2 MAKABISE 10

₁Makabeuse le balekane ba gagwe, ba eteletswe ke Morena pele, ba ne ba tlhabolola Tempele le motse. ₂Ba diga dialetara tse batswakwa ba neng ba di agile mo patlelong ya motse, ba bo ba senya le malwapa a medimo ya bone. ₃Ba phepafatsa Felo mo go Boitshepo mme ba aga aletara e nngwe ba bo ba tshuba molelo ka magakwe. Ba dirisa molelo o go ntsha tshupelo ya ntlha morago ga dingwaga tse pedi, ba fisa maswalo, ba tshuba dipone, mme ba baya dilofo tsa borotho. ₄Ya re ba sena go dira jaana ba patlama fa fatshe, mme ba rapela Morena gore a se ka a bo a tlhola a ba dumelela go wela mo dipetsong tse di ntseng jaana, le gore fa ba tshokane ba leofile, a ke a ba tshwaye phoso ka selekanyo, a se ka a bo a ba tlogela fela ba wela mo diatleng tsa ditšhaba tse di tlhapatsang le tse di sa butswang. ₅Letsatsi le la phepafatso ya Tempele e ne ya nna lone letsatsi le batswakwa ba neng ba e itshepolola ka lone, ebong letsatsi la bo-25 la yone kgwedi e ya Chiselefe. ₆Ba tshegetsa malatsi a moletlo a le 8 ka boitumelo jo bogolo, ka mokgwa wa moletlo wa Metlaagana, ba ntse ba gakologelwa ka mo malobanyana fela jaana, ka nako ya moletlo wa Metlaagana, ba neng ba nna mo dithabeng le mo dikgageng ka teng jaaka dibatana tsa naga. ₇Ke fa ba tsaya dikala le matlhaku a a tletseng matlhare le dipalema, ba opelela ene yo o neng a feleleditse go phepafatsa Felo mo go Boitshepo ga gagwe sentle difela. ₈Ba bo ba laela setšhaba sotlhe, gore Bajuta botlhe ba tshwanetse go tshegetsa malatsi a ngwaga nngwe le nngwe, mme ba gagamatsa taelo e ka katlholo ya mongwe le mongwe.

₉Antiokuse yo o neng a bidiwa Epifanese o ne a felela jalo. ₁₀Jaanong tiro ya rona e tla nna go bolela ditso tsa ga Antiokuse Eupatore yo e neng e le morwa monna yo wa moikepi yo, le go bolela ka bokhutshwane dilo tse di bosula tse di neng tsa tswa mo dintweng. ₁₁E rile kgosana e e tsaya setilo ya baya Lisiase mongwe, yo e neng e le molaodi wa Koele-Siria le Finisia, gore a laole dilo tsa setšhaba. ₁₂Jaanong Petolemi, yo o neng a bidiwa Makerone, molaodi wa ntlha go tshwara Bajuta sentle, o ne a dirile bojotlhe jwa gagwe go ba laola ka tshiamo nngwe, e le gore o duelela bosula jo bontsi jo ba neng ba tshwerwe ka jone mo nakong e e neng e fetile. ₁₃Ditsala tsa kgosi tsa mmua maswe mo go Eupatore. Ke fa a utlwa a bidiwa mooki gongwe le gongwe ka ntlha ya gore o ne a tlogile mo motseng wa Siperuse o Filometore a neng a o beile mo diatleng tsa gagwe, le ka ntlha ya gore o ne a kgabaganyeditse kwa go Antiokuse Epifanese. O ne a ipolaya ka more, a sa dira gore batho ba mo tlotle mo tirong ya gagwe.

₁₄Jaanong Goregiase o ne a nna molaodi wa batlhabani mo kgaolong eo. O ne a na le mophato wa batlhabani ba ba thapilweng mme a nnela go tlhasela Bajuta. ₁₅Ka yone nako e, Maidumaea, ba ba neng ba laola dikago tsa phemelo tsa botlhokwa, a ne a le letshwenyo mo Bajuteng. Ba amogela ba ba neng ba kobilwe kwa Jerusalema, le gone ba leka go tlhola ba lole fela. ₁₆E ne ya re Makabeuse le banna ba gagwe ba sena go rapela Modimo mo pontsheng, ba o kopa gore o ba thuse, ba ya go tlhasela dikago tsa phemelo tsa Maidumaea. ₁₇Ba tlhasela ka natla e kgolo, mme ba gapa mafelo a a ba siametseng mo ntweng, ba fenya botlhe ba ba neng ba lwa mo godimo ga dithako tsa phemelo. Ba bolaya botlhe ba ba neng ba ba wela godimo, ba ka ne ba 20 000 le go feta.

