga ga Oniase, ba ne ba ya go bua le kgosi mabapi le gone. ₃₇Antiokuse o ne a utlwa botlhoko thata mme a tlhomoga pelo, a lelela kelotlhoko ya moswi le boiphapo jwa gagwe. ₃₈A tenega mo go maswe, mme a apola Anderonikuse diaparo tse di bohibidu jo bo mokgona kwa ntle ga go senya nako, a mo somola diaparo, a mo raladisa motse, a mo isa gone kwa a neng a bolaela Onisae teng ka mabogo a gagwe a a bosula. Teng a feta a tlosa mmolai yo mo lefatshing. Ka mokgwa oo Morena o ne a mo otlhaya ka kotlhao e e neng e mo tshwanela.

₃₉Jaanong Lisimakuse o ne a utswa dilo tse di boitshepo di le dintsi mo motseng. Menelause a itlhokomolositse molato o. Mme e rile batho ka bontsi ba tla go itse selo se, ba tsosetsa Lisimakuse leferetlho, gonne dijana tse dintsi tsa gouta di ne di setse di rekisitšwe. ₄₀Ya re segopa se sa batho ba ba gaketseng se simolola go nna letshwenyo, Lisimakuse a dira gore banna ba ka ne ba le 3 000 ba tlhomele, mme a tlhasela. Mephato e e ne e eteletswe pele ke Auranuse mongwe motho yo o neng a setse a na le dingwaga di le dintsi, mme boeleele jwa gagwe le jone bo le bontsi fela jalo. ₄₁Ya re batho ba lemoga gore go tlhasela mo ke tiro ya ga Lisimakuse, bangwe ba phamola maje, ba bangwe ba tsaya melamu, ba bangwe ba tabola melora e e neng e le gone foo. Mme botlhe ba kolopaka banna ba ga Lisimakuse ka sengwe le sengwe se ba neng ba se tshotse ba sa rekegele ope. ₄₂Ka mokgwa oo, ba ne ba kobesa ba le bantsi, bangwenyana ba bo ba ba bolaya. Ba ba phatlhalatsa botlhe. Mothukhuthi yo wa Tempele le ene ba mmolaela ka kwa ntle ga Boboloka-Madi.

₄₃Ka ntlha ya selo se, Menelause o ne a sekisiwa. ₄₄Ya re kgosi e tla Tire, banna ba bararo ba ba neng ba rometswe ke bagolwane ba tsenya kgetsi e mo go yone. ₄₅Menelause, e rile a bona gore o setse a fentswe, a solofetsa Petolemi morwa Dorimenese madi a le mantsi fa a ka mmuelela le kgosi. ₄₆Ke fa Petolemi a biletsa kgosi fa thoko, ba tsena mo tseleng e e tsentsweng gare ke ditlhare jaaka e kete ba ya go iphokisa phefo, a feta a e tlhotlheletsa go tlhanoga. ₄₇Kgosi ya bo e itshwarela Menelause yo e neng e le ene mosimolodi wa bosula jo jotlhe. Batho ba batho bone a ba atlholela loso, ba tota ba ka bong ba ne ba dule fela ba sa bonwa molato, fa ba ka bo ba ne ba ipueletse le fa pele ga Masikithia tota. ₄₈Ka mokgwa oo ba ba neng ba bueleletse motse le metsana e e ka kwa ntle le dijana tse di boitshepo ba ne ba newa kotlhao e e sa siamang ka bonako. ₄₉Le Matiria bangwe ba ne ba a tenegetse molato thata mo e leng gore ba ne ba fitlha batho ba ka phitlho e e maatlametlo mo go maswe. ₅₀Fela Menelause ene, ka ntlha ya megagaru ya ba ba neng ba busa, o ne a nna a tswelelapele mo tirong ya gagwe. Bosula jwa gagwe jwa nna jwa oketsega. A nna motlhoi yo mogolo wa ba ga gabo.