2 MAKABISE 12

₁Ya re go sena go dumalanwa jaana Lisiase a boela kwa kgosing, mme Bajuta ba ya go lema. ₂Fela batsamaisi bangwe ba batlhabani jaaka bo-Timotheuse le Apolloniuse morwa Gennause, mmogo le Hieronimuse le Demofone, le Nikanore molaodi wa Siperuse, ba ne ba se ka ba dumelela Bajuta go nna ka kagiso, ba sa tlhodiewe ke ope.

₃Batho ba Joppa ba ne ba bo ba dira tiro e e maswe e: Ba laletsa Bajuta ba ba neng ba nna nabo go palama mekoro e ba neng ba e baakantse ba tsaya basadi le bana ba bone. Go ne go sa umakwa sepe kaga maikaelelo a go ba utlwisa botlhoko. ₄Baagi ba ne ba dirile jalo ka tumalano ya mongwe le mongwe. Bajuta ba dumalana, ka gonne e ne e le batho ba kagiso mme ba se na lobaka lwa go belaela sepe. Fela e rile ba sena go tsenelela kwa teng-teng ga lewatle, ba betisiwa botlhe, e le setlhopha sa batho ba ka ne ba le 2 000 kgotsa go feta moo.

₅Ya re Judase a utlwa bosetlhogo jo bo kana jo ba ga gabo ba neng ba bo diretswe a naya banna ba gagwe ditaelo. ₆Mme ya re a sena go rapela Modimo, o e leng Moatlhodi yo o siameng, a ya go tlhasela babolai ba bomorwarraagwe. A ya go tshuba boemela-dikepe bosigo, a fisa le mekoro, a bo a kgekgetha ba ba neng ba tshabetse mo go yone. ₇O ne a boa ka morago ka gonne dikgoro tsa motse di ne di tswetswe, mme e le gore o ikaeletse gore a tle a boe a tle go ripitla phuthego ya Joppa.

₈Fela ya re a utlwa gore batho ba Jamnia le bone ba ne ba loga maano a go ripitla Bajuta ba ba neng ba nna nabo, ₉a ya go tlhasela batho ba Jamnia bosigo mme a tshuba boemela-dikepe le mekoro yotlhe, mo e leng gore lesedi la dikgabo tsa molelo le ne le bile le bonala kwa Jerusalema, e leng bokgakala jwa dimaele di le 30.

₁₀E rile ba sena go tsamaya bokgakala jo bo fetang jwa maele go tswa foo, ba ya go tlhasela Timotheuse, Judase a tlhaselwa ke mophato wa Maarabea o o neng o na le batlhabani-batsamai ba ka ne ba le 5 000 kgotsa go feta moo, le batlhabani-bapalami ba ka ne ba le 500. ₁₁Ntwa ya tshwaragana, mme ka thuso ya Modimo banna ba ga Judase ba fenya ka letsatsi le. Bakgarakgatshegi ba ba neng ba fentswe ba ne ba kopa Judase gore a agisane nabo, ba bo ba solofetsa go mo naya metlhape ya bone le go mo thusa gongwe le gongwe ka metlha yotlhe. ₁₂Ya re Judase a lemoga gore ba ka nna ba nna le thuso ka mekgwa e le mentsi a dumalana le go agisana nabo. Mme ya re ba sena go dira ditumalano jaana Maarabea a boela kwa ditanteng tsa bone.

₁₃Judase o ne a bo a tlhasela motse o mongwe o o thatafaditsweng, o thekeleditswe ka dithako tsa phemelo, mme ga nna matswakabele a ditšhaba mo go one. Leina la one e ne e le Kaspine. ₁₄Batho ba ba neng ba thekeleditswe ba ne ba direla Judase le banna ba gagwe makgakga, ba bo ba oketsa dithogano tsa bone ka ditlhapatso le ditlontlololo, ka jaana ba ne ba ikantse bopopota jwa dipota tsa bone, le mokoa wa dijo tsa bone. ₁₅Mme Judase le banna ba gagwe ba rapela Morena yo mogolo wa lefatshe yo o neng a fenya Jeriko mo malatsing a ga Jošua kwa ntle ga dikota tsa go thuba dipota le dibetsa tsa tlhaselo ya thekeletso. Ke fa ba tlhasela lobotana ka bogale jo bogolo. ₁₆Ba gapa motse ka ntlha ya go rata ga Modimo. Mme polao ya nna kgolo mme ga nna maswe mo e leng gore letsha le le neng le le gaufi, le ka ne le le dikgato di le 500 go le kgabaganyetsa ka kwa, e ne ya ne ekete le penologa ka madi.