₁₈Ba ka ne ba le 9 000 kgotsa go feta moo ba ne ba tshabela mo dikagong tsa phemelo tse di thatafaditsweng tota di le pedi, ba na le sengwe le sengwe se ba neng ba tla se tlhoka go emelana le tlhaselo ya thekeletso. ₁₉Ke fa Makabeuse a tlogela Simone le Josefa mmogo le Sakaeuse le mephato ya gagwe, palo ya bone e lekanye sentle, gore ba ba tlhasele. Mme ene a ya kwa mafelong a mangwe a a neng a mo tlhoka. ₂₀Fela banna ba ga Simone ba ne ba rata madi go feta selekanyo mme ba dumalana le go rekiwa ka madi ke banna ba ba neng ba le mo dikagong tsa phemelo gore ba ba thuse. Ba amogela diderakema di le 70 000 mme ba lesa ba le bantsi gore ba falole. ₂₁Ya re Makabeuse a utlwa se se neng se diragetse a phutha balaodi ba batho mme a bona banna ba molato wa go rekisa bomorwarraabo ka madi ka ntlha ya gore ba ne ba golotse batho ba ba neng ba tlhabana nabo. ₂₂Ya re a sena go bolaya batho ba, ba ba neng ba dule baoki ba setšhaba sa bone ba, a ya go gapa dikago tse pedi tse tsa phemelo. ₂₃Ka gonne o ne a kgona mo go sengwe le sengwe se a neng a lebagana naso ka dibetsa, o ne a bolaya batho ba feta 20 000 mo dikagong tse pedi tse tsa phemelo.

₂₄Timotheuse yo o neng a kile a fenngwa ke Bajuta, jaanong o ne a kgobokanya batlhabani ba ba thapilweng, mme a phutha batlhabani-bapalami ba le bantsintsi ba ba tswang kwa Asia, mme a tla kwa Juta, a ithaya a re o tlaa fenya golo fa ka ntwa. ₂₅E rile ba atamela Makabeuse le banna ba gagwe ba rapela Modimo. Ba ikgasa ditlhogo ka mmu mme ba ikgatlha matheka ka letsela la kgetsi. ₂₆Ba rapalala mo direpuding tse di fa pele ga aletara, mme ba o rapela gore o ba thuse, mme o supe fa e le mmaba wa baba ba bone le motlhabani wa batlhabantshi ba bone, fela jaaka Molao o bolela sentle.

₂₇E rile ba sena go rapela jaana ba tlhomela, ba ya kgakajana le motse, mme ba ema ba setse ba le gaufi le mmaba. ₂₈Ya re mahube a tlhaga, makoko a mabedi a kampana. Batlhabani ba lekoko le lengwe ba ne ba solofetse go kgona le go fenya e seng fela ka ntlha ya bonatla jwa bone, mme bogolobogolo ka ntlha ya gore ba ne ba rapetse Morena. Fela batlhabani ba lekoko le lengwe bone ba ne ba ikantse gore bogale jwa bone ke jone jo bo tlaa ba thusang mo ntweng e. ₂₉Ya re ntwa e tshwaraganye baba ba bona banna ba bantlentle ba le batlhano ba tlhaga ba tswa kwa legodimong, ba palame dipitse ka ditomo tsa gouta, ba feta ba etelela Bajuta pele. ₃₀Ba dikologa Makabeuse mme ba mo sireletsa ka diaparo tsa bone tsa ntwa gore a se ka a bo a kgonwa ke sepe, fa bone ba ntse ba kolopa baba ka metsu e mentsi le dikgadima go fitlhelela ba bo ba unyalala, e le gore ga ba tlhole ba bona sepe le gone ba tseakanye fela. ₃₁Ga bolaiwa batlhabani-batsamai ba le 20 500 le batlhabani-bapalami ba le 600.

₃₂Timotheuse ka boene a tshabela kwa kagong ya phemelo e e neng e bidiwa Gesere e e neng e lebeletswe tota. Mme Chaerease o ne a laola mo go yone. ₃₃Makabeuse le banna ba gagwe ba tlhasela kago ya phemelo malatsi a le mane ka tlhwaafalo. ₃₄Ba ba neng ba e femela bone, ka gonne ba ne ba gopola gore felo fa go siriletsegile tota, ba ne ba nnela go ba tlhapatsa ka matlhapa a a boitshegang, ba bo ba ba roga ka dithogano tse di bosula. ₃₅Ya re ka letsatsi la botlhano phakela, makawana le ba bangwe ba le 20 a mephato ya ga Makabeuse, ba tennwe tota ke metlhapatso e, a ne a tsenelela lebota ka bopelokgale, mme ka kgalefo e e boitshegang ba kgekgetha mongwe le mongwe yo ba neng ba rakana nae. ₃₆Ba bangwe le bone ka go etsa tiro e ya kgekgetho e, ba ne ba tlhaga bafemedi ka kwa morago, mme ba fisa dikago tse di goletseng kwa godimo tsa phemelo, ba tshuba melelo e ba neng ba fisetsa batlhapatsi ba mo go yone ba ntse ba tshela. Ba bangwe ba robaka dikgoro ba tsenya batlhabani ba bangwe mo teng, mme ya nna bone ba ntlha go gapa motse. ₃₇Timotheuse o ne a iphitlhela mo ledibeleng. Fela ba ne ba mmolaya, mmogo le morwarraagwe Chaerease, le Apollofanese.

₃₈Fa tsotlhe tse di sena go fela, ba baka Morena ka difela le ditebogo, ene Morena yo o neng a bontshitse batho ba Iseraele bopelonomi jo bo kalokalo mme a dira gore ba fenye.