₁₇E rile ba sena go tsamaya dimaele di le 95 tota go tswa foo, ba fitlha kwa Karakese mo lefatsheng la Bajuta ba ba neng ba bidiwa Matubia. ₁₈Ba se ka ba fitlhela Timotheuse mo kgaolong eo. O ne a setse a dule mo kgaolong eo, a sa kgona go dira sepe, fa e se go tlogela mophato wa batlhabani-balebeledi o o neng o nonofile golo gongwe. ₁₉Dositheuse le Sosipatere, ba e neng e le balaodi ba babedi ba batlhabani ba ga Makabeuse, ba ne ba ya go kgekgetha mophato o Timotheuse o neng a o sadisitse mo kagong ya phemelo, e ka ne e le banna ba ba fetang 10 000. ₂₀Makabeuse ka boene o ne a kgaoganya lekoko la gagwe ditlhopha-tlhopha mme a naya ditlhopha tse balaodi. A bo a itlhaganelela go latelela Timotheuse, yo mephato ya gagwe e neng e na le batlhabani-batsamai ba le 120 000 le batlhabani-bapalami ba le 2 500. ₂₁Selo sa ntlha se Timotheuse o neng a se dira fa a utlwa gore Judase o e tla, e ne ya nna go romela basadi le bana le dikoloi tsa dithoto kwa felong fa go neng go bidiwa Karenaima, gonne golo foo go ne go le thata go thekelediwa, le gone motho o fitlha teng ka bothata, ka gore ditsela tsotlhe tse di neng di ya teng di ne di pitlaganye. ₂₂Ya re setlhopha sa ntlha sa batlhabani ba ga Judase se tlhaga, baba ba tshoga mo go maswe, ba tshogaka mo go tsitsibanyang mmele fa ba bona ponatsho ya One o o bonang gotlhe, mme ya nna semphete-semphete e le gore ba gasagasame fela, mo e leng gore ba ne ba tle ba bo ba kobesiwe ke ba ga bone ka ntlha ya go ragogela mo ditšhakeng tsa bone. ₂₃Judase a ba kobakoba ka natla e kgolo, mme a kgekgetha baleofi ba, a bolaya banna ba ka ne ba le 30 000. ₂₄Timotheuse ka boene a wela mo diatleng tsa bo-Dositheuse le Sosipatere le banna ba bone. Mme ka bolotsana a ipuelela nabo gore ba mo lese a tsamaye ba sa mmolaya, ka ntlha ya gore o ne a tshwere batsadi ba ba le bantsi le bakaulengwe ba bangwe, mme ba ba ka tloga ba tshwarwa maswe. ₂₅Ya re kgabagare a ba dira gore ba dumele gore o tlaa diragatsa se a neng a se solofeditse, gore o tlaa busa batho ba ba ntse ba itekanetse sentle. Ke fa ba mo tlogela gore ba tle ba boloke bakaulengwe ba bone.

₂₆E rile Judase a fitlha kwa Karenaima le Atagateione, a feta a bolaaka banna ba le 25 000.

₂₇E rile a sena go gasagasa baba ba a ya le lekoko la gagwe go ya go tlhasela Eferone, motse o o thatafaditsweng, kwa Lisiase a neng a nna teng. Dikwankwetla tsa makawana tse di neng di dirile theko ka kwa ntle ga dipotana di ne tsa emelana nabo tota. Mo teng go ne go beilwe dibetsa tsa tlhaselo ya thekeletso tse dintsi le dibolao tse di konopiwang. ₂₈Fela Bajuta ba ne ba rapela Morena yo ka thata ya gagwe o phatlakanyang diphemelo tsa baba. Ke fa ba gapa motse, mme ba kgekgetha batho ba ka ne ba le 25 000 ba ba neng ba le mo teng. ₂₉Ya re ba tswa foo, ba sotlhelela kwa Sekithopolise, dimaele di le 75 go tswa mo Jerusalema. ₃₀Fela Bajuta ba ba agileng teng ba tlhomamisetsa Judase gore batho ba Sekithopolise ba ntse ba ba tshwere sentle mme ba le molemo thata mo go bone fa dilo di ne di eme maswe thata. ₃₁Ke fa ene le banna ba gagwe ba ba leboga mme ba ba kopa gore ba nne ba tswele pele go nna ditsala tsa setšhaba sa gagwe mo nakong e e tlang. Ba goroga mo Jerusalema fela go tla go jewa moletlo wa Dibeke.

₃₂Ya re morago ga Pentekonta, jaaka moletlo o o bidiwa, ba ne ba ya go tlhasela Goregiase, motsamaisi wa batlhabani wa Idumaea. ₃₃A tswa a eteletse pele batlhabani-batsamai ba le 3 000 le batlhabani-bapalami ba le 400. ₃₄Ga swa Bajuta ba se kae mo ntweng eo. ₃₅Monna mongwe yo o neng a bidiwa Dositheuse, wa Letubia, yo o neng a palame pitse, mme e le monna yo o nonofileng, o ne a phamola Goregiase, a mo tshwara ka kobo ya gagwe, mme a nna a mo goga, a ikaeletse go gapa molotsana yo a ntse a tshela. Fela mongwe wa batlhabani-bapalami ba Matrasia o ne a itatlhela mo go Dositheuse, a mo mamola legetla, mme Goregiase a falolela kwa Marisa.

₃₆Fa dilo tse di ntse di diragala, Judase o ne a rapela Morena gore a ke a ba bontshe gore ke ene mothusi wa bone le moeteledi-pele mo ntweng ka gonne Esederiase le banna ba gagwe ba ne ba lole nako e telele mme ba lapile tota. ₃₇Ke fa a tlhabeletsa pina ya ntwa le difela tse dingwe, a di opelela godimo thata ka puo ya bagologolo ba ga gabo, mme a phatlalatsa mephato ya ga Goregiase.

₃₈Jaanong Judase o ne a tsolopanya lekoko la gagwe mme a ya kwa motseng wa Adullame. Mme ka gore e ne e le letsatsi la bosupa la beke ba ne ba iphepafatsa go latela mokgwa wa bone mme ba tshegetsa Sabata gone fa. ₃₉Ka letsatsi le le latelang ba tla mo go Judase (ka gore ka nako eo go ne go setse go tlhokafala thata) go ya go tlosa mebele ya ba ba neng ba tlhokafetse le go e robatsa mo gare ga ba losika lwa bone mo diphupung tsa bagologolo ba bone. ₄₀Fela ya re ba fitlhela mo banneng ba botlhe ba ba neng ba sule, mo dihempeng tsa bone, methuswana ya medimo ya disetwa ba e tsere kwa Jamnia, mme Bajuta ba ne ba e idiwa ke Molao, mongwe le mongwe a bona sentle gore ke eng banna ba ba ne ba sule. ₄₁Mme botlhe ba baka mekgwa ya Modimo, moatlhodi yo o siameng, yo o senolang dilo tse di fitlhilweng. ₄₂Ba rapela, ba kopa gore sebe se se dirilweng se se ke se itshwarelwe gotlhelele. Morago ga moo Judase wa senatla a kopa batho thata gore ba ikgaphe mo sebeng sengwe le sengwe, ka gore ba ne ba iponetse ka matlho gore sebe se ne se dirileng botlhe ba ba neng ba sule. ₄₃Ya re morago ga moo, a kgobokanya madi mo go mongwe le mongwe wa bone e ka ne e le diterekema tsa selefera di le 2 000. Mme a a romela Jerusalema gore go tle go ntshiwe tshupelo ya boleo. Ka go dira jaana o ne a dira tiro e ntle thata, e e tlotlegang, e ka yone o neng a akanya tsogo. ₄₄Gonne fa a kabo a ne a sa solofela gore ba ba neng ba bolailwe ga ba na go tsoga go kabo go ne go feteletse e bile go sa thuse sepe go rapela ka maikaelelo a go rapelela baswi. ₄₅Mme fa a ne a dumela gore ba ba suleng sedumedi ba emetswe ke tuelo e ntle thata, mogopolo o o ne o le boitshepo e bile e le wa borapedi. Ke gone ka moo a neng a ntshetsa baswi tshupelo e ya tefelo, gore ba tle ba gololwe mo sebeng sa bone.